ໃນ​ວັນ​ທີ 03-04 ພຶດສະພາ 2018, ທ່ານ ສົງການ ຫລວງມຸນິນທອນ, ຫົວໜ້າກົມເສດຖະກິດ ກະຊວງ​ການ​ຕ່າງປະເທດ ທັງ​ເປັນ​ຫົວໜ້າ​ເຈົ້າ​ໜ້າທີ່​ອາວຸອາເຊັມ ຂອງ ​ສປປ ລາວ ໄດ້​ນຳພາ​ຄະນະ​ຜູ້​ແທນ​ ​ເຂົ້າ​ຮ່ວມ​ກອງ​ປະຊຸມ​ເຈົ້າ​ໜ້າທີ່​ອາວຸໂສອາຊີ-ເອີຣົບ ວົງແຄບ ທີ່ເມືອງ ຊູຣິກ, ປະເທດ ສະວິດສະແລນ.

ກອງປະຊຸມຄັ້ງນີ້ ໄດ້ມີການປຶກສາຫາລື ບັນຫາຕ່າງໆ ເພື່ອກະກຽມໃຫ້ແກ່ກອງປະຊຸມສຸດຍອດ ອາຊີ-ເອີຣົບ ຫລື ອາເຊັມ ຄັ້ງທີ 12 ຊຶ່ງຈະຈັດຂຶ້ນໃນວັນທີ 18-19 ຕຸລາ 2018 ທີ່ ປະເທດ ແບນຊິກ ໂດຍບັນດາປະເທດສະມາຊິກ ໄດ້ຮ່ວມກັນທົບທວນຄືນກົນໄກການຮ່ວມມືໃນໄລຍະຜ່ານມາ ຊຶ່ງເຫັນວ່າ ສະພາບການຂອງໂລກໄດ້ມີການປ່ຽນແປງໄປຢ່າງວ່ອງໄວ ແລະ ສົ່ງຜົນກະທົບເຮັດໃຫ້ສອງທະວີບປະສົບກັບສິ່ງທ້າທາຍຫລາຍດ້ານ. ພ້ອມກັນນັ້ນ, ທີ່ປະຊຸມຍັງໄດ້ປຶກສາຫາລື ວາງທິດທາງຮ່ວມມືໃນຕໍ່ໜ້າ ເປັນຕົ້ນແມ່ນການກະຕຸກຊຸກຍູ້ກົນໄກການຮ່ວມມືລະຫວ່າງສອງທະວີບໃຫ້ມີຄວາມຄ່ອງຕົວ ແລະ ເປັນຮູບປະທໍາຫລາຍຂຶ້ນ ກໍຄືການຊຸກຍູ້ດ້ານການເຊື່ອມຈອດເພື່ອເຮັດໃຫ້ປະຊາຊົນລະຫວ່າງສອງພາກພື້ນໄປມາຫາສູ່ແລກປ່ຽນວັດທະນະທໍາ ແລະ ມີຄວາມເຂົ້າອົກເຂົ້າໃຈກັນຫລາຍຂຶ້ນ.

ນອກຈາກນັ້ນ, ສະຫະພາບເອີຣົບ ໃນນາມເປັນເຈົ້າພາບຈັດກອງປະຊຸມສຸດຍອດອາເຊັມຄັ້ງທີ 12 ກໍໄດ້ລາຍງານຄວາມພ້ອມໃນດ້ານຕ່າງໆ ແລະ ໄດ້ປຶກສາຫາລືກັນ ກ່ຽວກັບຮ່າງຖະແຫລງການຂອງປະທານກອງປະຊຸມສຸດຍອດຄັ້ງທີ 12 ໂດຍໄດ້ເນັ້ນໜັກໃຫ້ຮ່າງຖະແຫລງການດັ່ງກ່າວຄວນ ສັ້ນ, ກະທັດຮັດ, ມີເນື້ອໃນຄົບຖ້ວນ ແລະ ກວມລວມບັນຫາຕ່າງໆທີ່ສອງທະວີບໃຫ້ຄວາມສົນໃຈຮ່ວມກັນ.

ຂອບການຮ່ວມມື ອາຊີ-ເອີຣົບ (ASEM)ສ້າງຕັ້ງຂຶ້ນໃນປີ 1996 ແລະ ປະຈຸບັນມີປະເທດສະມາຊິກ 51 ປະເທດຈາກອາຊີ ແລະ ເອີຣົບ ແລະ ສອງອົງການຈັດຕັ້ງເຂົ້າຮ່ວມ (ກອງເລຂາອາຊຽນ ແລະ ສະຫະພາບເອີຣົບ). ໃນປີ 2012 ສປປ ລາວ ໄດ້ຮັບກຽດເປັນເຈົ້າພາບຈັດກອງປະຊຸມສຸດຍອດອາເຊັມຄັ້ງທີ 9 ຢູ່ ນະຄອນຫລວງວຽງຈັນ ແລະ ໃນເດືອນ ຕຸລາ 2017 ຜ່ານມາ ສປປ ລາວ ກໍໄດ້ເປັນເຈົ້າພາບຈັດກອງປະຊຸມສໍາມະນາອາເຊັມວ່າດ້ວຍການຄຸ້ມຄອງນໍ້າແບບປະສົມປະສານຄັ້ງທີ 6 ຢູ່ທີ່ ປາກເຊ, ແຂວງ ຈໍາປາສັກ.