ໃນວັນທີ 28 ພຶດສະພາ 2018, ທີ່ທຳນຽບປະທານາທິບໍດີຟີລິບປິນ, ທ່ານ ໂພໄຊ ໄຂຄໍາພິທູນ, ເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈຳ ສາທາລະນະລັດ ຟີລິບປິນ ໄດ້ເຂົ້າຢ້ຽມຂໍ່ານັບອຳລາ ພະນະທ່ານ Rodigo Roa Duterte, ປະທານາທິບໍດິ ແຫ່ງ ສາທາລະນະລັດ ຟີລິບປິນ, ຢ່າງເປັນທາງການ.
ໃນໂອກາດນີ້, ພະນະທ່ານ Rodrigo Roa Duterte ໄດ້ກ່າວສະແດງຄວາມຍິນດີ ແລະ ໃຫ້ການຕ້ອນຮັບ ທ່ານທູດ ໂພໄຊ ໄຂຄຳພິທູນ ຢ່າງອົບອຸ່ນ, ພ້ອມທັງຕີລາຄາສູງຕໍ່ການປະຕິບັດໜ້າທີ່ການທູດຢູ່ ສ. ຟີລິບປິນ ຕະຫຼອດໄລຍະ 03 ປີຜ່ານມາ, ໃນການເອົາໃຈໃສ່ເສີມຂະຫຍາຍສາຍພົວພັນການຮ່ວມມືອັນດີທັງໃນວົງຄະນາຍາດອາຊຽນ ກໍ່ຄື ສອງຝ່າຍ, ອັນຍາດມາໄດ້ເຊີ່ງຜົນສຳເລັດໃນການເປີດກອງປະຊຸມຄັ້ງປະຖົມມະເລີກ ການຮ່ວມມືສອງຝ່າຍ ໃນເດືອນກໍລະກົດ 2017 ທີ່ຜ່ານມາ. ອີກທັງການປະກອບສ່ວນດ້ານການປະສານງານ ໃນການເປັນເຈົ້າພາບຈັດກອງປະຊຸມສຸດຍອດອາຊຽນຂອງຟີລິບປິນ ໃນປີ 2017 ໄດ້ຮັບໝາກຜົນຢ່າງຈົບງາມ.
ທ່ານທູດ ໂພໄຊ ໄຂຄຳພິທູນ ກໍ່ໄດ້ສະແດງຄວາມຂອບໃຈ ຕໍ່ການຕ້ອນຮັບ ການເຂົ້າຢ້ຽມຂໍ່ານັບອຳລາໃນຄັ້ງນີ້ຢ່າງອົບອຸ່ນ, ສະແດງຄວາມຂອບໃຈຕໍ່ການຮ່ວມມື ແລະ ການສະໜັບສະໜູນ ໃນການປະຕິບັດໜ້າທີ່ວຽກງານ ແລະ ຊົມເຊີຍຕໍ່ຜົນສຳເລັດຂອງການເປັນເຈົ້າພາບໃນການຈັດກອງປະຊຸມສຸດຍອດອາຊຽນ 2017, ທ່ານທູດ ຍັງໄດ້ເນັ້ນເຖິງການຮ່ວມມືຂອງສອງຝ່າຍ ທີ່ມາເຖີງປະຈຸບັນ ເຫັນວ່າ ກໍາລັງຢູ່ໃນໄລຍະແຕກດອກອອກຜົນ, ໂດຍສະເພາະການເຊັນສັນຍາຮ່ວມມືໃນກອບສອງຝ່າຍ ທາງດ້ານການສຶກສາ, ກະສິກໍາ ແລະ ອື່ນໆ. ພ້ອມນີ້, ທ່ານທູດ ກໍ່ໄດ້ຖືໂອກາດນີ້ ນຳເອົາຄໍາເຊື້ອເຊີນຂອງ ພະນະທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວ ເພື່ອເຊື້ອເຊີນ ພະນະທ່ານ Rodrigo Roa Duterte ໄປຢ້ຽມຢາມ ສປປ ລາວ ຢ່າງເປັນທາງການ ໃນປີ 2019, ເຊີ່ງ ພະນະທ່ານ Rodrigo Roa Duterte ກໍ່ໄດ້ສະແດງຄວາມຂອບໃຈ ຕໍ່ໍການເຊີນ ແລະ ຍັງໄດ້ຝາກຄໍາເຊື້ອເຊີນເຖິງ ພະນະທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວ, ມາຢ້ຽມຢາມຟີລິບປິນ ໃນໂອກາດອັນເໝາະສົມ.
ໃນໂອກາດດຽວກັນນີ້, ສອງຝ່າຍຍັງໄດ້ປືກສາຫາລືກັນ ກ່ຽວກັບ ການເສີມຂະຫຍາຍການພົວພັນຮ່ວມມືສອງຝ່າຍ ລະຫວ່າງ ລາວ-ຟີລິບປິນ, ໂດຍສະເພາະທາງດ້ານເສດຖະກິດ ແລະ ປະຊາຊົນສູ່ປະຊາຊົນ ໃຫ້ກ້ວາງອອກຕື່ມ.
ໃນຕອນທ້າຍ, ພະນະທ່ານ Rodrigo Roa Duterte ກໍ່ໄດ້ມອບຫຼຽນຄໍາ ກຽດຕິຄຸນສຸງສຸດ ຫຼື Na May Ranggong Datu (Grand Cross) ພ້ອມສາຍສະພາຍ ໃຫ້ແກ່ ທ່ານທູດ ໂພໄຊ ໄຂຄໍາພິທູນ, ເພື່ອຢັ້ງຢືນເຖີງຜົນງານ ແລະ ໝາກຜົນແຫ່ງການທຸ່ມເທເຫື່ອແຮງ-ສະຕິປັນຍາ ໃນການເສີມຂະຫຍາຍການພົວພັນຮ່ວມມືຂອງທັງສອງປະເທດ ໃນໄລຍະ 03 ປີ ທີ່ຜ່ານມາ ອັນໄດ້ເຮັດໃຫ້ສອງຝ່າຍມີໂສມໜ້າໃໝ່ແຫ່ງການພົວພັນຂອງທັງສອງປະເທດ.