ໃນວັນທີ 29 ສິງ​ຫາ 2018, ທີ່ ທຳ​ນຽບ​ລັດ​ຖະ​ບານ, ນະຄອນຫລວງ ແວວ​ລິງ​ຕັນ, ທ່ານ ສີສະຫວາດ ອິນພະຈັນ ໄດ້ຍື່ນສານຕາຕັ້ງຕໍ່ ພະນະທ່ານ ນາງ ດາມ ແພັດ​ຊີ ເຣດ​ດີ, ຜູ້ສໍາເລັດລາຊະການ ​ແຫ່ງ ນີວ​ຊີ​ແລນ ເພື່ອດໍາລົງຕໍາແໜ່ງເປັນ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສາ​ທາ​ລະ​ນະ​ລັດ ປະ​ຊາ​ທິ​ປະ​ໄຕ ປະ​ຊາ​ຊົນ​ລາວ ປະຈໍາ ນີວ​ຊີ​ແລນ, ໂດຍມີສຳນັກງານສະຖານທູດຕັ້ງຢູ່ ນະຄອນຫຼວງແຄນເບີຣາ.

ໃນໂອ​ກາດນີ້, ພະນະທ່ານ ນາງ ດາມ ແພັດ​ຊີ ເຣດ​ດີ, ຜູ້​ສຳ​ເລັດ​ຣາ​ຊະ​ການ ແຫ່ງ ນີວ​ຊີ​ແລນ​ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ຊົມເຊີຍທ່ານ ສີສະຫວາດ ອິນພະຈັນ ທີ່ໄດ້ຖືກແຕ່ງຕັ້ງເປັນ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈໍາ ​ນີວ​ຊີ​ແລນ. ທ່ານທູດລາວ ໄດ້ນໍາເອົາຄວາມຢ້ຽມຢາມຖາມຂ່າວອັນອົບອຸ່ນ ແລະ ພອນໄຊອັນປະເສີດຈາກ ພະນະທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວ ຝາກເຖິງ ພະ​ນະ​ທ່ານ​ ນາງ ດາມ ແພັດ​ຊີ ເຣດ​ດີ, ຜູ້ສໍາເລັດລາຊະການ ແຫ່ງ ນີວ​ຊີ​ແລນ ແລະ ສະ​ແດງ​ຄວາມ​ຂອບ​ໃຈ​ຢ່າງ​ຈິ​ໃຈ ຕໍ່​ການ​ຕ້ອນ​ຮັບ​ອັນ​ອົບ​ອຸ່ນ, ການ​ຈັດ​ພິ​ທີ​ຍື່ນ​ສານ​ຕາ​ຕັ້ງ ແລະ ຈັດ​ງານ​ລ້ຽງ​ຮັບ​ຮອງ ໃຫ້​ແກ່ບັນ​ດາ​ທູດຕ່າງ​ປະ​ເທດໃນ​ຄັ້ງ​ນີ້.

ພ້ອມ​ກັນ​ນີ້, ທ່ານທູດ ສີ​ສະ​ຫວາດ ອິນ​ພະ​ຈັນ ໄດ້ສະແດງຄວາມຍິນດີຕໍ່​ການ​ຮ່ວມ​ມື​ທີ່​ມີ​ຫມາກ​ຜົນ​ຂອງ​ສອງ​ປະ​ເທດ ໃນ​ກອບ​ສອງ​ຝ່າຍ ​ແລະ ຫລາຍ​ຝ່າຍ ໂດຍ​ສະ​ເພາະ​ແມ່ນ ໃນ​ກອບ​ອາ​ຊຽນ. ໃນ​ໂອ​ກາດນີ້, ທ່ານທູດກໍ​​ໄດ້ຕາງ​ຫນ້າ​ ລັດ​ຖະ​ບານ ແລະ ປະ​ຊາ​ຊົນ ​ແຫ່ງ ສ​ປ​ປ ລາວ ​ສະ​ແດງ​ຄວາມຂອບໃຈຕໍ່ລັດຖະບານ ກໍ່ຄືປະຊາຊົນນີວ​ຊີ​ແລນ ທີ່​ໄດ້ໃຫ້ການຊ່ວຍເຫລືອສະ​ຫນັບ​ສະ​ຫນູນ ສປປ ລາວ ​ໃນ​ໄລຍະ​ຜ່ານ​ມາ ອັນໄດ້ປະກອບສ່ວນເຂົ້າໃນການສ້າງສາພັດທະນາປະເທດ ແລະ ຫວັງ​ວ່າ ຈະ​ສືບ​ຕໍ່​ໄດ້​ຮັບ​ການ​ຊ່ວຍ​ເຫລືອ​ໃນ​ຊຸມ​ປີ​ຕໍ່​ຫນ້າ. ​ທ່ານທູດ ສີ​ສະ​ຫວາດ ອິນ​ພະ​ຈັນ ໄດ້​ສະ​ແດງ​ຄວາມ​ຂອບ​ໃຈ ນີວ​ຊີ​ແລນ ຕໍ່​ການ​ຊ່ວຍ​ເຫຼືອ​ບັນ​ເທົາ​ທຸກ​ໄພພິ​ບັດ​ນ້ຳ​ຖ້ວມ ​ທີ່ ສ​ປ​ປ ລາວ ໃນ​ເດືອນ​ກໍ​ລະ​ກົດ 2018.  ພະ​ນະທ່ານ ​ນາງ ດາມ ແພດ​ສີ ເຣດ​ດີ, ຜູ້ສໍາເລັດລາຊະການ ໄດ້​ກ່າວ​ວ່າ ສາຍ​ພົວ​ພັນສອງ​ຝ່າຍ ນີວ​ຊີ​ແລນ-ສ​ປ​ປ ລາວ ເປັນສາຍພົວ​ພັນ​ທີ່​ອົບ​ອຸ່ນ ແລະ ມີ​ຫມາກ​ຜົນ ແລະ ເຊື່ອ​ຫມັ້ນ​ວ່າ ສາຍ​ພົວ​ພັນ​ສອງ​ຝ່າຍ ຈະສືບຕໍ່​ຮັດ​ແຫນ້ນ ແລະ ຂະ​ຫຍາຍ​ຕົວ ໃນ​ອະ​ນາ​ຄົດ. ນີວ​ຊີ​ແລນ ໃຫ້​ຄວາມ​ສຳ​ຄັນ​ຢ່າງ​ຍິ່ງ ຕໍ່​ການ​ຮ່ວມ​ມື​ກັບ ອາ​ຊຽນ ແລະ ຖື ສ​ປ​ປ ລາວ ເປັນ​ຄູ່​ຮ່ວມ​ມື ແລະ ເພື່ອນ​ມິດ​ທີ່​ສຳ​ຄັນ ໃນ​ອາ​ຊຽນ.