ໃນຕອນເຊົ້າຂອງວັນທີ 20 ກັນຍາ 2018, ທີ່ ນະຄອນຫລວງແບກແລງ, ທ່ານ ພົມມາ ບຸດທະວົງ, ໄດ້ເຂົ້າຍື່ນສານຕາຕັ້ງຕໍ່ ພະນະທ່ານ ຝຣັງ-ວານເທີ ສະຕາຍມາຍເອີຣ, ປະທານາທິບໍດີ ແຫ່ງ ສາທາລະນະລັດ ສະຫະພັນເຢຍລະມັນ ເພື່ອດຳລົງຕໍາແໜ່ງເປັນເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈຳ ສາທາລະນະລັດ ສະຫະພັນເຢຍລະມັນ, ຊຶ່ງມີສຳນັກງານສະຖານເອກອັກຄະລັດຖະທູດຕັ້ງຢູ່ນະຄອນຫລວງແບກແລງ, ປະເທດເຢຍລະມັນ.
ໃນໂອກາດດັ່ງກ່າວ, ທ່ານ ພົມມາ ບຸດທະວົງ, ໄດ້ນຳເອົາຄວາມຢື້ຢາມຖາມຂ່າວອັັນອົບອຸ່ນພ້ອມດ້ວຍພອນໄຊອັນປະເສີດຂອງ ພະນະທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຝາກເຖິງ ພະນະທ່ານ ຝຣັງ-ວານເຕີ ສະຕາຍມາຍເອີຣ, ປະທານາທິບໍດີເຢຍລະມັນ ແລະ ປະຊາຊົນເຢຍລະມັນທຸກຖ້ວນໜ້າ.
ພະນະທ່ານ ຝຣັງ-ວານເທີ ສະຕາຍມາຍເອີຣ, ກໍ່ໄດ້ສະແດງຄວາມຊົມເຊີຍຕໍ່ ທ່ານ ພົມມາ ບຸດທະວົງ, ທີ່ໄດ້ຖືກແຕ່ງຕັ້ງໃຫ້ມາດຳລົງຕຳແໜ່ງ ເປັນເອກອັກຄະລັດຖະທູດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຄົນໃໝ່ ປະຈໍາ ສາທາລະນະລັດ ສະຫະພັນເຢຍລະມັນ ເພື່ອປະຕິບັດໜ້າທີ່ອັນຊົງກຽດ ແລະ ສູງສົ່ງ, ພ້ອມທັງອວຍພອນໃຫ້ທ່ານເອກອັກຄະລັດຖະທູດ ຈົ່ງປະສົບຜົນສຳເລັດ ໃນການເຄື່ອນໄຫວວຽກງານການທູດຂອງຕົນ. ພ້ອມດຽວກັນນີ້, ພະນະທ່ານ ປະທານາທິບໍດີຝຣັງ-ວານເຕີສະຕາຍ ມາຍເອີຣ ຍັງໄດ້ຝາກຄວາມຢື້ຢາມຖາມຂ່າວ ແລະ ຄວາມຜາສຸກມາຍັງພະນະທ່ານ ປະທານປະເທດ ບຸນຍັງ ວໍລະຈິດ ແລະ ປະຊາຊົນລາວ ນຳດ້ວຍ.
ໃນໂອກາດການຍື່ນສານ, ທ່ານທູດ ພົມມາ ບຸດທະວົງ ໄດ້ກ່າວສະແດງຄວາມຍີນດີ ຕໍ່ການພົວພັນອັນດີ, ການຮ່ວມມືອັນມີໝາກຜົນ ແລະ ມີຄວາມຕໍ່ເນື່ອງມາເປັນເວລາຍາວນານລະຫວ່າງສອງປະເທດ ຊຶ່ງໃນປີນີ້, ລາວ ແລະ ເຢຍລະມັນ ໄດ້ມີສາຍພົວພັນການທູດນຳກັນມາເປັນເວລາ 60 ປີ ແລະ ມີການພົວພັນຮ່ວມມືດ້ານ ເຕັກນິກ 55 ປີ. ທ່ານທູດ ພົມມາ ບຸດທະວົງ ໄດ້ຕາງໜ້າລັດຖະບານ ແລະ ປະຊາຊົນລາວ ກ່າວສະແດງຄວາມ ຂອບໃຈລັດຖະບານ ແລະ ປະຊາຊົນ ເຢຍລະມັນ ທີ່ ໄດ້ໃຫ້ການຊ່ວຍເຫຼືອລາວຕະຫລອດໄລຍະເວລາດັ່ງກ່າວ ແລະ ໂດຍສະເພາະ ຕໍ່ການຊ່ວຍເຫລືອບັນເທົາທຸກແກ່ ສປປ ລາວ ໃນການປົວແປງຊີວີດການເປັນຢູ່ຂອງປະຊາ ຊົນ ແລະ ການບູລະນະພື້ນຖານໂຄງລ່າງ ທີ່ໄດ້ຮັບຜົນກະທົບຢ່າງໜັກໜ່ວງ ຈາກອຸທົກກະໄພຢູ່ຫລາຍແຂວງ ຂອງລາວໃນປີນີ້.