ໃນຕອນເຊົ້າຂອງວັນທີ 30 ຕຸລາ 2018, ທ່ານ ອໍາໄພ ກິນດາວົງ, ໄດ້ເຂົ້າຍື່ນສານຕາຕັ້ງຕໍ່ ພະບາດສົມເດັດ ພະບໍຣົມມະນຽດ ໂນໂຣດົມ ສີຫາມຸນີ ພະມະຫາກະສັດ ແຫ່ງ ຣາຊະອານາຈັກ ກໍາປູເຈຍ ທີ່ພະຣາຊະວັງ ເພື່ອດໍາລົງຕໍາແໜ່ງເປັນ ເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຄົນໃໝ່ ປະຈໍາ ຣາຊະອານາຈັກ ກໍາປູເຈຍ ທີ່ມີສໍານັກງານຕັ້ງຢູ່ ນະຄອນຫຼວງພະນົມເປັນ.
ພາຍຫຼັງພິທີຍື່ນສານຕາຕັ້ງແລ້ວ, ທ່ານເອກອັກຄະລັດຖະທູດ ອໍາໄພ ກິນດາວົງ ໄດ້ມີໂອກາດນໍາຄວາມຢື້ຢາມຖາມຂ່າວອັນອົບອຸ່ນ ແລະ ພອນໃຊອັນປະເສີດຂອງ ພະນະທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວ ພ້ອມພັນລະຍາ ໄປຍັງພະບາດສົມເດັດ ພະບໍລົມມະນຽດ ໂນໂຣດົມ ສີຫາມຸນີ ພະມະຫາກະສັດ ແຫ່ງ ຣາຊະອານາຈັກກໍາປູເຈຍ ແລະ ພະມານດາຂອງພະອົງ ແລະ ໄປຍັງລັດຖະບານ ແລະ ປະຊາຊົນກໍາປູເຈຍ ທຸກທົ່ວໜ້າ. ພ້ອມດຽວກັນນັ້ນ, ກໍ່ໄດ້ເນັ້ນເຖິງສາຍພົວພັນ ແລະ ການຮ່ວມມືທີ່ດີງາມ ລະຫວ່າງ ສອງປະເທດ ລາວ ແລະ ຣາຊະອານາຈັກ ກໍາປູເຈຍ ໄດ້ມີການພົວພັນຮ່ວມມືນໍາກັນ ມາເປັນເວລາຍາວນານ, ເຊິ່ງໄດ້ສ້າງສາຍພົວພັນການທູດນໍາກັນ ໃນວັນທີ 15 ມີຖຸນາ 1956. ສອງປະເທດໄດ້ມີສະຖານເອກອັກຄະລັດຖະທູດຂອງຕົນ ປະຈໍາຢູ່ ນະຄອນຫຼວງ ຂອງກັນ ແລະ ກັນ. ການພົວພັນ ແລະ ການຮ່ວມມື ລະຫວ່າງ ສອງປະເທດ ລາວ ແລະ ກໍາປູເຈຍ ທັງຂອບສອງຝ່າຍ ແລະ ຫຼາຍຝ່າຍ ໄດ້ຮັບການປັບປຸງ ແລະ ພັດທະນາຢ່າງຕໍ່ເນື່ອງ, ມີຄວາມເຂົ້າອົກເຂົ້າໃຈ ເຊິ່ງກັນ ແລະ ກັນ ບົນພື້ນຖານຫຼັກການຢູ່ຮ່ວມກັນໂດຍສັນຕິ, ຊ່ວຍເຫຼືອເຊິ່ງກັນ ແລະ ກັນ ແລະ ຕ່າງຝ່າຍຕ່າງໄດ້ຮັບຜົນປະໂຫຍດ. ບັນດາຜູ້ນໍາຂັ້ນສູງຈາກສາຍ ພັກ-ລັດ ຈົນຮອດຂັ້ນທ້ອງຖິ່ນ ໄດ້ມີການແລກປ່ຽນການຢ້ຽມຢາມຊຶ່ງກັນ ແລະ ກັນປົກກະຕິ ເພື່ອເພີ່ມຄວາມເຂົ້າອົກເຂົ້າໃຈກັນ ພ້ອມທັງໄດ້ແລກປ່ຽນບົດຮຽນໃນການພັດທະນາປະເທດ, ແລກປ່ຽນທັດສະນະ ຕໍ່ສະພາບການສາກົນໃນແຕ່ລະໄລຍະ ແລະ ສະໜັບສະໜູນຊຶ່ງກັນ ແລະ ກັນ. ພ້ອມນັ້ນ, ທາງພາກເອກະຊົນ, ນັກທຸລະກິດ, ພໍ່ຄ້າຊາວຂາຍ ແລະ ປະຊາຊົນຂອງສອງປະເທດ ໂດຍສະເພາະຕາມບໍລິເວນຊາຍແດນ ກໍ່ໄດ້ມີການຄ້າຂາຍ ແລະ ໄປມາຫາສູ່ກັນເປັນປົກກະຕິ. ຍ້ອນການໄປມາຫາສູ່ຂອງປະຊາຊົນສອງຊາດ ໂດຍສະເພາະ ແມ່ນປະຊາຊົນ ທີ່ອາໃສຢູ່ລຽບຕາມບໍລິເວນຊາຍແດນ ນັບມື້ມີຈໍານວນເພີ່ມຂື້ນ, ໃນປີ 2016 ສອງຝ່າຍຈຶ່ງໄດ້ຕົກລົງກັນ ເປີດສະຖານກົງສູນໃຫຍ່ຂອງຕົນ, ເຊິ່ງຝ່າຍລາວ ຕັ້ງຢູ່ແຂວງຊຽງແຕງ ແລະ ຝ່າຍກໍາປູເຈຍ ຕັ້ງຢູ່ນະຄອນປາກເຊ. ນອກນັ້ນ, ສອງປະເທດ ກໍ່ໄດ້ມີການຮ່ວມລົງນາມສັນຍາ ແລະ ບົດບັນທຶກໃນຂະແໜງການຕ່າງໆ ຮ່ວມກັນຫຼາຍສະບັບ.
ພະບາດສົມເດັດ ພະມະຫາກະສັດ ແຫ່ງ ຣາຊະອານາຈັກກໍາປູເຈຍ ກໍ່ໄດ້ຝາກຄວາມຂອບໃຈຢ່າງຈິງໃຈມາຍັງ ທ່ານປະທານປະເທດ ແຫ່ງ ສປປ ລາວ, ລັດຖະບານ ລາວ ແລະ ປະຊາຊົນລາວ ຕໍ່ຄວາມຢື້ຢາມຖາມຂ່າວ ແລະ ພອນໄຊອັນປະເສີດດັ່ງກ່າວ ແລະ ໄດ້ກ່າວເນັ້ນເຖິງ ສາຍພົວພັນ ແລະ ການຮ່ວມມືອັນດີງາມ ຕະຫຼອດມາຂອງສອງປະເທດ ຈະສືບຕໍ່ໄດ້ຮັບການບູລະນະຂື້ນໄປເລື້ອຍໆ ຕາມຄວາມໝຸ້ງມາດປາດຖະໜາ ຂອງປະຊາຊົນສອງຊາດ ລາວ ແລະ ກໍາປູເຈຍ.