ໃນຕອນເຊົ້າຂອງວັນທີ 18 ພະຈິກ 2018, ທີ່ ນະຄອນຫລວງມົດສະກູ, ກອງປະຊຸມໃຫຍ່ ຄັ້ງທີ 3 ຂອງຫນ່ວຍຊາວຫນຸ່ມສະຖານທູດລາວ ໄດ້ໄຂຂຶ້ນຢ່າງເປັນທາງການໂດຍການເຂົ້າຮ່ວມຂອງ ເລາຂາຫນ່ວຍພັກ, ປະທານສະຫະພັນແມ່ຍິງ, ປະທານອົງການຈັດຕັ້ງກໍາມະບານ, ເລຂາຊາວຫນຸ່ມປະຈໍາສະຖານທູດລາວເຮົາ ແລະ ຊາວຫນຸ່ມນັກສຶກສາລາວທີ່ກໍາລັງຮຽນ ຢູ່ ສະຖາບັນການສຶກສາຊັ້ນສູງ ໃນນະຄອນຫລວງມົດສະກູ.
ໃນພິທີ, ນອກຈາກເຄົາລົບທຸງຊາດ, ສະຫາຍ ອະໄພສິນ ໄຊຍະຖາ, ເລຂາຊາວຫນຸ່ມ ໄດ້ຜ່ານບົດສະຫລຸບຕີລາຄາ ການເຄື່ອນໄຫວວຽກງານຮອບດ້ານຂອງອົງການຈັດຕັ້ງຊາວຫນຸ່ມສະຖານທູດລາວ ໃນໄລຍະ 1 ປີຜ່ານມາ ແລະ ທັງໄດ້ສະເຫນີທິດທາງແຜນການເຄື່ອນໄຫວຂອງຫນ່ວຍຊາວຫນຸ່ມຂອງຕົນ ໃນຊຸມປີຕໍ່ຫນ້າ. ໃນບົດສະຫລຸບດັ່ງກ່າວ ຍັງໄດ້ຍົກໃຫ້ເຫັນຜົນງານຂອງຫນ່ວຍຊາວຫນຸ່ມສະຖານທູດໃນຫລາຍດ້ານທີ່ຍາດມາໄດ້, ເປັນຕົ້ນ: ການສອບເສັງຈົບຊັ້ນຂອງນັກສຶກສາໃນລະດັບປະລິນຍາຕີ ແລະ ປະລິນຍາໂທ ໄດ້ສໍາເລັດຕາມຄາດຫມາຍ; ການອອກແຮງງານລວມຫມູ່ ຂອງອົງການຈັດຕັ້ງຊາວຫນຸ່ມສະຖານທູດ ໃນໂອກາດວັນສໍາຄັນຂອງຊາດ ແລະ ການປະກອບສ່ວນຂອງຊາວຫນຸ່ມນັກສຶກສາລາວ ເຂົ້າໃນວຽກງານລວມຂອງສະຖາບັນການສຶກສາຂອງປະເທດເຈົ້າພາບ. ນອກນີ້, ຍັງຍົກໃຫ້ເຫັນຈຸດອ່ອນ ແລະ ຂໍ້ຄົງຄ້າງຂອງນັກສຶກສາເຮົາຈໍານວນຫນຶ່ງ ທີ່ບໍ່ເອົາໃຈໃສ່ຕໍ່ການຮຽນຂອງຕົນ, ຂາດຮຽນ, ເສັງບໍ່ຜ່ານ ແລະ ຖືກໄລ່ອອກຊຶ່ງບັນຫາເຫລົ່ານີ້ຖືວ່າ ຍັງເປັນສິ່ງທ້າທາຍໃນປັດຈຸບັນ ຕໍ່ກັບນັກສຶກສາລາວເຮົາທີ່ກໍາລັງຮຽນ ໃນສະຖາບັນການສຶກສາຕ່າງໆ ທີ່ ສ.ຣັດເຊຍ. ຄຽງຄູ່ກັນນັ້ນ, ກໍເປັນຫນ້າສັນລະເສີນ ແລະ ຊົມເຊີຍ ບັນດານັກສຶກສາລາວທີ່ມາຮຽນດ້ານການທະຫານ ລ້ວນແລ້ວແຕ່ ຮຽນດີ, ຮຽນເກັ່ງ ແລະ ສໍາເລັດການສຶກສາເປັນຢ່າງດີໂດຍບໍ່ມີຜູ້ໃດເສັງບໍ່ຜ່ານ ຫລື ຖືກໄລ່ອອກ ຖ້າທຽບໃສ່ນັກສຶກສາທົ່ວໄປທີ່ໄດ້ຮັບທຶນຈາກລັດຖະບານຣັດເຊຍ ໃນແຕ່ລະປີ.
ນອກຈາກນີ້, ທີ່ກອງປະຊຸມໃຫຍ່ ຍັງໄດ້ມີການຂຶ້ນກ່າວອໍາລາຂອງຄະນະຫນ່ວຍຊາວຫນຸ່ມຊຸດເກົ່າ ແລະ ໄດ້ປ່ອນບັດເລືອກເອົາຄະນະຫນ່ວຍຊາວຫນຸ່ມຊຸດໃຫມ່ ໂດຍໄດ້ນໍາສະເຫນີມາດຖານ, ເງື່ອນໄຂ ແລະ ຊື່ຂອງຜູ້ລົງສະຫມັກ ຈໍານວນ 5 ສະຫາຍ, ແຕ່ໄດ້ເລືອກເອົາແຕ່ 3 ສະຫາຍ.
ພາຍຫລັງເລືອກເອົາຄະນະຫນ່ວຍຊາວຫນຸ່ມຊຸດໃຫມ່ສໍາເລັດແລ້ວ, ສະຫາຍ ສີວຽງເພັດ ເພັດວໍລະສັກ, ເລຂາຫນ່ວຍພັກສະຖານທູດ ໄດ້ຂຶ້ນກ່າວສະແດງຄວາມຍ້ອງຍໍ, ຊົມເຊີຍຜົນງານຂອງຄະນະຊາວຫນຸ່ມຊຸດເກົ່າຜ່ານມາ ແລະ ຊົມເຊີຍຄະນະຫນ່ວຍຊາວຫນຸ່ມຊຸດໃຫມ່ຂອງສະຖານທູດ, ພ້ອມທັງຮຽກຮ້ອງໃຫ້ນັກສຶກສາລາວທຸກຄົນ ຈົ່ງເອົາໃຈໃສ່ ສຶກສາຮໍ່າຮຽນ, ຮຽນໃຫ້ເກັ່ງ, ເສັງໃຫ້ໄດ້ ແລະ ຮຽນໃຫ້ສໍາເລັດ ເພື່ອກຽມພ້ອມອອກຮັບໃຊ້ປະເທດຊາດຂອງຕົນ.
ກອງປະຊຸມໃຫຍ່ຄັ້ງທີ 3 ຂອງຫນ່ວຍຊາວຫນຸ່ມສະຖານທູດລາວ ໄດ້ດໍາເນີນໄປເປັນເວລາ 2 ຊົ່ວໂມງ ແລະ ໄດ້ອັດລົງດ້ວຍຜົນສໍາເລັດຢ່າງຈົບງາມໂດຍມີຊາວຫນຸ່ມນັກສຶກສາລາວ ເຂົ້າຮ່ວມທັງຫມົດ 57 ສະຫາຍ, ໃນນັ້ນມີເພດຍິງ 14 ສະຫາຍ ທີ່ມາຈາກສະຖາບັນການສຶກສາຊັ້ນສູງ ໃນນະຄອນຫລວງມົດສະກູ. ປັດຈຸບັນ ນັກສຶກສາລາວທີ່ກໍາລັງຮຽນຢູ່ຣັດເຊຍ ມີຈໍານວນທັງຫມົດ 365 ຄົນ, ໃນນັ້ນມີເພດຍິງ 56 ຄົນ.