ໃນຕອນເຊົ້າຂອງວັນທີ 23 ທັນວາ 2018, ທ່ານ ອໍາໄພ ກິນດາວົງ, ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈໍາ ຣາຊະອານາຈັກ ກໍາປູເຈຍ, ທີ່ມີສໍານັກງານຕັ້ງຢູ່ນະຄອນຫຼວງພະນົມເປັນ ພ້ອມດ້ວຍພະນັກງານນັກການທູດ ໄດ້ໄປພົບປະໂອ້ລົມກັບບັນດານ້ອງໆນັກສຶກສາລາວ ທີ່ກໍາລັງສຶກສາຄົ້ນຄ້ວາຮໍ່າຮຽນຢູ່ນະຄອນຫຼວງພະນົມເປັນ, ຈໍານວນນັກສຶກສາທັງໝົດມີ 64 ຄົນ. ໃນນັ້ນ, ມີນັກສຶກສາຝ່າຍປົກຄອງ ຈໍານວນ 49 ຄົນ ແລະ ຝ່າຍກອງທັບ 15 ຄົນ, ຊຶ່ງເປັນທຶນແລກປ່ຽນ ລະຫວ່າງ ລັດຖະບານຂອງສອງປະເທດ ລາວ ແລະ ກໍາປູເຈຍ ປີລະ 10 ທຶນ ແລະ ເລີ້ມແຕ່ປີ 2019 ຈະເພີ້ມເປັນປີລະ 15 ທຶນ. ພິທີດັ່ງກ່າວໄດ້ຈັດຂື້ນຢູ່ຫ້ອງປະຊຸມ ທີ່ ຫໍພັກຂອງນັກສຶກສາຕ່າງປະເທດ. ໃນພິທີດັ່ງກ່າວ ໄດ້ມີຕາງໜ້າໃຫ້ຄະນະນັກສຶກສາຂື້ນສະຫຼຸບລາຍງານຫຍໍ້ສະພາບການຮຽນ ແລະ ການດໍາລົງຊີວິດປະຈໍາສົກປີ 2017-2018 ໃຫ້ທ່ານທູດ ແລະ ຄະນະນໍາສະຖານທູດໄດ້ຮັບຊາບ ໂດຍໄດ້ຍົກໃຫ້ເຫັນເຖິງຜົນສໍາເລັດໃນການສຶກສາຄົ້ນຄ້ວາຮໍ່າຮຽນໃນໄລຍະຜ່ານມາ. ໃນນັ້ນ, ກໍ່ໄດ້ສະແດງໃຫ້ເຫັນທາງດ້ານການເມືອງ-ແນວຄິດ, ດ້ານວິຊາສະເພາະ, ການເຄື່ອນໄຫວນອກຫຼັກສູດ ແລະ ຜົນງານຕ່າງໆ ທີ່ໄດ້ປະກອບສ່ວນເຄື່ອນໄຫວໃນໄລຍະຜ່ານມາ ເວົ້າເຖິງຈຸດດີ, ຈຸດອ່ອນ, ຂໍ້ສະດວກ, ຂໍ້ຫຍຸ້ງຍາກໃນການດໍາລົງຊີວິດໃນຫໍພັກ ແລະ ຂໍ້ສະເໜີອື່ນໆ ຜ່ານມາສະຖານທູດລາວ ກໍ່ໄດ້ເອົາໃຈໃສ່ສຶກສາອົບຮົມທາງດ້ານການເມືອງ-ແນວຄິດ ໃຫ້ຄໍາຕັກເຕືອນ ແລະ ຊ່ວຍເຫຼືອແກ້ໄຂຄວາມຫຍຸ້ງຍາກ ໃຫ້ແກ່ນັກສຶກສາໄດ້ຫຼາຍດ້ານ ເປັນຕົ້ນແມ່ນ ໄດ້ປະສານກັບກະຊວງສຶກສາຊາວໝຸ່ມ ແລະ ກິລາ ຂອງກໍາປູເຈຍ ເພື່ອເປັນການຊຸກຍູ້ສົ່ງເສີມດ້ານການສຶກສາຮໍ່າຮຽນ ໃຫ້ໄດ້ຮັບຜົນດີ.
ໃນໂອກາດດັ່ງກ່າວ, ທ່ານເອກອັກຄະລັດຖະທູດ ອໍາໄພ ກິນດາວົງ ໄດ້ໂອ້ລົມຕໍ່ນັກສືກສາລາວ ໃຫ້ເອົາໃຈໃສ່ຄົ້ນຄ້ວາຮໍ່າຮຽນປະຕິບັດລະບຽບວິໃນຂອງໂຮງຮຽນວາງອອກ ກໍ່ຄື ລະບຽບກົດໝາຍຂອງປະເທດກໍາປູເຈຍ ຢ່າງເຄັ່ງຄັດ ຮຽກຮ້ອງໃຫ້ບັນດານ້ອງນັກສຶກສາທັງໝົດ ໃຫ້ມີສະຕິຕໍ່ການຈັດຕັ້ງ ການເດີນທາງໄປ-ມາຕ້ອງມີການຄອບລາ ມີນໍ້າໃຈຊ່ວຍເຫຼືອເຊິ່ງກັນ ແລະ ກັນ ມີຄວາມສາມັກຄີຮັກແພງກັນ ຕັ້ງໜ້າຝຶກຝົນຫຼໍ່ຫຼອມຕົນເອງ ໃຫ້ມີຄຸນສົມບັດສິນທໍາປະຕິວັດ ເພື່ອກາຍເປັນມະຫາຊົນທີ່ກ້າວໜ້າ. ພ້ອມດຽວກັນນັ້ນ, ທ່ານທູດ ກໍ່ໄດ້ເວົ້າເຖິງການພົວພັນຮ່ວມມືທີ່ດີງາມ ລະຫວ່າງສອງປະເທດ ລາວ ແລະ ຣາຊະອານາຈັກ ກໍາປູເຈຍ ໂດຍຫຍໍ້ ທີ່ມີມູນເຊື້ອຄວາມສາມັກຄີມາແຕ່ດົນນານ ເປັນເພື່ອນບ້ານທີ່ດີນໍາກັນມາເປັນເວລາຍາວນານ, ເຊິ່ງໄດ້ສ້າງສາຍພົວພັນການທູດນໍາກັນ ໃນວັນທີ 15 ມີຖຸນາ 1956. ສອງປະເທດ ໄດ້ມີສະຖານເອກອັກຄະລັດຖະທູດຂອງຕົນປະຈໍາຢູ່ ນະຄອນຫຼວງຂອງກັນ ແລະ ກັນ ການພົວພັນ ແລະ ການຮ່ວມມື ລະຫວ່າງສອງປະເທດ ລາວ ແລະ ກໍາປູເຈຍ ທັງຂອບສອງຝ່າຍ ແລະ ຫຼາຍຝ່າຍ ໄດ້ຮັບການປັບປຸງ ແລະ ພັດທະນາຢ່າງຕໍ່ເນື່ອງ, ມີຄວາມເຂົ້າອົກເຂົ້າໃຈ ເຊິ່ງກັນ ແລະ ກັນ ບົນພື້ນຖານຫຼັກການຢູ່ຮ່ວມກັນໂດຍສັນຕິ, ຊ່ວຍເຫຼືອເຊິ່ງກັນ ແລະ ກັນ ແລະ ຕ່າງຝ່າຍຕ່າງໄດ້ຮັບຜົນປະໂຫຍດ.