ໃນຕອນເຊົ້າຂອງວັນທີ 22 ມັງກອນ 2019, ທີ່ອົງການສະຫະປະຊາຊາດ, ນະຄອນຫລວງວຽນ, ສາທາລະນະລັດໂອຕຣິດ, ທ່ານສີທົງຈິດໂຍທິນ, ເອກອັກຄະລັດຖະທູດ ໄດ້ຍື່ນສານແຕ່ງຕັ້ງຕໍ່ທ່ານ LI Yong, ຜູ້ອໍານວຍການໃຫຍ່ ອົງການສະຫະປະຊາຊາດ ເພື່ອການພັດທະນາອຸດສາຫະກໍາ (United Nations Industrial Development Organization)ເພື່ອດຳລົງຕຳແໜ່ງເປັນ ຜູ້ຕາງໜ້າຖາວອນ ແຫ່ງ ສປປ ລາວ ປະຈໍາ ອົງການ ສປຊ ເພື່ອການພັດທະນາອຸດສາຫະກໍາ (UNIDO).
ໃນໂອກາດດັ່ງກ່າວ, ທ່ານ ສີທົງ ຈິດໂຍທິນ ໄດ້ນຳເອົາຄວາມຢື້ຢາມຖາມຂ່າວອັນອົບອຸ່ນ ພ້ອມດ້ວຍພອນໄຊອັນປະເສີດ ແລະ ຄວາມຮັກແພງຖານເພື່ອນມິດຈາກ ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ສົ່ງເຖິງ ທ່ານ LI Yong ແລະ ຜ່ານທ່ານໄປຍັງການນໍາ ແລະ ພະນັກງານອົງການ ສປຊ ເພື່ອການພັດທະນາອຸດສະຫະກໍາ.
ໃນໂອກາດນີ້, ທ່ານເອກອັກຄະລັດຖະທູດ, ຜູ້ຕາງໜ້າຖາວອນລາວ ໄດ້ສະແດງຄວາມຂອບໃຈ ແລະ ຕີລາຄາສູງຕໍ່ການຊ່ວຍເຫຼືອ ແລະ ສະໜັບສະໜູນ ສປປ ລາວ ນັບຕັ້ງແຕ່ ລາວໄດ້ເຂົ້າເປັນສະມາຊິກ UNIDO ໃນວັນທີ 3 ກັນຍາ 1985 ເປັນຕົ້ນມາ ແລະ ໄດ້ເໜີໃຫ້ສືບຕໍ່ເສີມຂະຫຍາຍສາຍພົວພັນ ແລະ ການຮ່ວມມືອັນດີໃຫ້ມີການເຕີບໃຫຍ່ຂະຫຍາຍຕົວຍິ່ງໆຂຶ້ນໄປໃນຕໍ່ໜ້າ. ພ້ອມນັ້ນ, ຜູ້ຕາງໜ້າຖາວອນ ຍັງໄດ້ເຊື້ອເຊີນ ທ່ານ LI Yong ໄປຢ້ຽມຢາມ ສປປ ລາວ ໃນໂອກາດອັນເໝາະສົມ.
ໃນໂອກາດດັ່ງກ່າວ, ທ່ານ LI Yong ກໍໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍຕໍ່ ທ່ານ ສີທົງ ຈິດໂຍທິນ ໃນການມາດໍາລົງຕໍາແໜ່ງເປັນຜູ້ຕາງໜ້າຖາວອນ ແຫ່ງ ສປປ ລາວ ຄົນໃໝ່ ປະຈຳ ອົງການ UNIDO ແລະ ພ້ອມທີ່ຈະໃຫ້ການຮ່ວມມືເພື່ອປະຕິບັດໜ້າທີ່ການທູດຫຼາຍຝ່າຍດ້ວຍຜົນສຳເລັດ ແລະ ສົ່ງເສີມການພົວພັນຮ່ວມມືລະຫວ່າງ ສປປ ລາວ ແລະ ອົງການ UNIDO ໃຫ້ຂະຫຍາຍຕົວຢ່າງຕໍ່ເນື່ອງ. ນອກຈາກນີ້, ທ່ານ ຍັງໄດ້ກ່າວເຖິງການຮ່ວມມືກັບ ອາຊຽນ ທີ່ໄດ້ມີການເຊື້ອເຊີນ ອົງການ ສປຊ ເພື່ອການພັດທະນາອຸດສາຫະກໍາ ເຂົ້າເປັນຄູ່ຮ່ວມພັດທະນາ ແລະ ເຂົ້າຮ່ວມກອງປະຊຸມສໍາຄັນ ແລະ ກິດຈະກໍາທີ່ສໍາຄັນຕ່າງໆຂອງ ອາຊຽນ ໃນປະຈຸບັນ ແລະ ຕໍ່ໜ້າ.