ໃນຕອນບ່າຍວັນທີ 23 ມັງກອນ 2019, ສະຖານທູດໄດ້ຕາງຫນ້າໃຫ້ ສູນກາງແນວລາວສ້າງຊາດ ຈັດພິທີມອບໃບຍ້ອງຍໍໃຫ້ແກ່ບັນດາບຸກຄົນ ແລະ ອົງການຕ່າງໆ ຂອງ ສ.ເກົາຫລີ ທີ່ໄດ້ປະກອບສ່ວນຊ່ວຍເຫລືອຢາປົວພະຍາດ ແລະ ອຸປະກອນການແພດ ລວມມູນຄ່າປະມານ 620.406.704 ວອນ ຫລື ປະມານ 550.000 ໂດລາ ສະຫະລັດ ໃຫ້ແກ່ເມືອງສະຫນາມໄຊ, ແຂວງອັດຕະປື. ການຊ່ວຍເຫລືອດັ່ງກ່າວແມ່ນມູນນິທິ Korea Love Sharing Community ແລະ ມູນນິທິ Good Partners ໄດ້ຮ່ວມກັນລະດົມການປະກອບສ່ວນຈາກບຸກຄົນ ແລະ ອົງການຕ່າງໆດັ່ງກ່າວ, ເຊິ່ງເຄື່ອງຊ່ວຍເຫລືອແມ່ນໄດ້ສົ່ງໄປລາວແລ້ວ ໂດຍຜ່ານ ສູນກາງແນວລາວສ້າງຊາດ ໃນເດືອນພະຈິກ 2018 ທີ່ຜ່ານມາ ເພື່ອນຳໄປມອບຕໍ່ໃຫ້ເມືອງສະຫນາມໄຊ.
ພິທີດັ່ງກ່າວນີ້ໄດ້ຈັດຂຶ້ນຢູ່ທີ່ສະຖານທູດລາວ ທີ່ ເຊອູນ, ໂດຍຕາງຫນ້າໃຫ້ສະຖານທູດມອບໃບຍ້ອງຍໍແມ່ນ ທ່ານ ຄຳສວຍ ແກ້ວດາລາວົງ, ເອກອັກຄະລັດຖະທູດລາວ ປະຈຳ ສ.ເກົາຫລີ, ບັນດາອົງການ ແລະ ບຸກຄົນທີ່ໄດ້ຮັບໃບຍ້ອງຍໍໃນຄັ້ງນີ້ ປະກອບມີ 17 ພາກສ່ວນ (ໃນນັ້ນມອບໃຫ້ບຸກຄົນ 3 ທ່ານ) ຄື: ທ່ານ ລີ ອຶນ ດຸກ (Lee Eun Duk), ປະທານ ແລະ ທ່ານທີ່ປຶກສາຂອງມູນນິທິ Korean Love Sharing Community; ຜູ້ອຳນວຍການຂອງມູນນິທິ Good Partners; ບໍລິສັດ Dongkook Pharm Co., Ltd; United Methodist Committee on Relief (UMCOR); Korea Arlico Pharm Co., Ltd; Korea Foundation for International Healthcare (KOFIH); Hankook Korus Pharm Co., Ltd; Ildong Pharm Co., Ltd; CMG Pharm Co., Ltd; Sowha Inc.; The Korea Society-system Pharmacist; Global Community Health & Welfare Foundation; Kukbo Science Co., Ltd; Samsung Fogger & Sparayer; National Assembly Member’s Study Group, Global Community Health & Welfare Forum; JW Pharm Co., Ltd ແລະ JYP Hopital.