ໃນອາທິດຜ່ານມາ, ໃນໂອກາດປີໃຫມ່ຂອງ ສສ.ຫວຽດນາມ ໃກ້ຈະຫມູນວຽນມາເຖິງ, ທ່ານທູດ ສີວຽງເພັດ ເພັດວໍລະສັກ ພ້ອມດ້ວຍພະນັກງານສະຖານທູດ ໄດ້ເຂົ້າອວຍພອນ ທ່ານທູດ Ngo Duc Manh ແລະ ພະນັກງານ ທີ່ ສໍານັກງານສະຖານທູດຫວຽດນາມ ປະຈໍາ ສະຫະພັນ ຣັດເຊຍ.
ໃນໂອກາດພົບປະກັນ, ທູດເຮົາໄດ້ອວຍພອນໃຫ້ທູດຫວຽດນາມພ້ອມຄອບຄົວ ແລະ ພະນັກງານທັງຫມົດຂອງສະຖານທູດ ຈົ່ງມີແຕ່ພະລານາໄມສົມບູນ ແລະ ມີຜົນສໍາເລັດໃຫມ່ຍິ່ງໃຫຍ່ກວ່າເກົ່າ ໃນໂອກາດປີໃຫມ່ປະຈໍາຊາດຂອງເພິ່ນ. ທູດເຮົາໄດ້ຕາງຫນ້າໃຫ້ ລັດຖະບານ ແລະ ປະຊາຊົນລາວ ສະແດງຄວາມຂອບໃຈ ລັດຖະບານ ແລະ ປະຊາຊົນຫວຽດນາມອ້າຍນ້ອງ ທີ່ໄດ້ໃຫ້ການຊ່ວຍເຫລືອອັນລໍ້າຄ່າ ແກ່ພາລະກິດຕໍ່ສູ້ຂອງປະຊາຊົນລາວ ເພື່ອເອກະລາດແຫ່ງຊາດ ໃນໄລຍະສົງຄາມຮຸກຮານຂອງຈັກກະພັດ ແລະ ໃນໄລຍະສ້າງສາພັດທະນາປະເທດຊາດຂອງຕົນໃນປັດຈຸບັນ ແລະ ທູດເຮົາຍັງໄດ້ຫວນຄືນ ສາຍພົວພັນມິດຕະພາບອັນເປັນມູນເຊື້ອ ແລະ ຄວາມສາມັກຄີແບບພິເສດ ລະຫວ່າງ ສປປ ລາວ ແລະ ສສ ຫວຽດນາມຊຶ່ງຜູ້ນໍາ ແລະ ປະຊາຊົນຂອງສອງປະເທດພ້ອມກັນຮັກສາ ແລະ ຖະນຸຖະຫນອມສາຍພົວພັນອັນເປັນມູນເຊື້ອດັ່ງກ່າວຕະຫລອດມາ, ໂດຍສະເພາະຜົນງານອັນໃຫຍ່ຫລວງ ແລະ ຄຸນງາມຄວາມດີອັນຍິ່ງໃຫຍ່ ຂອງທ່ານປະທານ ໄກສອນ ພົມວິຫານ ແລະ ທ່ານ ປະທານ ໂຮ່ຈິມີງ ເພື່ອຮ່ວມກັນ ເພິ່ມພູນຄູນສ້າງສາຍພົວພັນມິດຕະພາບອັນເປັນມູນເຊື້ອ ແລະ ຄວາມສາມັກຄີແບບພິເສດ ລະຫວ່າງ ປະຊາຊົນສອງຊາດອ້າຍນ້ອງ ໃຫ້ນັບມື້ນັບຂະຫຍາຍຕົວຍິ່ງໆຂຶ້ນ.
ທ່ານທູດ ຫວຽດນາມ ໄດ້ຕາງຫນ້າໃຫ້ລັດຖະບານ ແລະ ປະຊາຊົນຫວຽດນາມ ສະແດງຄວາມຂອບໃຈຢ່າງຈິງໃຈຕໍ່ຄໍາອວຍພອນຂອງສະຖານທູດເຮົາ, ທັງໄດ້ສະແດງຄວາມເປັນເອກະພາບກັບການຕີລາຄາຂອງທູດເຮົາ ກ່ຽວກັບ ສາຍພົວພັນມິດຕະພາບອັນເປັນມູນເຊື້ອ ແລະ ຄວາມສາມັກຄີແບບພິເສດລະຫວ່າງສອງປະເທດ ຊຶ່ງໄດ້ກາຍເປັນຕົວແບບທີ່ດີເລີດໃຫ້ແກ່ປະເທດອື່ນໃນໂລກ ແລະ ທັງໄດ້ອວຍພອນໃຫ້ ສປປ ລາວ ອ້າຍນ້ອງ ສືບຕໍ່ຍາດໄດ້ໄຊຊະນະໃຫມ່ຍິ່ງໃຫຍ່ກວ່າເກົ່າໃນພາລະກິດແຫ່ງການສ້າງສາພັດທະນາປະເທດຊາດ ພາຍໃຕ້ການນໍາພາອັນສະຫລາດສ່ອງໄສຂອງພັກປະຊາຊົນປະຕິວັດລາວ.
ການພົບປະໃນຄັ້ງນີ້ແມ່ນເຕັມໄປດ້ວຍບັນຍາກາດແຫ່ງຄວາມສະຫນິດສະຫນົມຖານອ້າຍນ້ອງ, ນໍ້າໃຈມິດຕະພາບອັນເປັນມູນເຊື້ອ ແລະ ຄວາມສາມັກຄີແບບພິເສດ ລະຫວ່າງ ສປປ ລາວ ແລະ ສສ ຫວຽດນາມເວົ້າລວມ ແລະ ເວົ້າສະເພາະ ລະຫວ່າງ ສະຖານທູດລາວ ແລະ ສະຖານທູດຫວຽດນາມ ປະຈໍາ ສະຫະພັນ ຣັດເຊຍ.