ໃນວັນທີ 1 ກຸມພາ 2019 ຜ່ານມາ, ສະຖານເອກອັກຄະລັດຖະທູດ ແຫ່ງ ສປປ ລາວ ປະຈໍາ ສ. ຣັດເຊຍ ໄດ້ຈັດໃຫ້ມີການຈັດປາຖະກະຖາ ເພື່ອສະເຫຼີມສະຫຼອງວັນສ້າງຕັ້ງກຳມະບານລາວ ຄົບຮອບ 63 ປີ (01 ກຸມພາ 1956 – 01 ກູມພາ 2019)ຂື້ນ, ຊື່ງໃຫ້ກຽດເຂົ້າຮ່ວມໃນພິທີດັ່ງກ່າວ ມີສະຫາຍ ສີວຽງເພັດ ເພັດວໍຣະສັກ, ເລຂາຄະນະຫນ່ວຍພັກ, ເອກອັກຄະລັດຖະທູດຜູ້ມີອຳນາດເຕັມ ແຫ່ງ ສປປ ລາວ ປະຈໍາ ສ. ຣັດເຊຍ, ສະຫາຍ ລຽນທອງ ສຸພານີ, ຫົວຫນ້າໜ່ວຍກໍາມະບານ, ທີ່ປຶກສາດ້ານເສດຖະກີດ-ການຄ້າ, ມີຄະນະນໍາສະຖານທູດ, ຕາງໜ້າໜ່ວຍຊາວໜຸ່ມ ແລະ ໜ່ວຍສະຫະພັນແມ່ຍິງ, ສະມາຊິກກໍາມະບານ, ພະນັກງານຕະຫຼອດຮອດຄອບຄົວຂອງພະນັກງານສະຖານທູດ, ມີຫົວຫນ້າສະມາຄົມນັກສຶກສາລາວ ແລະ ສະມາຊິກກໍາມະບານນັກສຶກສາ ທີ່ມົດສະກູ ເຂົ້່າຮ່ວມທັງໝົດ 30 ທ່ານ, ໃນນັ້ນຍິງ 10 ທ່ານ.
ໃນພິທີ, ສະຫາຍ ລຽນທອງ ສຸພານີ, ຫົວຫນ້າໜ່ວຍກໍາມະບານ, ທີ່ປຶກສາດ້ານເສດຖະກີດ-ການຄ້າ ກໍໄດ້ໃຫ້ກຽດປາຖະກະຖາເລົ່າມູນເຊື້ອ 63 ປີ ແຫ່ງການກຳເນີດ ແລະ ເຕີບໃຫຍ່ຂະຫຍາຍຕົວ ຂອງອົງການຈັດຕັ້ງກຳມະບານລາວ ຕໍ່ສະມາຊິກກຳມະບານ, ພະນັກງານ-ລັດຖະກອນ ຂອງສະຖານທູດ, ສະມາຊິກກຳມະບານນັກສຶກສາ ແລະ ຕໍ່ຜູ້ເຂົ້າຮ່ວມຮັບຟັງທັງຫມົດ ເພື່ອຮັບຮູ້ເຂົ້າໃຈເຖິງເງື່ອນໄຂ, ສະພາບແວດລ້ອມ ແລະ ຕົ້ນກຳເນີດຂອງອົງການຈັດຕັ້ງກຳມະບານລາວ, ຊຶ່ງໄດ້ກໍາເນີດເກີດຂຶ້ນຈາກຂະບວນການຕໍ່ສູ້ຢ່າງພິລະອາດຫານບໍ່ຍອມຈໍານົນ ຂອງບັນດາບັນພະບູລຸດລາວ, ກຳມະກອນ ແລະ ຊາວຜູ້ອອກແຮງງານລາວ ຕິດພັນກັບການຕໍ່ສູ້ຕ້ານຈັກກະພັດລ່າເມືອງຂື້ນແບບເກົ່າ ແລະ ໃຫມ່ ພາຍໃຕ້ການນຳພາອັນສະຫຼາດສ່ອງໃສຂອງ ພັກປະຊາຊົນ ປະຕິວັດລາວ ຈົນເຮັດໃຫ້ໄດ້ຮັບໄຊຊະນະເປັນກ້າວໆມາ ແລະ ອົງການກຳມະບານລາວ ກໍໄດ້ຮັບການສ້າງຕັ້ງຂື້ນ ໃນວັນທີ 01 ກຸມພາ 1956.
ສະຫາຍ ລຽນທອງ ສຸພານີ ຍັງໄດ້ເໜັ້ນເຖິງຂະບວນການເຕີບໃຫຍ່ຂະຫຍາຍຕົວ ຂອງອົງການຈັດຕັ້ງກໍາມະບານລາວ, ຊຶ່ງໄດ້ສຶບຕໍ່ເອົາໃຈໃສ່ສ້າງຄວາມເຂັ້ມແຂງປັບປຸງປະລິມານ ແລະ ຄຸນນະພາບ ຂອງອົງການກຳມະບານລາວ ເຮັດໃຫ້ອົງການກຳມະບານລາວ ມີການເຕີບໃຫຍ່ຂະຫຍາຍຕົວໃນແຕ່ລະໄລຍະ ເປັນຕົ້ນ: ເກີດມິໜ່ວຍກຳມະບານຢູ່ແຕ່ລະອົງການຈັດຕັ້ງຂອງລັດ, ໂຮງຈັກໂຮງງານ ແລະ ຫົວໜວ່ຍການຜະລິດຕ່າງໆ ພ້ອມກັນນັ້ນ ກໍມີການເຄື່ອນໄຫວປຸກລະດົມຂົນຂວາຍລົງສູ່ຮາກຖານຢ່າງແຂງແຮງ ເພື່ອປົກປ້ອງສິດ ແລະ ຜົນປະໂຫຽດອັນຊອບທໍາຈາກຜູ້ໃຊ້ແຮງງານ ມາໃຫ້ກຳມະກອນ ແລະ ຊາວຜູ້ອອກແຮງງານລາວ.
ໃນຕອນທ້າຍຂອງພິທີ ຍັງໄດ້ຮັບກຽດໂອ້ລົມຕໍ່ປະຊຸມ ໂດຍ ສະຫາຍ ສີວຽງເພັດ ເພັດວໍຣະສັກ, ເລຂາຄະນະໜ່ວຍພັກ, ສະຖານເອກອັກຄະລັດຖະທູດ ແຫ່ງ ສປປ ລາວ ປະຈໍາ ສ. ຣັດເຊຍ, ຊື່ງ ສະຫາຍ ໄດ້ເໜັ້ນໜັກຄືນບາງເນື້ອໃນທີ່ສຳຄັນ ຂອງວັນສ້າງຕັ້ງສະຫະພັນກຳມະບານລາວດັ່ງກ່າວ ທີ່ຕິດພັນກັບໜ້າທີ່ການເມືອງ ຂອງສະມາຊິກພັກ, ສະມາຊິກກຳມະບານ, ພະນັກງານ-ລັດຖະກອນ ຂອງສະຖານເອກອັກຄະລັດຖະທູດ ແຫ່ງ ສປປ ລາວ ຕະຫຼອດຮອດນັກສຶກສາ ທີ່ມົດສະກູ ໃຫ້ເຂົ້າໃຈຢ່າງເລິກເຊິ່ງຂື້ນຕື່ມ. ນອກຈາກນັ້ນ, ສະຫາຍ ຍັງໄດ້ເນັ້ນໜັກໃຫ້ບັນດາກຳມະບານຂອງສະຖານທູດ ຈົ່ງຈັດຕັ້ງຜັນຂະຫຍາຍແນວທາງນະໂຍບາຍການຕ່າງປະເທດ ເພື່ອດູດດຶງການຮ່ວມມື ແລະ ການລົງທຶນໃຫ້ຫລາຍຂື້ນ. ໂດຍສະເພາະ ສະມາຊິກກຳມະບານທີ່ເປັນນັກສຶກສາ ໃຫ້ພ້ອມກັນເອົາໃຈໃສ່ຕັ້ງໜ້າຮໍ່າຮຽນໃຫ້ເກັ່ງເສັງໃຫ້ໄດ້ ພ້ອມທັງເປັນແບບຢ່າງໃຫ້ແກ່ມະຫາຊົນຢ່າງແທ້ຈິງ.
ການສະເຫຼີມສະຫຼອງໄດ້ສຳເລັດແລະປິດລົງໃນເວລາ16:30ໂມງຂອງວັນດຽວກັນຢ່າງຈົບງາມ.