ໃນຕອນເຊົ້າຂອງວັນທີ 04 ກຸມພາ 2019, ທີ່ ອົງການສະຫະປະຊາຊາດ, ນະຄອນຫລວງວຽນ, ສາທາລະນະລັດໂອຕຣິດ, ທ່ານ ສີທົງ ຈິດໂຍທິນ, ເອກອັກຄະລັດຖະທູດ ໄດ້ຍື່ນສານແຕ່ງຕັ້ງຕໍ່ ທ່ານ Lassina Zerbo, ຜູ້ອໍານວຍການໃຫຍ່ຂອງ ອົງການສົນທິສັນຍາ ວ່າດ້ວຍ ການຫ້າມການທົດລອງອາວຸດນິວເຄຣຍທຸກຮູບແບບ (Comprehensive Nuclear-Test-Ban Treaty Organization) ເພື່ອດຳລົງຕຳແໜ່ງເປັນ ຜູ້ຕາງໜ້າຖາວອນ ແຫ່ງ ສປປ ລາວ ປະຈໍາ ອົງການ CTBTO, ສປຊ.
ທ່ານ Lassina Zerbo ໄດ້ສະແດງຄວາມຊົມເຊີຍ ແລະ ຍິນດີຕ້ອນຮັບ ທ່ານ ສີທົງ ຈິດໂຍທິນ ໃນການມາດໍາລົງຕໍາແໜ່ງເປັນຜູ້ຕາງໜ້າຖາວອນ ແຫ່ງ ສປປ ລາວ ຄົນໃໝ່ ປະຈຳ ອົງການ CTBTO, ຊຶ່ງເປັນມິນິດໝາຍອັນດີໃຫ້ແກ່ການຮ່ວມມື ແລະ ເຮັດວຽກຮ່ວມກັນ ຂອງສອງຝ່າຍ ແລະ ອົງການພ້ອມທີ່ຈະໃຫ້ ການຮ່ວມມືກັນຢ່າງໃກ້ສິດໃນການປະຕິບັດໜ້າທີ່ໃຫ້ມີຜົນສຳເລັດ ແລະ ສອດຄ່ອງກັບຄວາມຕ້ອງການຂອງສະພາບການຕົວຈິງ ເພື່ອເພີມທະວີການພົວພັນຮ່ວມມືລະຫວ່າງ ສປປ ລາວ ແລະ ອົງການໃຫ້ຂະຫຍາຍ ຕົວຢ່າງຕໍ່ເນື່ອງ.
ທ່ານເອກອັກຄະລັດຖະທູດ, ຜູ້ຕາງໜ້າຖາວອນ ລາວໄດ້ສະແດງຄວາມຂອບໃຈຢ່າງຈິງໃຈ ຕໍ່ການຮ່ວມມື, ໃຫ້ການສະໜັບສະໜູນ ແລະ ຊ່ວຍເຫຼືອ ສປປ ລາວ ໃນຫຼາຍຂະແໜງການທີ່ກ່ຽວຂ້ອງກັບອົງການ ໂດຍສະເພາະ ການສ້າງຄວາມເຂັ້ມແຂງທາງດ້ານຊັບພະຍາກອນມະນຸດ ທີ່ໄດ້ສືບຕໍ່ໃຫ້ທຶນສະໜັບສະໜູນ ແກ່ບຸກຄະລາກອນຂອງລາວ ໃນການເຂົ້າຮ່ວມຝຶກອົບຮົມຕ່າງໆ ເຊັ່ນ: ການຝຶກອົບຮົມດ້ານຄວາມຮູ້ວິຊາການ ແລະ ເຕັກນິກໃນການນຳໃຊ້ເຄື່ອງມື ເພື່ອປະເມີນຜົນຖານຂໍ້ມູນ. ນັບຕັ້ງແຕ່ ສປປ ລາວ ໄດ້ເຂົ້າເປັນສະມາ ຊິກຂອງອົງການ ໃນວັນທີ 30 ກໍລະກົດ 1999 ເປັນຕົ້ນມາ ແລະ ເຊື່ອໝັ້ນວ່າ ການຮ່ວມມືຂອງສອງຝ່າຍຈະສືບຕໍ່ຂະຫຍາຍຕົວ ແລະ ເຮັດວຽກຮ່ວມກັນຢ່າງໃກ້ສິດໃນອານາຄົດຂ້າງໜ້າ.