ໃນລະຫວ່າງວັນທີ 11-14 ກຸມພາ 2019 ທີ່ຜ່ານມາ, ທ່ານ ພົນຕີ ຄໍາສີ ວົງຄໍາຊາວ, ຫົວໜ້າຫ້ອງວ່າການກະຊວງປ້ອງກັນປະເທດ, ຄະນະຊີ້ນໍາວຽກງານ MIA, ພ້ອມດ້ວຍຄະນະຈາກກະຊວງການຕ່າງປະເທດ ແລະ ກະຊວງປ້ອງກັນປະເທດໄດ້ເດີນທາງໄປຕິດຕາມການປະຕິບັດງານຮ່ວມໃນພາກສະໜາມລະຫວ່າງ ລາວ-ອາເມຣິກາ ໃນການສໍາຫຼວດ ແລະ ຂຸດຄົ້ນເພື່ອຊອກຫາຮ່ອງຮອຍ ແລະ ສິ່ງເສດເຫຼືອຂອງທະຫານອາເມຣິກາທີ່ຫາຍສາບສູນໃນປາງສົງຄາມຢູ່ລາວ, ຄັ້ງທີ 2 ປະຈໍາສົກປີ 2018-2019, ຢູ່ແຂວງຫົວພັນ.
ການເດີນທາງໄປຢ້ຽມຢາມຂອງຄະນະດັ່ງກ່າວໃນຄັ້ງນີ້ ແມ່ນເພື່ອເປັນການກະຕຸກຊຸກຍູ້ໃຫ້ກໍາລັງໃຈແກ່ອ້າຍເອື້ອຍນ້ອງທີ່ພວມປະຕິບັດໜ້າທີ່ຢູ່ສະໜາມ ແລະ ຖືໂອກາດລົງຕິດຕາມກວດກາສະພາບການປະຕິບັດງານຮ່ວມດ້ານມະນຸດສະທໍາລາວ-ອາເມຣິກາ ເພື່ອຊອກຫາສິ່ງເສດເຫຼືອຂອງທະຫານອາເມຣິກາທີ່ຫາຍສາບສູນໃນປາງສົງຄາມຢູ່ລາວ(MIA) ຕາມເງື່ອນໄຂ ແລະ ຄວາມອາດສາມາດຕົວຈິງຂອງຝ່າຍລາວ.
ໃນໂອກາດນີ້, ຄະນະກໍ່ໄດ້ໃຫ້ກຽດໂອ້ລົມບັນດາພະນັກງານວິຊາການຈາກກະຊວງການຕ່າງປະເທດ, ກະຊວງປ້ອງກັນປະເທດ ແລະ ອໍານາດການປົກຄອງທ້ອງຖິ່ນທີ່ກ່ຽວຂ້ອງ. ຫຼັງຈາກນັ້ນ, ຄະນະໄດ້ເຄື່ອນໄຫວຢ້ຽມຢາມຈຸດຂຸດຄົ້ນກໍລະນີ 0079, 0084 ເຂດບ້ານນາແທ່ນ ແລະ 0690 ເຂດບ້ານບັກ, ເມືອງວຽງໄຊ, ແຂວງຫົວພັນ, ຊຶ່ງໄດ້ຮັບການຕ້ອນຮັບຈາກທິມງານຮ່ວມລາວ-ອາເມຣິກາຢ່າງພ້ອມພຽງ ພ້ອມທັງໄດ້ຮັບຟັງການລາຍງານກ່ຽວກັບຂໍ້ສະດວກ ແລະ ຂໍ້ຫຍຸ້ງຍາກໃນການປະຕິບັດວຽກງານຢູ່ແຕ່ລະຈຸດຂຸດຄົ້ນຈາກຫົວໜ້າພາກສະໜາມຂອງທັງຝ່າຍລາວ ແລະ ອາເມຣິກາ. ການປະຕິບັດງານຮ່ວມສອງຝ່າຍໃນພາກສະໜາມຄັ້ງນີ້ກໍ່ຄືຫຼາຍຄັ້ງທີ່ຜ່ານມາ ໄດ້ດໍາເນີນດ້ວຍບັນຍາກາດອັນສ້າງສັນ ແລະ ປະສົບຜົນສໍາເລັດເປັນຢ່າງດີ.
ຕະຫຼອດໄລຍະ 3 ທົດສະວັດກວ່າທີ່ຜ່ານມາ, ລັດຖະບານກໍ່ຄືປະຊາຊົນລາວໄດ້ໃຫ້ການຮ່ວມມືເປັນຢ່າງດີເທົ່າທີ່ເປັນໄປໄດ້ໃນວຽກງານມະນຸດສະທໍາດັ່ງກ່າວ ແກ່ຝ່າຍສະຫະລັດ ອາເມຣິກາ, ແນໃສ່ຊອກຄົ້ນ ແລະ ນໍາເອົາສິ່ງເສດເຫຼືອຂອງທະຫານອາເມຣິກາທີ່ເສຍຊີວິດໃນປາງສົງຄາມຢູ່ລາວສົ່ງຄືນໃຫ້ຄອບຄົວຂອງເຂົາເຈົ້າ, ອັນເປັນການປະກອບສ່ວນເຂົ້າໃນການເສີມສ້າງການພົວພັນຖານເພື່ອນມິດ ແລະ ການຮ່ວມມືອັນຍາວນານ ລະຫວ່າງ ສອງປະເທດໃຫ້ເຂັ້ມແຂງ ແລະ ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ.
ເຖິງວ່າຈະປະສົບກັບອຸປະສັກ ແລະ ສິ່ງທ້າທາຍຫຼາຍຢ່າງກໍ່ຕາມ, ການປະຕິບັດງານຮ່ວມກັນດັ່ງກ່າວກໍ່ໄດ້ຮັບຜົນສໍາເລັດທີ່ເປັນຢ່າງໜ້າຊື່ນຊົມຕະຫຼອດມາ. ທັງນີ້ກໍ່ຍ້ອນມີການຮ່ວມມືຂອງລັດຖະບານ, ເຈົ້າໜ້າທີ່ກ່ຽວຂ້ອງຂອງລາວທຸກໆຂັ້ນແຕ່ສູນກາງຮອດທ້ອງຖິ່ນ ກໍ່ຄືການປະກອບສ່ວນອັນສໍາຄັນ ແລະ ຂາດບໍ່ໄດ້ຂອງປະຊາຊົນລາວບັນດາເຜົ່າ, ຊຶ່ງສ່ອງແສງເຖິງນະໂຍບາຍມະນຸດສະທໍາອັນສະເໝີຕົ້ນສະເໝີປາຍຂອງລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ທີ່ມີຕໍ່ສະຫະລັດ ອາເມຣິກາ, ໂດຍສະເພາະແມ່ນຕໍ່ຄອບຄົວ ແລະ ຍາດພີ່ນ້ອງຂອງຜູ້ຫາຍສາບສູນໃນປາງສົງຄາມຢູ່ລາວ.