ໃນອາທິດຜ່ານມາ, ທີ່ບ້ານພັກທູດໄທ, ທ່ານທູດ ສີວຽງເພັດ ເພັດວໍລະສັກ ໄດ້ເຂົ້າຮ່ວມງານພົບປະ ລະຫວ່າງ ທູດອາຊຽນຈາກ 10 ປະເທດ, ສະພາທຸລະກິດ ຣັດເຊຍ-ອາຊຽນ ແລະ ເຈົ້າຫນ້າທີ່ກະຊວງການຕ່າງປະເທດຣັດເຊຍ ພາຍໃຕ້ການເປັນປະທານຮ່ວມ ລະຫວ່າງ ທ່ານ ຖະນາທິບ ອຸປະຕິສິງ, ເອກອັກຄະລັດຖະທູດ ແຫ່ງ ຣາຊະອານາຈັກໄທ ໃນນາມປະທານອາຊຽນ ແລະ ທ່ານ ອີວານ ໂປລີຢາກົບ, ປະທານສະພາທຸລະກິດ ຣັດເຊຍ-ອາຊຽນ.

ໃນໂອກາດພົບປະກັນຄັ້ງນີ້, ສອງຝ່າຍໄດ້ທົບທວນຄືນ ຜົນການພົບປະກັນ ລະຫວ່າງ ທູດອາຊຽນ ແລະ ສະພາທຸລະກິດ ຣັດເຊຍ-ອາຊຽນ ໃນປີຜ່ານມາ, ໄດ້ຕີລາຄາວ່າ ມີຄວາມຄືບຫນ້າດີສົມຄວນສໍາລັບການຮ່ວມມືດ້ານທຸລະກິດ ລະຫວ່າງ ອາຊຽນ ແລະ ຣັດເຊຍ, ໃນນັ້ນ ໄດ້ເນັ້ນເຖິງການແລກປ່ຽນບົດຮຽນ ແລະ ປະສົບການ ລະຫວ່າງ ນັກທຸລະກິດອາຊຽນ ແລະ ນັກທຸລະກິດຣັດເຊຍ, ເຖິງວ່າ ການພັດທະນາເສດຖະກິດ, ການຄ້າ ແລະ ການລົງທຶນ ລະຫວ່າງ ອາຊຽນ ແລະ ຣັດເຊຍ ຍັງມີຄວາມແຕກໂຕນກັນ, ສໍາລັບອາຊຽນ ຍິ່ງມີຄວາມຈໍາເປັນ ຕ້ອງໄດ້ຮຽນເອົາປະສົບການກັບປະເທດອື່ນໆ, ໃນນັ້ນລວມທັງຣັດເຊຍທີ່ມີທ່າແຮງສູງ ດ້ານເສດຖະກິດ, ການຄ້າ ແລະ ການລົງທຶນ ໃນໂລກ, ຊຶ່ງລັດຖະບານຣັດເຊຍ ໃຫ້ຄວາມສໍາຄັນຕໍ່ບົດບາດຂອງການຮ່ວມມື ດ້ານເສດຖະກິດ ລະຫວ່າງ ຣັດເຊຍ ແລະ ອາຊຽນ ໃນປັດຈຸບັນ.

       ກອງປະຊຸມພົບປະກັນໃນຄັ້ງນີ້ ເຫັນດີສືບຕໍ່ນໍາໃຊ້ກົນໄກການຮ່ວມມືດ້ານເສດຖະກິດ ລະຫວ່າງ ອາຊຽນ ແລະ ຣັດເຊຍ ທີ່ພົວພັນກັບເຂດການຄ້າເສລີຂອງສະຫະພາບເສດຖະກິດ ເອີລົບ-ອາຊີ (Eurasian Economic Union) ຊຶ່ງ ສສ ຫວຽດນາມໄດ້ລົງນາມ ກັບ EAEU ກ່ຽວກັບເຂດການຄ້າເສລີ ໃນປີ 2016, ສ່ວນ ສິງກະໂປ ຍັງສືບຕໍ່ສຶກສາຄວາມເປັນໄປໄດ້ເພື່ອຈະລົງນາມ ໃນເຂດການຄ້າເສລີກັບ EAEU ໃນຂັ້ນຕໍ່ໄປ. ນອກຈາກນີ້, ສອງຝ່າຍຍັງໄດ້ແລກປ່ຽນທັດສະນະຮ່ວມກັນ ກ່ຽວກັບ ຂອດການປະສານງານ ລະຫວ່າງ ສໍານັກງານສະຖານທູດຂອງປະເທດອາຊຽນ ແລະ ສະພາທຸລະກິດ ຣັດເຊຍ-ອາຊຽນ ປະຈໍາສະຫະພັນຣັດເຊຍໂດຍຮຽກຮ້ອງໃຫ້ມີການປັບປຸງບັນຫານີ້ໃຫ້ມີຄວາມຄ່ອງຕົວຂຶ້ນກວ່າເກົ່າສໍາລັບການຮ່ວມມືດ້ານເສດຖະກິດ ອາຊຽນ-ຣັດເຊຍ ເວົ້າລວມ ແລະ ເວົ້າສະເພາະການຮ່ວມມືກັນ ລະຫວ່າງ ນັກທຸລະກິດອາຊຽນ ແລະ ນັກທຸລະກິດຣັດເຊຍ ໃນປັດຈຸບັນ.

ປະທານສະພາທຸລະກິດ ຣັດເຊຍ-ອາຊຽນ ກຽມພ້ອມຈະໃຫ້ການຕ້ອນຮັບບໍລິສັດນັກທຸລະກິດ ແລະ ນັກລົງທຶນຈາກປະເທດອາຊຽນທີ່ຈະມາເຄື່ອນໄຫວ ແລະ ເຮັດວຽກທີ່ສະຫະພັນຣັດເຊຍ ເພື່ອປືກສາຫາລື ຊອກຊ່ອງທາງຮ່ວມມື ດ້ານທຸລະກິດ-ການຄ້ານໍາກັນ, ຣັດເຊຍ ກໍເຫັນດີຈະໃຫ້ການສະຫນັບສະຫນູນ ແລະ ຊ່ວຍເຫລືອ ອາຊຽນ ເພື່ອສົ່ງເສີມ ທຸລະກິດ ແລະ ການລົງທຶນ ລະຫວ່າງ ຣັດເຊຍ ແລະ ອາຊຽນໃຫ້ໄດ້ຮັບຜົນສໍາເລັດ.