ໃນວັນທີ 10 ເມສາ 2019, ທີ່ ສຳນັກງານປະທານາທິບໍດີ ແຫ່ງ ສາທາລະນະລັດ ສະຫະພາບ ມຽນມາ, ທ່ານ ເຮືອງແສງ ຄໍາດາລາວົງ ໄດ້ເຂົ້າຍື່ນສານຕາຕັ້ງຕໍ່ ພະນະທ່ານ ອູ ວິນ ໝິນ, ປະທານາທິບໍດີ ແຫ່ງ ສາທາລະນະລັດ ສະຫະພາບ ມຽນມາ, ເພື່ອດໍາລົງຕໍາແໜ່ງເປັນ ເອກອັກຄະລັດຖະທູດວິສາມັນ ຜູ້ມີອໍານາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈໍາ ສາທາລະນະລັດ ສະຫະພາບ ມຽນມາ.
ໃນໂອກາດດັ່ງກ່າວ, ທ່ານ ເຮືອງແສງ ຄໍາດາລາວົງ ໄດ້ສະແດງຄວາມຍິນດີ ແລະ ເປັນກຽດຢ່າງສູງທີ່ໄດ້ຮັບການແຕ່ງຕັ້ງໃຫ້ດໍາລົງຕໍາແໜ່ງເປັນ ເອກອັກຄະລັດຖະທູດວິສາມັນ ຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສສ ມຽນມາ ພ້ອມທັງໃຫ້ຄໍາໝັ້ນສັນຍາວ່າ ທ່ານຈະພະຍາຍາມເຮັດທຸກຄວາມສາມາດ ເພື່ອສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງ ສອງປະເທດ ລາວ-ມຽນມາ ໃຫ້ມີບາດກ້າວໃໝ່ຂະຫຍາຍຕົວຂຶ້ນເລື້ອຍໆ ຕະຫຼອດໄລຍະການປະຕິບັດໜ້າທີ່ການທູດ ຢູ່ ສສ ມຽນມາ ໃນຄັ້ງນີ້. ໃນໂອກາດນີ້, ທ່ານເອກອັກຄະລັດຖະທູດ ຍັງໄດ້ນໍາເອົາຄວາມຢື້ຢາມຖາມຂ່າວ ແລະ ພອນໄຊອັນປະເສີດ ຂອງ ພະນະທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວ ສົ່ງເຖິງ ພະນະທ່ານ ອູ ວິນ ໝິນ ຈົ່ງມີພະລານາໄມສົມບູນ, ມີຄວາມຜາສຸກ ແລະ ໄດ້ຮັບຜົນສໍາເລັດໃນການນຳພາລັດຖະບານ ແລະ ປະຊາຊົນ ມຽນມາ ໄປສູ່ຄວາມຈະເລີນຮຸ່ງເຮືອງ.
ໃນຂະນະດຽວກັນ, ພະນະທ່ານ ປະທານາທິບໍດີ ກໍໄດ້ສະແດງຄວາມຍິນດີ ແລະ ຊົມເຊີຍ ຕໍ່ທ່ານເອກອັກຄະລັດຖະທູດ ທີ່ໄດ້ຮັບການແຕ່ງຕັ້ງເປັນເອກອັກຄະລັດຖະທູດ ແຫ່ງ ສປປ ລາວ ປະຈໍາ ສສ ມຽນມາ ໃນຄັ້ງນີ້ ພ້ອມທັງໄດ້ຝາກຄວາມຢື້ຢາມຖາມຂ່າວ ແລະ ພອນໄຊອັນປະເສີດ ຄືນເຖິງ ພະນະທ່ານ ປະທານປະເທດ ແຫ່ງ ສປປ ລາວ ເຊັ່ນກັນ.
ສປປ ລາວ ແລະ ສສ ມຽນມາ ໄດ້ສ້າງຕັ້ງສາຍພົວພັນການທູດນໍາກັນ ໃນວັນທີ 12 ກໍລະກົດ 1955, ເປັນປະເທດບ້ານໃກ້ເຮືອນຄຽງ ທີ່ມີສາຍພົວພັນມິດຕະພາບອັນເປັນມູນເຊື້ອ, ຍາວນານ ແລະ ມີການຮ່ວມມືທີ່ດີນໍາກັນ ທີ່ໄດ້ຮັບການເສີມຂະຫຍາຍໃຫ້ຈະເລີນງອກງາມຂຶ້ນເລື້ອຍໆ ລະຫວ່າງ ລັດຖະບານ ແລະ ປະຊາຊົນສອງຊາດ ລາວ-ມຽນມາ ໂດຍມີການແລກປ່ຽນການຢ້ຽມຢາມເຊິ່ງກັນ ແລະ ກັນ ຂອງຄະນະຜູ້ແທນລະດັບຕ່າງໆ ແລະ ການຮ່ວມມືດ້ານການເມືອງ, ການປ້ອງກັນຊາດ, ປ້ອງກັນຄວາມສະຫງົບ, ການຕ້ານຢາເສບຕິດ, ການສຶກສາ, ວັດທະນະທໍາ, ກະສິກໍາ, ການຄ້າ-ການລົງທຶນ, ການຄົມມະນາຄົມ-ຂົນສົ່ງ, ວິທະຍາສາດ-ເຕັກໂນໂລຊີ ແລະ ດ້ານອື່ນໆອີກດ້ວຍ.