ໃນຕອນເຊົ້າຂອງວັນທີ 27 ສິງຫາ 2019, ທີ່ ກະຊວງການຕ່າງປະເທດ, ທ່ານ ອານຸສິນ ຂັດຕິຍະລາດ, ຮອງຫົວໜ້າຫ້ອງການຄະນະກຳມະການຊາຍແດນແຫ່ງຊາດ, ໄດ້ຕາງໜ້າໃຫ້ຫ້ອງການຄະນະກຳມະການຊາຍແດນແຫ່ງຊາດ, ກະຊວງການຕ່າງປະເທດ, ແຈ້ງໃຫ້ຊາບ ກ່ຽວກັບ ສະພາບການຊາຍແດນ ລາວ-ກຳປູເຈຍ ໃນປັດຈຸບັນ ຊຶ່ງມີເນື້ອໃນດັ່ງນີ້:
ເນື່ອງຈາກວ່າໃນອາທິດທີ່ຜ່ານມາ ໄດ້ມີກະແສຂ່າວປອມທີ່ແຜ່ກະຈາຍໃນສື່ອອນລາຍ ກ່ຽວກັບ ສະຖານະການຄວາມບໍ່ສະຫງົບໃນບໍລິເວນຊາຍແດນ ລາວ-ກຳປູເຈຍ ເຂດຍອດເຊລຳເພົາເບື້ອງລາວ ຂື້ນກັບ ເມືອງມູນລະປະໂມກ, ແຂວງຈຳປາສັກ, ເບື້ອງກຳປູເຈຍ ຂື້ນກັບ ເມືອງແສບ, ແຂວງເພຣຍວິເຮຍ.
ຂ້າພະເຈົ້າ ອານຸສິນ ຂັດຕິຍະລາດ, ຮອງຫົວຫນ້າຫ້ອງການຄະນະກຳມະການຊາຍແດນແຫ່ງຊາດ, ຂໍຕາງໜ້າໃຫ້ຫ້ອງການຄະນະກຳມະການຊາຍແດນແຫ່ງຊາດ, ກະຊວງການຕ່າງປະເທດ, ແຈ້ງໃຫ້ຊາບວ່າ ບໍລິເວນດັ່ງກ່າວ ແມ່ນຢູ່ໃນສະພາວະປົກກະຕິ, ບໍ່ໄດ້ມີການປະເຊີນຫນ້າກັນ, ບໍ່ມີຄວາມເຄັ່ງຕຶງ, ບໍ່ມີບັນຫາຮ້າຍແຮງ, ບໍ່ມີການປະທະກັນດ້ວຍກຳລັງ ແລະ ບໍ່ມີເຫດການທີ່ບໍ່ເພິງປາຖະຫນາເກີດຂື້ນແຕ່ປະການໃດ.
ຂ້າພະເຈົ້າຢືນຢັນຕື່ມວ່າ: ບັນຫາຊາຍແດນລາວ-ກຳປູເຈຍ ບໍ່ໄດ້ເປັນດັ່ງທີ່ສື່ບາງແຫ່ງ ທັງພາຍໃນ ແລະ ຕ່າງປະເທດ ທີ່ໄດ້ອອກຂ່າວຜ່ານທາງສື່ອອນລາຍ ໃນໄລຍະຜ່ານມາ, ຊຶ່ງເປັນການສ້າງສະຖານະການ ເພື່ອເຮັດໃຫ້ສອງປະເທດລາວ ແລະ ກຳປູເຈຍ ມີຄວາມເຂົ້າໃຈຜິດຕໍ່ກັນ, ທັງເປັນການທຳລາຍພາບພົດທີ່ດີ ລະຫວ່າງສອງປະເທດ ທີ່ມີຕໍ່ກັນມາໂດຍຕະຫລອດ ແລະ ສອງປະເທດ ຍາມໃດກໍ່ຖືວ່າເປັນບ້ານແກ່ວເມືອງດອງ, ເປັນບ້ານໃກ້ເຮືອນຄຽງທີ່ດີ, ເຄີຍຮ່ວມທຸກຮ່ວມສຸກນຳກັນມາ, ທັງສອງປະເທດ ແມ່ນໃຫ້ຄວາມເຄົາລົບຄວາມເປັນເອກະລາດ, ອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງກັນ ແລະ ກັນ.
ສຳລັບການແກ້ໄຂບັນຫາຊາຍແດນ ລະຫວ່າງ ລາວ ແລະ ກຳປູເຈຍ, ສອງຝ່າຍ ແມ່ນຍຶດຫມັ້ນຕາມແນວທາງສັນຕິວິທີ ໂດຍຜ່ານການເຈລະຈາ ເພື່ອເຮັດໃຫ້ຊາຍແດນຮ່ວມຂອງສອງປະເທດ ໃຫ້ກາຍເປັນຊາຍແດນແຫ່ງສັນຕິພາບ, ມິດຕະພາບ ແລະ ການຮ່ວມມື.