ໃນວັນທີ 12 ກຸມພາ 2020, ທີ່ ຫ້ອງປະຊຸມ ແຂວງບໍລິຄໍາໄຊ, ກະຊວງການຕ່າງປະເທດ ຮ່ວມກັບ ສູນອາຊຽນ-ຍີ່ປຸ່ນ (AJC) ໄດ້ຈັດກອງປະຊຸມສຳມະນາ ໃນຫົວຂໍ້ “ຍົກສູງບົດບາດຂອງ ສປປ ລາວ ໃນການເຊື່ອມໂຍງເສດຖະກິດພາກພື້ນ ແລະ ສາກົນ”, ພາຍໃຕ້ການເປັນປະທານຮ່ວມຂອງ ທ່ານ ບຸນມາ ບຸຈະເລີນ, ຮອງເຈົ້າແຂວງ ບໍລິຄໍາໄຊ ແລະ ທ່ານ ວິລະສັກ ສົມພົງ, ຮັກສາການຫົວໜ້າກົມເສດຖະກິດ, ກະຊວງການຕ່າງປະເທດ, ໂດຍມີຜູ້ເຂົ້າຮ່ວມຈາກບັນດາພະແນກການກ່ຽວຂ້ອງ, ພາກທຸລະກິດ, ວິທະຍາໄລພາຍໃນແຂວງ ຈໍານວນ 80 ກວ່າທ່ານ.
ຈຸດປະສົງໃນການຈັດກອງປະຊຸມສໍາມະນາໃນຄັ້ງນີ້ ແມ່ນເພື່ອສ້າງຄວາມເຂົ້າໃຈ ແລະ ຍົກສູງຄວາມຮັບຮູ້ໃຫ້ແກ່ຜູ້ເຂົ້າຮ່ວມ ກ່ຽວກັບສະພາບການພັດທະນາເສດຖະກິດ ຂອງ ສປປ ລາວ ໃນປັດຈຸບັນ ໃນໄລຍະການສ້າງປະຊາຄົມອາຊຽນກໍຄືການເຊື່ອມໂຍງ ແລະ ການເຊື່ອມຈອດ ເສດຖະກິດພາກພື້ນ ແລະ ສາກົນ; ຊຸກຍູ້ການມີສ່ວນຮ່ວມຂອງທຸກພາກສ່ວນກ່ຽວຂ້ອງຂັ້ນທ້ອງຖິ່ນ ເຂົ້າໃນການຂົນຂວາຍດຶງດູດນັກລົງທຶນຕ່າງປະເທດ ແລະ ສົ່ງເສີມກິດຈະກຳການຄ້າ; ເປັນເວທີໃນການປຶກສາຫາລື ແລະ ແລກປ່ຽນຄວາມຄິດເຫັນ ລະຫວ່າງ ພະນັກງານຫຼັກແຫຼ່ງຂັ້ນສູນກາງ ແລະ ທ້ອງຖິ່ນ, ລະຫວ່າງພາກລັດ ແລະ ພາກເອກະຊົນ ໃນການຊອກຫາຊ່ອງທາງ ເພື່ອຮັບມື ແລະ ແກ້ໄຂສິ່ງທ້າທາຍໃນປະຈຸບັນ ແລະ ໃນອະນາຄົດຈາກການເຊື່ອມໂຍງເສດຖະກິດ ແລະ ຊອກຫາວິທີທາງໃນການຍົກລະດັບຄວາມອາດສາມາດຂັ້ນທ້ອງຖິ່ນ ໃນຍຸກສະໄໝໃໝ່, ລວມທັງກຳນົດທິດທາງໃນຕໍ່ໜ້າສຳລັບ ສປປ ລາວ ໃນຂອບການຮ່ວມມືທາງດ້ານເສດຖະກິດພາກພື້ນ ແລະ ສາກົນໃຫ້ໄດ້ຮັບໝາກຜົນຫຼາຍຂຶ້ນກວ່າເກົ່າ.
ໃນກອງປະຊຸມສຳມະນາຄັ້ງນີ້ ຜູ້ເຂົ້າຮ່ວມໄດ້ຮັບຟັງການບັນຍາຍຈາກນັກວິທະຍາກອນ ທີ່ມາຈາກກະຊວງການຕ່າງປະເທດ, ກະຊວງອຸດສາຫະກໍາ ແລະ ການຄ້າ, ກະຊວງແຜນການ ແລະ ການລົງທຶນ, ກະຊວງໂຍທາທິການ ແລະ ຂົນສົ່ງ ແລະ ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຂວງບໍລິຄໍາໄຊ ໃນຫຼາຍຫົວຂໍ້ທີ່ປິ່ນອ້ອມຫົວຂໍ້ຫຼັກຂອງກອງປະຊຸມສໍາມະນາ, ຊຶ່ງໄດ້ປຶກສາຫາລື ແລະ ແລກປ່ຽນຄໍາຄິດເຫັນຢ່າງກົງໄປກົງມາ ກ່ຽວກັບ ການຈັດຕັ້ງປະຕິບັດນະໂຍບາຍການເຊື່ອມໂຍງເສດຖະກິດກັບພາກພື້ນ ແລະ ສາກົນຂອງ ສປປ ລາວ ໃນປະຈຸບັນ ແລະ ສະເໜີແນະບາງວິທີການ ແລະ ມາດຕະການໃນການສືບຕໍ່ດໍາເນີນນະໂຍບາຍດັ່ງກ່າວໃນຕໍ່ໜ້າໂດຍສະເພາະແມ່ນການປະກອບສ່ວນ ຂອງຂະແໜງການກ່ຽວຂ້ອງຂັ້ນທ້ອງຖິ່ນ ແລະ ການພັດທະນາຂີດຄວາມສາມາດຂອງພະນັກງານ ເພື່ອຮອງຮັບກັບຍຸກສະໄໝແຫ່ງການເຊື່ອມໂຍງກໍຄື ຍຸກສະໄຫມແຫ່ງການປະຕິວັດອຸດສະຫະກຳ ຄັ້ງທີ 4 ລວມທັງການນໍາເອົາເນື້ອໃນ ແລະ ຂໍ້ມູນໃນກອງປະຊຸມສໍາມະນາຄັ້ງນີ້ ໄປຜັນຂະຫຍາຍເຂົ້າໃນຂົງເຂດວຽກງານຂອງຕົນ.