ທ່ານ ຢົງ ຈັນທະລັງສີ, ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ສປປ ລາວ ປະຈຳ​ ປະ​ເທດ​ຝຣັ່ງ ​ພ້ອມ​ດ້ວຍ​ພັນ​ລະ​ຍາ ​ແລະ ພະນັກງານ​ ໄດ້​ເຂົ້າຮ່ວມງານ​ປີ​ໃໝ່​ໄທ​ດຳ​ ​ໃນ​ວັນ​ທີ 22 ກຸມພາ 2020 ​ຢູ່​ສະ​ໂມ​ສອນ​​ກາງ​ເມືອງ​ອອກ​ລ່ຽງ, ປະເທດ ຝຣັ່ງ, ຜູ້​ເຂົ້າຮ່ວມມີ 300 ກວ່າຄົນ ຕາມ​ການ​ເຊື້ອ​ເຊີນຂອງສະມາຄົມ ເຜົ່າໄທດໍາ ທີ່ເມືອງອອກລ່ຽງ, ​ເຊິ່ງ​ເປັນຄັ້ງທຳ​ອິດ ທີ່​ຄະນະ​ສະຖານທູດ​ໄດ້​ເຂົ້າຮ່ວມ​ງານ​ຂອງ​ເຜົ່າ​ໄທ​ດຳ, ​ເປັນ​ຂີດ​ໝາຍ​ການ​ພົວພັນທີ່​ດີ ລະຫວ່າງ ​ສະຖານທູດ ​ແລະ ​ເຜົ່າ​ໄດ​ດຳ ທີ່​ປະ​ເທດ​ຝຣັ່ງ. ​ເຈົ້າກົກ​ເຈົ້່​າເຫລົ່າ ປະມານ 10 ທ່ານ ​ແລະ ພີ່ນ້ອງ​ເຜົ່າ​ໄທ​ດຳທີ່​ເຂົ້າຮ່ວມ​ງານ ​ໄດ້ສະ​ແດງຄວາມ​ຍິນ​ດີຕ້ອນຮັບ​ທ່ານ​ທູດ​ພ້ອມ​ດ້ວຍຄະນະ​ ຢ່າງ​ອົບ​ອຸ່ນ.

ໃນໂອກາດງານສະເຫຼີມສະຫຼອງປີໃໝ່ດັ່ງກ່າວ, ທ່ານເອກອັກຄະລັດຖະທູດ ໄດ້ໃຫ້ກຽດຂຶ້ນກ່າວອວຍພອນປີໃໝ່ ພ້ອມທັງ ໄດ້ກ່າວເຖິງມູນເຊື້ອອັນດີງາມ ແລະ ຄວາມຮັກແພງສາມັກຄີກັນຂອງບັນດາເຜົ່າຊາວລາວ ໃນເມື່ອກ່ອນ ຈົນ​ເຖິງ​ປະຈຸ​ບັນ ລວມທັງ​ຢູ່​ພາຍ​ໃນ ​ແລະ ຕ່າງປະ​ເທດ. ບັນຍາກາດ ໃນງານຄັ້ງນີ້ ແມ່ນເຕັມໄປດ້ວຍຄວາມເບີກບານມ່ວນຊື່ນ, ມີການນຸ່ງ​ເຄື່ອງ ​ແລະ ສະແດງຟ້ອນເຜົ່າໄທດໍາ, ຮ້ອງເພງລາວ, ຟ້ອນລໍາວົງລາວ ແລະ ການສະແດງອື່ນໆຢ່າງຫຼາກຫຼາຍ. ການ​ເຂົ້າຮ່ວມງານ​ ຂອງ​ຄະນະ​ສະຖານທູດ​ ​ຄັ້ງນີ້ ​ເປັນ​ຂີດ​ໝາຍ​ສຳຄັນ ​ໃນ​ການ​ເຂົ້າຫາ ​ເຜົ່າ​ໄທ​ດຳ ທີ່​​ເຂດ​ອອກ​ລ່ຽງ ​ແລະ ຈະ​ກ້າວ​ໄປ​ເຖິງການ​ພົວພັນທີ່​ດີກັບ​ເຜົ່າ​ນີ້​ໃນ​ເຂດ​ພາກ​ໃຕ້​ໃນຕໍ່ໜ້າ. ມາ​ຮອດ​ປະຈຸ​ບັນ ສະຖານທູດ​​ພວກ​ເຮົາມີ​ການພົວພັນທີ່​ດີ​ຢ່າງ​ກວ້າງຂວາງ​ກັບ​ຄົນ​ເຊື້ອ​ຊາດ​ລາວ​ ທົ່ວ​ປະ​ເທດ​ຝຣັ່ງ. ທີ່​ປະ​ເທດ​ຝຣັ່ງ ມີ​ຊາວອົບ​ພະຍົບຈາກ​ປະ​ເທດ​ລາວອາ​ໃສຢູ່​ ປະມານ​ສາມ​ແສນກວ່າ​ຄົນ ທີ່​ປະກອບ​ມີ​ຫລາຍ​ຊົນ​​ເຜົ່າ. ທີ່​ພົ້ນ​ເດັ່ນ ມີ​ເຜົ່າ​ລາວ, ຂະມຸ, ມົ້ງ ​ແລະ ​ໄທ​ດໍາ, ​ແຕ່ລະ​ປີ​ ​ແຕ່ລະ​ເຜົ່າ​ໄດ້​ມີ​ການ​ຈັດ​ກິດຈະກຳທາງດ້ານ​ວັດທະນາ​ທຳ​ຂອງ​ຕົນ. ສະ​ເພາະ​ເຜົ່າ​ໄທ​ດຳ ​ມີ​ປະມານ 6 ພັນ​ຄົນ ຢາຍ​ຢູ່​ຫຼາຍ​ພາກ ​ເຊັ່ນ: ທີ່​ເຂດ​ອອກ​ລ່ຽງ (​ໄກ​ຈາກ​ປາຣີ​ໄປທາງ​ໃຕ້​ປະມານ 130 ກິ​ໂລ​ແມັດ) ມີປະມານ 2 ພັນ​ຄົນ ນອກ​ນັ້ນ​ແມ່ນ​ຢູ່​ເຂດທາງ​ພາກ​ໃຕ້.