ໃນວັນທີ 22 ກຸມພາ 2020,​ ກອງປະຊຸມໃຫ່ຍຄັ້ງ ທີ III ຂອງໜ່ວຍພັກສະຖານເອກອັກຄະລັດຖະທູດ ສປປ ລາວ ປະຈຳ ສາທາລະນະລັດ ເກົາຫຼີ ທີ່ ເຊອູນ​ ໄດ້ໄຂຂື້ນຢ່າງເປັນທາງການ, ໂດຍການເປັນປະທານ ຂອງ ສະຫາຍ ທ່ຽງ ບຸບຜາ ຄະນະບໍລິຫານງານພັກກະຊວງການຕ່າງປະເທດ, ເລຂາໜ່ວຍພັກສະຖານເອກອັກຄະລັດຖະທູດລາວ ປະຈຳ ສ. ເກົາຫຼີ, ​ເຊີ່ງມີສະມາຊິກພັກເຂົ້າຮ່ວມ ທັງໝົດ 21 ສະຫາຍ, ຍິງ 03 ສະຫາຍສຳຮອງ 03 ສະຫາຍ ແລະ ຕາງໜ້າຈາກ 3 ອົງການຈັດຕັ້ງມະຫາຊົນເຂົ້າຮ່ວມ.

ກອງປະຊຸມໄດ້ຜ່ານບົດລາຍງານການເມືອງ,​ ຕີລາຄາສະພາບການຈັດຕັ້ງປະຕິບັດມະຕິກອງປະຊຸມໃຫ່ຍຄັ້ງທີ II ຂອງໜ່ວຍພັກໄລຍະ 5 ປີຜ່ານມາ, ໂດຍໄດ້ຕີລາຄາສະພາບການພົ້ນເດັ່ນຂອງໂລກ, ພາກພື້ນ ແລະ ພາຍໃນເກົາຫຼີ. ພ້ອມທັງທົບທວນຄືນການຊີ້ນຳໆພາການຈັດຕັ້ງປະຕິບັດແນວທາງນະໂຍບາຍຂອງພັກ, ແຜນພັດທະນາເສດຖະກິດໄລຍະ 5 ປີຂອງລັດ ແລະ ການຊີ້ນຳໆພາໜ້າວຽກດ້ານວິຊາສະເພາະຂອງໜ່ວຍພັກ, ໃນນັ້ນໄດ້ທົບທວນຄືນຕີລາຄາຈຸດດີ, ຈຸດອ່ອນຂໍ້ຄົງຄ້າງ ແລະ ຜົນສຳເລັດຂອງການຊີ້ນຳໆພາຂອງໜ່ວຍພັກໄລຍະຜ່ານມາ ແລະ ວາງທິດທາງ ໜ້າທີ່ຄາດໝາຍສູ້ຊົນໄລຍະ 5 ປີຕໍ່ໜ້າ. ໃນກອງປະຊຸມ, ຄະນະຜູ້ແທນໄດ້ຄົ້ນຄວ້າ ແລະ ປະກອບຄຳຄິດຄຳເຫັນໃສ່ບົດລາຍງານການເມືອງຢ່າງກົງໄປກົງມາແບບສ້າງສັນ ເພື່ອເຮັດໃຫ້ບົດລາຍງານການເມືອງມີຄວາມສົມບູນຄົບຖ້ວນ ແລະ ພ້ອມກັນຮັບຮອງເອົາມະຕິກອງປະຊຸມຢ່າງເປັນເອກະສັນ.

ກອງປະຊຸມໃຫ່ຍຄັ້ງທີ III ຂອງໜ່ວຍພັກ ໄດ້ປ່ອນບັດຄັດເລຶອກເອົາຄະນະພັກຊຸດໃໝ່ຂອງໜ່ວຍພັກສະຖານທູດ 03 ສະຫາຍ, ຈາກຜູ້ສະໝັກຮັບເລືອກຕັ້ງທັງໝົດ 05 ສະຫາຍ: ກອງປະຊຸມໄດ້ເລືອກເອົາ ສະຫາຍ ທ່ຽງ ບຸບຜາ ເປັນເລຂາໜ່ວຍພັກ, ສະຫາຍ ນາງ ວິທະຍາ ໄຊຍະວົງ ເປັນຮອງເລຂາ ແລະ ສະຫາຍ ຄຳກ້ຽງ ຈັນທະວົງ ເປັນກຳມະການ.

ໃນຕອນທ້າຍ, ຜູ້ເຂົ້າຮ່ວມກອງປະຊຸມ ໄດ້ຮັບຟັງການໂອ້ລົມຈາກ ສະຫາຍ ທ່ຽງ ບຸບຜາ ຄະນະບໍລິຫານງານພັກກະຊວງ, ເລຂາໜ່ວຍພັກຊຸດໃໝ່ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດການຊີ້ນຳໆພາຂອງຄະນະພັກຊຸດເກົ່າທີ່ຍາດມາໄດ້. ພ້ອມກັນນີ້, ກໍ່ໄດ້ມີທິດຊີ້ນຳໆພາໃນຕໍ່ໜ້າໂດຍໄດ້ເນັ້ນໃຫ້ເພີ່ມທະວີຄວາມເອົາໃຈໃສ່ວຽກງານການເມືອງແນວຄິດເປັນຫຼັກ, ຮັກສາຄວາມສາມະຄີເປັນເອກະພາບພາຍໃນພັກ ແລະ ສືບຕໍ່ຈັດຕັ້ງປະຕິບັດຜັນຂະຫຍາຍມະຕິ, ຄຳສັ່ງຕ່າງໆຂອງ ພັກຕາມການຊີ້ນຳຂອງຂັ້ນເທິງຢ່າງມີປະສິດທິຜົນ ແລະ ສືບຕໍ່ຊີ້ນຳໆພາໜ່ວຍພັກສ້າງໜ່ວຍພັກໃຫ້ເປັນໜ່ວຍພັກເຂັ້ມແຂງ, ປອດໃສໜັກແໜ້ນໃຫ້ປະສົບຜົນສຳເລັດເທື່ອລະກ້າວໃນຕໍ່ໜ້າ.