ໃນຕອນບ່າຍຂອງວັນທີ 20 ມີນາ 2020 ຜ່ານມາ, ທີ່ ຫ້ອງປະຊຸມກະຊວງການຕ່າງປະເທດ, ກອງປະຊຸມໃຫຍ່ ຄັ້ງທີ IV ຂອງໜ່ວຍພັກກົມການຂ່າວ, ກະຊວງການຕ່າງປະເທດໄດ້ໄຂຂຶ້ນຢ່າງເປັນທາງການ, ໂດຍການໃຫ້ກຽດເປັນປະທານຂອງ ສະຫາຍ ສະເຫຼີມໄຊ ກົມມະສິດ, ກໍາມະການສູນກາງພັກ, ເລຂາຄະນະບໍລິຫານງານພັກກະຊວງການຕ່າງປະເທດ, ບັນດາສະຫາຍເລຂາ, ຮອງເລຂາ ແລະ ຜູ້ຕາງໜ້າໜ່ວຍພັກອ້ອມຂ້າງກະຊວງການຕ່າງປະເທດ, 3 ອົງການຈັດຕັ້ງມະຫາຊົນ ທີ່ເປັນແຂກຖືກເຊີນ, ສະມາຊິກພັກສົມບູນ, ສະມາຊິກພັກສຳຮອງ ຂອງກົມການກະຊວງການຕ່າງປະເທດ ເຂົ້າຮ່ວມລວມທັງໝົດ 30 ສະຫາຍ.
ໃນກອງປະຊຸມ, ສະຫາຍ ບົວແກ້ວ ພູມວົງໄຊ, ເລຂາໜ່ວຍພັກກົມການຂ່າວ, ກະຊວງການຕ່າງປະເທດ ໄດ້ຜ່ານບົດລາຍງານການເມືອງ ແລະ ບົດສຳຫຼວດການນຳພາລວມ ຂອງຄະນະໜ່ວຍພັກໃນໄລຍະ 5 ປີຜ່ານມາ, ເຊິ່ງສາມາດສັງເກດຕີລາຄາຜົນສຳເລັດ, ຂໍ້ຫຍຸ້ງຍາກ ແລະ ບາງບົດຮຽນທີ່ຖອດຖອນໄດ້ ຂອງໜ່ວຍພັກນັບທັງການຊີ້ນຳ-ນຳພາ ຂອງຄະນະໜ່ວຍພັກ. ພ້ອມດຽວກັນນີ້, ກໍໄດ້ກຳນົດທິດທາງແຜນການ ແລະ ວຽກງານຈຸດສຸມສຳລັບປີ 2020-2025 ໂດຍຈະໄດ້ສຸມໃສ່: ວຽກງານກໍ່ສ້າງພັກ-ພະນັກງານ, ຂະຫຍາຍພັກຢ່າງມີຈຸດສຸມ ແລະ ມີຄຸນນະພາບ ເອົາໃຈໃສ່ສຶກສາອົບຮົມ ທາງດ້ານການເມືອງແນວຄິດ ໃຫ້ແກ່ສະມາຊິກພັກກົມການຂ່າວ, ຍົກສູງຄຸນນະພາບໃນ ການເປັນເສນາທິການໃນການປະຕິບັດໜ້າທີ່ວຽກງານວິຊາສະເພາະ, ເພີ່ມທະວີການຊີ້ນຳນຳພາ ແລະ ເສີມຂະຫຍາຍບົດບາດຂອງ 3 ອົງການຈັດຕັ້ງມະຫາຊົນພາຍໃນກົມການຂ່າວ, ພ້ອມທັງວິທີການຈັດຕັ້ງປະຕິບັດທິດທາງແຜນການ ທີ່ໄດ້ກໍານົດໄວ້ໃຫ້ປະກົດຜົນເປັນຈິງ.
ໜ່ວຍພັກ ກົມການຂ່າວ, ກະຊວງການຕ່າງປະເທດ ມີສະມາຊິກພັກທັງໝົດ 18 ສະຫາຍ, ຍິງ 5 ສະຫາຍ, ໃນນີ້ມີສະມາຊິກພັກສໍາຮອງ 3 ສະຫາຍ, ຍິງ 2 ສະຫາຍ. ໃນໄລຍະ 5 ປີ ຜ່ານມາ, ກົມການຂ່າວ ໄດ້ເສີມຂະຫຍາຍບົດບາດຊີ້ນຳນຳພາຂອງຕົນ ແລະ ສາມາດຍາດໄດ້ຜົນງານທີ່ພົ້ນເດັ່ນຫຼາຍດ້ານ ເປັນຕົ້ນແມ່ນການກໍ່ສ້າງພັກ-ພະນັກງານ, ຊຶ່ງມາຮອດປະຈຸບັນ ໄດ້ມີສະມາຊິກພັກ-ພະນັກງານ ສໍາເລັດການສຶກສາດ້ານວິຊາສະເພາະ ລະດັບປະລິນຍາໂທ ຢູ່ພາຍໃນ ແລະ ຕ່າງປະເທດ 8 ສະຫາຍ, ສໍາເລັດການບໍາລຸງທິດສະດີການເມືອງ ແລະ ການປົກຄອງ ລະບົບ 45 ວັນ 8 ສະຫາຍ, ສໍາເລັດການຝຶກອົບຮົມພາສາຈີນ ໄລຍະ 11 ເດືອນ 2 ສະຫາຍ, ພາສາຍີ່ປຸ່ນ 8 ເດືອນ 1 ສະຫາຍ ແລະ ພາສາຕວັກກີ 11 ເດືອນ 1 ສະຫາຍ, ສໍາເລັດການຝຶກອົບຮົບໄລຍະສັ້ນ ໃນຫົວຂໍ້ຕ່າງໆ ແລະ ພາສາອັງກິດ 14 ສະຫາຍ ແລະ ສໍາເລັດການໄປຝຶກວຽກງານການທູດຫຼາຍຝ່າຍໄລຍະ 3 ເດືອນ ຢູ່ສະຖານເອກອັກຄະລັດຖະທູດແຫ່ງ ສປປ ລາວ ປະຈໍາປະເທດຝຣັ່ງ 1 ສະຫາຍ. ປະຈຸບັນ, ມີພະນັກງານກໍາລັງສຶກສາຕໍ່ລະດັບປະລິນຍາໂທ ຢູ່ປະເທດອົດສະຕຣາລີ 1 ສະຫາຍ ແລະ ຝຶກອົບຮົມພາສາອາຣັບ ໄລຍະ 9 ເດືອນ 1 ສະຫາຍ. ນອກຈາກນັ້ນ, ມີສະມາຊິກພັກ-ພະນັກງານໄດ້ຮັບການເລື່ອນຊັ້ນຈາກຫົວໜ້າພະແນກເປັນຮອງຫົວໜ້າກົມ 4 ສະຫາຍ, ຈາກຮອງຫົວໜ້າພະແນກຂຶ້ນເປັນຫົວໜ້າພະແນກ 6 ສະຫາຍ, ແລະ ຈາກວິຊາການຂຶ້ນເປັນຮອງຫົວໜ້າພະແນກ 12 ສະຫາຍ.
ນອກນັ້ນ, ໜ່ວຍພັກພວກເຮົາ ຈະໄດ້ເອົາໃຈໃສ່ຍົກສູງຄຸນນະພາບ ການເປັນເສນາທິການ ດ້ານວຽກງານການຂ່າວໃຫ້ແກ່ຂັ້ນເທິງ ແລະ ເປັນເຈົ້າການນໍາພາການປັບປຸງແບບແຜນວິທີເຮັດວຽກ ຢ່າງມີວິທະຍາສາດ, ມີແຜນງານ, ໂຄງການ, ແຜນການ ແລະ ມີຈຸດສຸມ ຄວບຄູ່ກັບການນໍາໃຊ້ພາຫະນະເຕັກນິກ ທີ່ທັນສະໄໝເຂົ້າໃນການເຮັດວຽກ ເພື່ອເພີ່ມປະສິດທິພາບຂອງວຽກງານ, ພ້ອມທັງສືບຕໍ່ສ້າງ, ປັບປຸງນິຕິກໍາ ແລະ ກົນໄກການເຄື່ອນໄຫວວຽກງານການຂ່າວຕ່າງປະເທດ ຢ່າງເປັນລະບົບ, ໂດຍສະເພາະແມ່ນຈັດຕັ້ງຜັນຂະຫຍາຍ 5 ແຜນງານ ແລະ 41 ໂຄງການ ທີ່ໄດ້ຖືກຮັບຮອງໃນກອງປະຊຸມວຽກງານການຕ່າງປະເທດ ຄັ້ງທີ XIV.
ຜູ້ແທນກອງປະຊຸມໃຫຍ່ ໄດ້ໃຊ້ສິດປະຊາທິປະໄຕ ປ່ອນບັດຄັດເລືອກເອົາຄະນະໜ່ວຍພັກກົມການຂ່າວຊຸດ ໃໝ່ ຈຳນວນ 3 ສະຫາຍ ແລະ ໃນກອງປະຊຸມຄັ້ງປະຖົມມະເລີກ ຂອງຄະນະໜ່ວຍພັກຊຸດໃຫມ່ ໄດ້ເປັນເອກະພາບເລືອກເອົາ ສະຫາຍ ບົວແກ້ວ ພູມວົງໄຊ, ເປັນເລຂາໜ່ວຍພັກ; ສະຫາຍ ນາງ ວຽງສະຫວັນ ພິລາວົງ, ເປັນຮອງເລຂາ; ແລະ ສະຫາຍ ບຸນມີ ວັນມະນີ, ເປັນກຳມະການ, ຮັບຜິດຊອບວຽກງານກວດກາ ໜ່ວຍພັກກົມການຂ່າວ.
ກອງປະຊຸມໃຫຍ່ ຍັງໄດ້ເປັນກຽດຮັບຟັງການໂອ້ລົມຂອງ ສະຫາຍ ສະເຫຼີມໄຊ ກົມມະສິດ, ກຳມະການສູນກາງພັກ, ເລຂາຄະນະບໍລິຫານງານພັກກະຊວງການຕ່າງປະເທດ, ເຊິ່ງສະຫາຍໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານຂອງໜ່ວຍພັກກົມການຂ່າວ, ກະຊວງການຕ່າງປະເທດ ທີ່ຍາດມາໄດ້ໃນໄລຍະຜ່ານມາ ແລະ ໄດ້ໃຫ້ທິດຊີ້ນຳ ແກ່ຄະນະໜ່ວຍພັກກົມການຂ່າວຊຸດໃຫມ່ເອົາໃຈໃສ່ 5 ດ້ານຄື: ເພີ່ມທະວີວຽກງານກໍ່ສ້າງພັກ-ພະນັກງານ, ຍົກສູງຫຼັກການເຮັດວຽກງານ ຂອງພັກແບບລວມສູນປະຊາທິປະໄຕ, ຍົກສູງປະສິດທິພາບ ຂອງການຂະຫຍາຍສະມາຊິກພັກ ໂດຍເນັ້ນເອົາຄຸນນະພາບເປັນຫລັກ, ເພີ່ມທະວີຄວາມເປັນເອກະພາບ ແລະ ຄວາມສາມັກຄີພາຍໃນຫນ່ວຍພັກ ແລະ ຍົກສູງຄຸນນະພາບໃນການປະຕິບັດໜ້າທີ່ວຽກງານວິຊາສະເພາະໃນດ້ານຕ່າງໆ ໂດຍສະເພາະໃຫ້ມີຄວາມສະດຸ້ງໄວຕໍ່ແຕ່ລະບັນຫາ ແລະ ເອົາໃຈໃສ່ຝຶກຝົນທັກສະໃນການວິໄຈບັນຫາໃຫ້ວ່ອງໄວ, ພ້ອມກັນສູ້ຊົນບຸກບືນ ແລະ ເຊີດຊູຄວາມເປັນເຈົ້າການ ແລະ ມີຄວາມຮັບຜິດຊອບຕໍ່ໜ້າທີ່ການເມືອງຂອງຕົນໃຫ້ ສາມາດຍາດໄດ້ຜົນສຳເລັດອັນໃໝ່ໃຫຍ່ຫຼວງກວ່າເກົ່າ ໃນຊຸມປີຕໍ່ຫນ້າ.