ກອງປະຊຸມໃຫຍ່ ຄັ້ງທີ II ຂອງຫນ່ວຍພັກ ສະຖານເອກອັກຄະລັດຖະທູດ ແຫ່ງ ສປປ ລາວ ທີ່ ແຄນເບີຣາ ໄດ້ໄຂຂື້ນຢ່າງເປັນທາງການ ໃນວັນທີ 28 ພຶດສະພາ 2020 ທີ່ ແຄນເບີຣາ ພາຍໃຕ້ການເປັນປະທານຂອງ ສະຫາຍ ສີສະຫວາດ ອິນພະຈັນ, ຄະນະພັກກະຊວງການຕ່າງປະເທດ ທັງເປັນເລຂາຫນ່ວຍພັກສະຖານທູດ ໂດຍມີຜູ້ແທນສົມບູນທັງຫມົດ 9 ສະຫາຍ ແລະ ແຂກທີ່ຖືກເຊີນຊຶ່ງເປັນສະມາຊິກພັກ ຈາກຈຸພັກນັກສຶກສາທີ່ແຄນເບີຣາ 4 ສະຫາຍ ເຂົ້າຮ່ວມ.
ກອງປະຊຸມໃຫຍ່ ໄດ້ຮັບຮອງເອົາບົດລາຍງານການເມືອງ ແລະ ທິດທາງແຜນການເຄື່ອນໄຫວໃນຕໍ່ຫນ້າ ເພື່ອປັບປຸງແບບແຜນວິທີເຮັດວຽກ ໃຫ້ມີປະສິດທິພາບຕອບສະຫນອງ ແລະ ສອດຄອງກັບຄຳຂວັນ “ການທູດປ້ອງກັນເຫດ ແລະ ບຸກທະລຸ ເພື່ອພາລະກິດປົກປັກຮັກສາ ແລະ ສ້າງສາພັດທະນາປະເທດ”, ໄດ້ຜ່ານບົດສຳຫລວດການນຳພາຂອງຄະນະພັກຊຸດເກົ່າ ແລະ ໄດ້ປ່ອນບັດເລືອກຕັ້ງເອົາຄະນະພັກຊຸດໃຫມ່ໄດ້ 3 ສະຫາຍ ຄື: ສະຫາຍ ສີສະຫວາດ ອິນພະຈັນ, ເປັນເລຂາຫນ່ວຍພັກ, ສະຫາຍ ຈາຕຸລົງ ບົວສີສະຫວັດ, ເປັນຮອງເລຂາຫນ່ວຍພັກ ແລະ ສະຫາຍ ສຸບັນ ສາຍທອງດຳ, ເປັນກຳມະການພັກ.
ໃນກອງປະຊຸມໃຫຍ່ຂອງຫນ່ວຍພັກຄັ້ງນີ້ ຍັງໄດ້ມີການມອບ-ຮັບ ໃບຢັ້ງຢືນຫນ່ວຍພັກສະຖານເອກອັກຄະລັດຖະທູດ ແຫ່ງ ສປປ ລາວ ທີ່ແຄນເບີຣາ ເປັນຫນ່ວຍພັກປອດໃສ, ແຂັ້ມແຂງ ແລະ ຫນັກແຫນ້ນ.
ພ້ອມກັນນີ້, ກອງປະຊຸມໃຫຍ່ ໄດ້ຮັບຮອງເອົາມະຕິຂອງກອງປະຊຸມໃຫຍ່ ຄັ້ງທີ II ຂອງຫນ່ວຍພັກສະຖານເອກອັກຄະລັດຖະທູດ ແຫ່ງ ສປປ ລາວ ທີ່ ແຄນເບີຣາ ຊຶ່ງໃນນີ້ໄດ້ຮັບຮອງເອົາຜົນຂອງກອງປະຊຸມຄັ້ງປະຖົມມະເລີກ ຂອງຄະນະພັກຊຸດໃຫມ່. ກອງປະຊຸມໄດ້ປິດລົງດ້ວຍບັນຍາດາກາດທີ່ອົບອຸ່ນ ແລະ ມີຜົນສຳເລັດອັນຈົບງາມ.