ກອງປະຊຸມໃຫຍ່ຄັ້ງທີ I ຂອງໜ່ວຍພັກສະຖານທູດລາວ ທີ່ ນິວເດນລີ ໄດ້ໄຂຂຶ້ນຢ່າງເປັນທາງການໃນເວລາ 14:00 ໂມງ ຂອງວັນທີ 29 ພຶດສະພາ 2020, ທີ່ຫ້ອງປະຊຸມໃຫຍ່ ສະຖານທູດລາວ ທີ່ ນິວເດນລີ, ໂດຍມີ ສະມາຊິກພັກສົມບູນ 5 ສະຫາຍ ເຂົ້າຮ່ວມຢ່າງພ້ອມພຽງ. ໃນກອງປະຊຸມ ສະຫາຍ ບຸນແນມ ຈວງຫອມ, ເລຂາໜ່ວຍພັກສະຖານທູດລາວ, ໄດ້ຜ່ານບົດລາຍງານການເມືອງ ແລະ ບົດສໍາຫຼວດການນໍາພາລວມຂອງຄະນະໜ່ວຍພັກໃນ 5 ປີຜ່ານມາ, ຊຶ່ງໄດ້ສັງເກດຕີລາຄາຢ່າງເລິກເຊິ່ງ ແລະ ຄົບຖ້ວນ ຕໍ່ການນໍາພາຂອງຄະນະໜ່ວຍພັກໃນໄລຍະຜ່ານມາ ໂດຍໄດ້ຍົກໃຫ້ເຫັນຜົນສໍາເລັດ ແລະ ຜົນງານທີ່ຍາດມາໄດ້, ບົດຮຽນທີ່ຖອດຖອນໄດ້, ຂໍ້ຄົງຄ້າງທີ່ຈະຕ້ອງແກ້ໄຂໃນຕໍ່ໜ້າ ແລະ ໄດ້ວາງທິດທາງແຜນການ ກໍຄືວຽກງານຈຸດສຸມສໍາລັບປີ 2020-2025.
ໃນກອງປະຊຸມຄັ້ງນີ້, ຜູ້ແທນກອງປະຊຸມໃຫຍ່ 5 ສະຫາຍ ໄດ້ໃຊ້ສິດປະຊາທິປະໄຕປ່ອນບັດຄັດເລືອກເອົາຄະນະໜ່ວຍພັກຊຸດໃໝ່ 2 ສະຫາຍ ຕາມມະຕິຕົກລົງຂອງຄະນະບໍລິຫານງານພັກກະຊວງການຕ່າງປະເທດ, ຊຶ່ງກອງປະຊຸມຄັ້ງປະຖົມມະລືກ ຂອງຄະນະໜ່ວຍພັກຊຸດໃໝ່ໄດ້ເລືອກເອົາ ສະຫາຍ ບຸນແນມ ຈວງຫອມ, ເອກອັກຄະລັດຖະທູດ, ເປັນເລຂາໜ່ວຍພັກຢ່າງເປັນເອກະສັນ, ເລືອກເອົາ ສະຫາຍ ຄູນມີໄຊ ມະຫາວົງ, ເລຂານຸການໂທ, ເປັນຮອງເລຂາໜ່ວຍພັກ ແລະ ທັງເປັນກໍາມະການກວດກາ.
ກອງປະຊຸມໃຫຍ່ໄດ້ຖືເປັນກຽດຮັບຟັງການໂອ້ລົມຂອງ ສະຫາຍ ບຸນແນມ ຈວງຫອມ, ເລຂາໜ່ວຍພັກຊຸດໃໝ່, ຊຶ່ງຄຳໂອ້ລົມດັ່ງກ່າວໄດ້ເປັນການຊີ້ທິດເຍືອງທາງ ແລະ ໃຫ້ການຊີ້ນຳທີ່ເຕັມໄປດ້ວຍຄວາມຫມາຍຄວາມສຳຄັນ ໃຫ້ແກ່ການເຄື່ອນໄຫວນຳພາຂອງຄະນະໜ່ວຍພັກ, ສາມາດເປັນເສນາທິການໃຫ້ຂັ້ນເທິງໃນການເຄື່ອນໄຫວວຽກງານການທູດ ເພື່ອຊຸກຍູ້ສົ່ງເສີມການພົວພັນ ແລະ ຮ່ວມມືສອງຝ່າຍ ກໍຄືຫລາຍຝ່າຍ ກັບປະເທດອິນເດຍ ແລະ ບັນດາ 7 ປະເທດທີ່ສະຖານທູດ ສປປ ລາວ ທີ່ນິວເດນລີຮັບຜິດຊອບແລະ ໄດ້ຮຽກຮ້ອງບັນດາສະຫາຍສະມາຊິກພັກ ຈົ່ງເພີ່ມທະວີຄວາມຮັບຜິດຊອບໃນການຈັດຕັ້ງປະຕິບັດໜ້າທີ່ການເມືອງຂອງຕົນ, ເອົາໃຈໃສ່ຄົ້ນຄວ້າກໍາແໜ້ນທິດທາງແຜນການ ແລະ ຄາດໝາຍສູ້ຊົນໃນແຕ່ລະດ້ານຂອງໜ່ວຍພັກ ເພື່ອສ້າງສະພາບແວດລ້ອມ ທີ່ເອື້ອອຳນວຍ ໃຫ້ການປະຕິບັດໜ້າທີ່ໃນໄລຍະໃໝ່, ພ້ອມກັນສືບຕໍ່ເຄື່ອນໄຫວວຽກງານການທູດຕາມຄໍາຂັວນ: ການທູດປ້ອງກັນເຫດ ແລະ ບຸກທະລຸ ເພື່ອປົກປັກຮັກສາ ແລະ ພັດທະນາປະເທດຊາດ ໃຫ້ປະກົດຜົນເປັນຈິງ.