ໃນຕອນເຊົ້າຂອງວັນທີ 09 ກໍລະກົດ 2020, ສະຖາບັນການຕ່າງປະເທດ ຮ່ວມກັບ ມະຫາວິທະຍາໄລການຕ່າງປະເທດ ສປ ຈີນ ຫຼື China Foreign Affairs University (CFAU) ໄດ້ຮ່ວມກັນຈັດກອງປະຊຸມທາງໄກໃນຂອບໜ່ວຍງານຄົ້ນຄວ້າເຄືອຂ່າຍຄັງປັນຍາອາຊຽນ-ຈີນ ຫຼື NACT Working Group ພາຍໃຕ້ຫົວຂໍ້ "ການຮ່ວມມືອາຊຽນ-ຈີນ ໃນການຫຼຸດຜ່ອນຄວາມທຸກຍາກ ທ່າມກາງຄວາມພະຍາຍາມໃນການຕໍ່ສູ້ຕ້ານການແຜ່ລະບາດຂອງພະຍາດຈຸລະໂລກອັກເສບປອດ ຫຼື COVID-19 (ASEAN-China Cooperation on Poverty Alleviation Against the Backdrop of COVID-19 Pandemic)".

ໃຫ້ກຽດກ່າວເປີດ ແລະ ເປັນປະທານຮ່ວມກອງປະຊຸມໃນຄັ້ງນີ້ ໂດຍ ທ່ານ ທູດ ໄມ ໄຊຍະວົງສ໌, ຫົວໜ້າສະຖາບັນການຕ່າງປະເທດ ແລະ ທ່ານ Xu Jian, ອະທິການບໍດີ, ມະຫາວິທະຍາໄລການຕ່າງປະເທດ ສປ ຈີນ, ມີຜູ້ເຂົ້າຮ່ວມຈາກບັນດາປະເທດສະມາຊິກເຄືອຂ່າຍຄັງປັນຍາອາຊຽນ-ຈີນ ລວມທັງໝົດ 26 ທ່ານ.

ໃນໂອກາດດັ່ງກ່າວ ທ່ານ ທູດ ໄມ ໄຊຍະວົງສ໌, ຫົວໜ້າສະຖາບັນການຕ່າງປະເທດ ໄດ້ເນັ້ນໜັກເຖິງການພົວພັນຮ່ວມມືຂອງເຄືອຂ່າຍຄັງປັນຍາອາຊຽນ-ຈີນ ທີ່ມີສາຍພົວພັນອັນດີຮ່ວມກັນມາແຕ່ຍາວນານ, ເຊິ່ງທັງສອງຝ່າຍຕ່າງກໍ່ສະແດງບົດບາດການຊຸກຍູ້ ແລະ ສະໜັບສະໜູນເຊິ່ງກັນ ແລະ ກັນ ຕະຫຼອດມາ. ນອກຈາກນີ້, ອາຊຽນຍັງໄດ້ກາຍເປັນຄູ່ຮ່ວມມືການຄ້າອັນດັບສອງຂອງ ສປ ຈີນ ຮອງຈາກສະຫະພາບເອີຣົບ (EU), ເຊິ່ງໃນປີ 2019 ຜ່ານມາ ມູນຄ່າການຄ້າ ອາຊຽນ-ຈີນ ແມ່ນມີມູນຄ່າສູງເຖິງ 644 ຕື້ໂດລາສະຫະລັດ. ນີ້ເປັນການສະແດງເຖິງໝາກຜົນໃນການພົວພັນຮ່ວມມືກັນໃນຫຼາຍໆດ້ານທັງໃນເວທີພາກພື້ນ ແລະ ສາກົນ, ຕະຫຼອດເຖິງການຮ່ວມມືກັນແກ້ໄຂບັນຫາ ແລະ ສະພາບການຕ່າງໆທີ່ເກີດຂຶ້ນຢ່າງສັນຕິວິທີ.

ກອງປະຊຸມຄັ້ງນີ້ໄດ້ເປີດໂອກາດໃຫ້ຜູ້ເຂົ້າຮ່ວມຈາກ ສູນຄົ້ນຄວ້າອາຊຽນ-ຈີນ ໄດ້ປຶກສາຫາລື ແລະ ແລກປ່ຽນຄໍາຄິດຄໍາເຫັນຮ່ວມກັນ ກ່ຽວກັບ ບັນຫາການພັດທະນາເສດຖະກິດ-ສັງຄົມ ແລະ ການຫຼຸດຜ່ອນຄວາມທຸກຍາກໃນບັນດາປະເທດສະມະຊິກອາຊຽນ ແລະ ສປ ຈີນ, ເປັນຕົ້ນແມ່ນການສ້າງລາຍຮັບຈາກການຄ້າ, ການລົງທຶນ ເພື່ອຫຼຸດຜ່ອນຄວາມທຸກຍາກໃນບັນດາປະເທດອາຊຽນ ໃນທ່າມກາງການແຜ່ລະບາດຂອງພະຍາດຈຸລະໂລກອັກເສບປອດ ຫຼື COVID-19 ທີ່ໄດ້ແຜ່ລາມໄປທົ່ວໂລກ ແລະ ສົ່ງຜົນກະທົບໂດຍກົງຕໍ່ລະບົບເສດຖະກິດຂອງ ສປ ຈີນ, ອາຊຽນ ແລະ ທົ່ວໂລກ. ເຖິງຢ່າງໃດກໍ່ຕາມ, ໃນສະພາບຄວາມຫຍຸ້ງຍາກນີ້, ການຮ່ວມມືລະຫວ່າງ ອາຊຽນ-ຈີນ ຍິ່ງມີຄວາມຈໍາເປັນ ເພື່ອແລກປ່ຽນປະສົບການ ແລະ ຖອດຖອນບົດຮຽນຮ່ວມກັນ ໃນການຕໍ່ສູ້ຕ້ານການແຜ່ລະບາດຂອງພະຍາດ COVID-19 ແລະ ແກ້ໄຂສະພາບເສດຖະກິດທີ່ກໍາລັງຖົດຖ່ອຍ ໃຫ້ສາມາດກັບຄືນສູ່ສະພາບປົກກະຕິ ແລະ ຂະຫຍາຍ ຕົວຍິ່ງຂຶ້ນໃນຕໍ່ໜ້າ.