ຕາມ​ການ​ເຊື້ອ​ເຊີນ​ຂອງ​ສະມາຄົມ​ມິດຕະພາບ​ ຫວຽດນາມ-​ລາວ ໃນ​ລະຫວ່າງ​ວັນ​ທີ 18-19 ກໍລະກົດ 2020, ທ່ານ ​ແສງ​ເພັດ ຮຸ່ງ​ບຸນ​ຍວງ, ​ເອກ​ອັກຄະ​ລັດຖະທູດ ວິສາມັນຜູ້ມີ​ອຳນາດ​ເຕັມ ​ແຫ່ງ ສປປ ລາວ ປະຈຳ ສສ. ຫວຽດນາມ ພ້ອມ​ດ້ວຍ​ຄະນະ​ນຳ ​ແລະ ພະນັກງານ​ຈຳນວນ​ໜຶ່ງ​ ໄດ້​ເຂົ້າ​ຮ່ວມ​ພິທີ​ໄຕ້​ທູບ​ທຽນ ​ເນື່ອງ​ໃນ​ວັນ​ເສຍ​ອົງຄະ-​ວິລະ​ຊົນ​ແຫ່ງ​ຊາດ​ຫວຽດນາມ​ ຄົບຮອບ 73 ປີ (27/07/1949-27/07/2020) ຢູ່​ສຸສານ​ສາກົນ​ ຫວຽດ-ລາວ, ເມືອງ ແອ​ງ​ເຊິ​ນ, ​ແຂວງ ​ເຫ​ງະ​ອານ.

ໃນ​ພິທີ​ ທ່ານ ​ແສງ​ເພັດ ຮຸ່ງ​ບຸນ​ຍວງ, ​ເອກ​ອັກຄະ​ລັດຖະທູດ ວິສາມັນຜູ້​ມີ​ອຳນາດ​ເຕັມ ​ແຫ່ງ ສປປ ລາວ ປະຈຳ ສສ. ຫວຽດນາມ​ ໄດ້​ໄຕ້​ທູບ​ທຽນ​ສະ​ແດງ​ຄວາມ​ຮູ້​ບຸນຄຸນ​ອັນ​ເລິກ​ເຊິ່ງ ທີ່​ນັກຮົບ​ຜູ້​ເສຍສະຫຼະ​ຊີວິດ​ເພຶ່ອພາລະກິດ​ປະຕິວັດ​ຂອງ​ປະຊາຊົນ​ລາວ ​ແລະ ຫວຽດນາມ ທັງໄດ້​ກ່າວ​ວ່າ: ໃນ​ປະຫວັດສາດ​ການ​ພົວພັນ​ສາກົນ, ​ແຕ່​ອະ​ດິດມາ​ເຖິງ​ປະຈຸ​ບັນ, ສາຍ​ພົວພັນ​ພິ​ເສດ ​ລາວ-​ຫວຽດນາມ​ ແລະ ຫວຽດນາມ-​ລາວ ແມ່ນສາຍ​ພົວພັນ​ລະຫວ່າງ​ສອງ​ປະ​ເທດ ​​ແບບ​ພິ​ເສດ​ມີໜຶ່ງ​ດຽວ​ໃນ​ໂລກ​ ເປັນ​ການ​ພົວພັນ​ທີ່​ສະໜິດ​ແໜ້ນໝັ້ນຄົງ, ບໍລິສຸດ​ຜຸດ​ຜ່ອງ, ​ໃສ​ແຈ້ງ ​ແລະ ມີ​ປະສິດທິ​ຜົນ ລະຫວ່າງ​ສອງ​ຊາດ ຖຶກສ້າງ​ຂື້ນ ​ແລະຖະນຸຖະໜອມ​ຜ່ານ​ຂະ​ບວນການ​ຮ່ວມ​ສຳພັນ​ສູ້​ຮົບ​ທີ່​ເສຍສະຫຼະ​ເລືອດ​ເນື້ອບໍ່​ຮູ້ຈັກ​ວ່າ​ເທົ່າ​ໃດ​ລຸ້ນຄົນຮ່ວມ​​ຕໍ່ສູ້​ເພື່ອ​ຄວາມ​ເປັນ​ເອກລາດ, ​ເສລີພາບ ​ແລະສັງຄົມ​ທີ່​ກ້າວໜ້າຂອງ​ສອງ​ປະ​ເທດ.

ດ້ວຍ​ຜົນງານ ​ແລະ ຄຸນງາມຄວາມດີ​ ທີ່​ບັນດາ​ນັກຮົບ​ໄດ້​ສ້າງ​ມານັ້ນ, ພວກ​​ເຮົາ​ເປັນ​ຄົນ​ຮຸ້ນ​ຫຼັງ​ຂໍ​ຈາລຶກບຸນຄຸນ, ຜົນງານ​ຄຸນງາມຄວາມດີ ​ທີ່​ບັນດາ​ນັກຮົບໄດ້​ສ້າງ​ໄວ້​ໃຫ້​ຍືນ​ຍົງ​ຕະຫຼອດ​ໄປ ແລະ ຈະ​ສືບ​ຕໍ່​ເພີ່ມ​ທະວີສົ່ງ​ເສີມ​ສາຍພົວພັນມິດຕະພາບອັນ​ຍິ່ງ​ໃຫຍ່​ ຄວາມ​ສາມັກຄີ​ພິ​ເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນຂອງສອງປະເທດ ລາວ-ຫວຽດນາມ, ຫວຽດນາມ-ລາວ, ໃຫ້ນັບມື້ແຕກດອກອອກຜົນຍິ່ງໆ​ຂຶ້ນ.