ໃນວັນທີ 8 ມີນາ 2021, ທີ່ທໍານຽບປະທານາທິບໍດີນະຫຼອນຫຼວງ ໄຄໂຣ, ສາທາລະນະລັດ ອາຣັບ ເອຢິບ, ທ່ານ ບຸນແນມ ຈວງຫອມ ໄດ້ຍື່ນສານຕາຕັ້ງຕໍ່ ພະນະທ່ານ ອັບເດວ ຟາຕາ ອານ-ສິສິ (Abdel Fattah Al-Sisi), ປະທານາທິບໍດີ ແຫ່ງ ສາທາລະນະລັດ ອາຣັບ ເອຢິບ, ເພື່ອດໍາລົງຕໍາແໜ່ງເປັນເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈໍາ ສາທາລະນະລັດ ອາຣັບ ເອຢິບ ໂດຍມີສໍານັກງານຕັ້ງຢູ່ ນະຄອນຫຼວງນິວເດນລີ, ປະເທດອິນເດຍ.
ໃນໂອກາດດັ່ງກ່າວ, ທ່ານເອກອັກຄະລັດຖະທູດໄດ້ສະແດງຄວາມຂອບໃຈຢ່າງຍິ່ງ ແລະ ຖືເປັນກຽດຢ່າງສູງທີ່ພະນະທ່ານປະທານາທິບໍດີໄດ້ໃຫ້ກຽດຮັບສານຕາຕັ້ງດັ່ງກ່າວ ແລະ ໄດ້ໃຫ້ຄໍາໝັ້ນສັນຍາວ່າ ໃນໄລຍະເວລາການປະຕິບັດໜ້າທີ່ການທູດປະຈໍາປະເທດເອຢິບນີ້ ທ່ານຈະພະຍາຍາມເຮັດສຸດຄວາມສາມາດຂອງຕົນ ເພື່ອຊຸກຍູ້ສົ່ງເສີມສາຍພົວພັນ ມິດຕະພາບທີ່ມີມູນເຊື້ອດີງາມ ແລະ ການຮ່ວມມືສອງຝ່າຍໃຫ້ຂະຫຍາຍຕົວຂຶ້ນໄປເລື້ອຍໆ. ພ້ອມນີ້, ທ່ານເອກອັກຄະລັດຖະທູດລາວກໍໄດ້ນໍາເອົາຄໍາອວຍພອນໄຊອັນປະເສີດຂອງ ພະນະທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວ ຝາກເຖິງພະນະທ່ານປະທານາທິບໍດີ ອັບເດວ ຟາຕາ ອາວ-ສິສິ ຈົ່ງມີສຸຂະພາບແຂງແຮງ, ມີພະລານາໄມສົມບູນ, ມີຄວາມຜາສຸກໃນຊີວິດສ່ວນຕົວ ແລະ ຄອບຄົວ ແລະ ໄດ້ຮັບຜົນສໍາເລັດໃນໜ້າທີ່ອັນສູງສົ່ງ.
ສປປ ລາວ ແລະ ສາທາລະນະລັດ ອາຣັບ ເອຢິບ ໄດ້ສ້າງຕັ້ງສາຍພົວພັນການທູດນໍາກັນໃນປີ 1976 ເຊິ່ງຈະໝູນວຽນບັນຈົບຮອບ 45 ປີ ໃນເດືອນພະຈິກ 2021 ທີ່ຈະມາເຖິງນີ້, ເຖິງວ່າສອງປະເທດມີພູມສາດກາຍຍະພາບທີ່ແຕກຕ່າງກັນ ແຕ່ກໍມີຫຼາຍທ່າແຮງ ແລະ ຄວາມອາດສາມາດທີ່ຈະຮ່ວມມື ແລະ ແລກປ່ຽນຖອດຖອນບົດຮຽນເຊິ່ງກັນ ແລະ ກັນໄດ້, ໂດຍສະເພາະການຄຸ້ມຄອງຊັບພະຍາກອນນໍ້າ ຊຶ່ງ ສປປ ລາວ ກໍມີແມ່ນໍ້າຂອງທີ່ຍາວຢຽດແຕ່ເໜືອເຖິງໃຕ້ ແລະ ເອຢິບກໍມີແມ່ນໍ້ານາຍ (Nile) ທີ່ມີຊື່ສຽງ ແລະ ຍາວທີ່ສຸດໃນໂລກປະມານ 6650 ກມ ໄຫຼຜ່ານແຕ່ໃຕ້ຫາເໜືອຂອງປະເທດ; ປະເທດເອຢິບຍັງມີບົດຮຽນໃນການຄຸ້ມຄອງການທ່ອງທ່ຽວ, ກະສິກໍາ ແລະ ອື່ນໆ. ໃນໄລຍະຜ່ານມາ, ເຖິງວ່າການພົວພັນ ແລະ ຮ່ວມມືຂອງສອງຝ່າຍໃນຫຼາຍດ້ານຍັງຢູ່ໃນຂອບເຂດຈໍາກັດ, ແຕ່ສອງຝ່າຍກໍໄດ້ພະຍາຍາມສ້າງເງື່ອນໄຂເອື້ອອໍານວຍ ເພື່ອຊຸກຍູ້ສົ່ງເສີມການພົວພັນ ແລະ ຮ່ວມມືດັ່ງກ່າວ ໃຫ້ຂະຫຍາຍຕົວຍິ່ງໆຂຶ້ນ. ການນໍາຂອງສອງປະເທດໄດ້ແລກປ່ຽນສານອວຍພອນ ແລະ ສານສະແດງຄວາມເຫັນອົກເຫັນໃຈຊຶ່ງກັນ ແລະ ກັນໃນໂອກາດສໍາຄັນຕ່າງໆ; ທັງສອງປະເທດກໍ່ໄດ້ແລກປ່ຽນການຢ້ຽມຢາມຊຶ່ງກັນ ແລະ ກັນຂອງຄະນະຜູ້ແທນໃນລະດັບຕ່າງໆ ແລະ ໄດ້ໃຫ້ການສະໜັບສະໜູນເຊິ່ງກັນ ແລະ ກັນໃນເວທີພາກພື້ນ ແລະ ສາກົນ. ໃນປີ 2001 ຫາ 2013, ລັດຖະບານເອຢິບໄດ້ໃຫ້ການຊ່ວຍເຫຼືອແກ່ ສປປ ລາວ ໃນດ້ານການພັດທະນາຊັບພະຍາກອນມະນຸດ, ໂດຍສະເພາະການສະໜອງທຶນການສຶກສາ 5 ທຶນ, ໃນນີ້ທາງດ້ານກະສິກໍາ 3 ທຶນ ແລະ ພາສາອາຣັບ 2 ທຶນ.
ສາທາລະນະລັດ ອາຣັບ ເອຢິບ ມີເນື້ອທີ່ທັງໝົດ 1,01 ລ້ານຕາຕະລາງກິໂລແມັດ ແລະ ມີປະຊາກອນທັງໝົດປະມານ100,4 ລ້ານຄົນ (ຕົວເລກໃນປີ 2019). ເອຢິບເປັນໜຶ່ງໃນບັນດາປະເທດທີ່ຕັ້ງຢູ່ໃນທະວີບອາຟຣິກາຕອນ ເໜືອທີ່ມີຊື່ສຽງໂດງດັງທີ່ສຸດທາງດ້ານການທ່ອງທ່ຽວໃນໂລກ, ໂດຍສະເພາະ ປີລະມິດ (Pyramid of Khafre) ທີ່ເປັນສະຖານທີ່ທ່ອງທ່ຽວບູຮານຄະດີ ທີ່ເກົ່າແກ່ຫຼາຍພັນປີ ຊຶ່ງໄດ້ນໍາລາຍໄດ້ຫຼັກມາສູ່ປະເທດຢ່າງຫຼວງຫຼາຍ.