ໃນຕອນ​ຄ່ຳ​ຂອງ​ວັນ​ທີ 19 ມີນາ 2021, ທີ່​ ໂຮງ​ແຮມ​ມີ​ເລຍ, ນະຄອນຫຼວງ​ຮ່າ​ໂນ້ຍ, ​ໄດ້​ມີ “ພິທີພົບປະເພື່ອນມິດສາກົນ ຂອງຄະນະ​ບໍລິຫານ​ງານຊາວໜຸ່ມກອມມູນິດໂຮ່ຈີມິນ, ເນື່ອງໃນໂອກາດສະເຫຼີມສະຫຼອງ 90 ປີ ວັນສ້າງຕັ້ງຄະນະຊາວ​ໜຸ່ມກອມມູນິດໂຮ່ຈິມິນ (ວັນ​ທີ 26 ມີນາ 1931-26 ມີນາ 2021), ໂດຍການເຂົ້າຮ່ວມຂອງ ສະຫາຍ ​ເລ ຮ່ວາຍ ຈູງ (Le Hoai Trung), ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດສູນ​ກາງ ​ພັກ​ກອມ​ມູນິດ​ຫວຽດນາມ, ສະຫາຍ ຮວ່າງ ບິ່ງ ກວນ, ອະດີດກຳມະການສູນກາງພັກ, ອະດີດຫົວໜ້າຄະນະພົວພັນຕ່າງປະເທດສູນ​ກາງ​ພັກ, ຜູ້ຕາງໜ້າການນຳບັນດາກະຊວງ, ຂະແໜງການຂອງສູນກາງ. ນອກ​ນັ້ນ, ​ຍັງ​ມີຜູ້ປະສານງານຂອງສະຫະປະຊາຊາດ ປະຈຳ ຫວຽດນາມ, ຜູ້ຕາງໜ້າບັນດາອົງການການທູດ, ບັນດາອົງການຈັດຕັ້ງສາກົນ ແລະ ບັນດາອົງການບໍ່ຂຶ້ນກັບລັດຖະບານຢູ່ຫວຽດນາມ ​ເຂົ້າ​ຮ່ວມ​ປະ​ມານ 200 ຄົນ.

ໃນ​ພິທີ ສະຫາຍ ຫງວຽນ  ​ແອ​ງ ຕ່ວນ (Nguyen Anh Tuan), ກຳມະການສູນກາງພັກ, ເລຂາທີໜຶ່ງຄະນະຊາວໜຸ່ມ, ປະທານສະຫະພັນຊາວໜຸ່ມຫວຽດນາມ ໃຫ້​ຮູ້ວ່າ: “ອາດຈະບໍ່ມີປະເທດ​ໃດໃນໂລກທີ່ຄືກັບຫວຽດນາມ ທີ່ໄດ້ກຳນົດ​ເອົາ 1 ​ເດືອນ ​ ໃນ 1 ປີ ໄວ້ໃນກົດໝາຍວ່າ​ດ້ວຍຊາວໜຸ່ມ, ໂດຍສະເພາະແມ່ນເດືອນມີນາຂອງ​ທຸກໆ​ປີ, ​ເປັນເດືອນຂອງຊາວໜຸ່ມຫວຽດນາມ ແລະ ເດືອນມີນາ ປີ 2021 ແມ່ນເດືອນຊາວໜຸ່ມທີ່ພິເສດ, ເມື່ອຊາວໜຸ່ມຫວຽດນາມ ຮ່ວມກັນສະເຫຼີມສະຫຼອງວັນສ້າງຕັ້ງຄະນະ​ບໍລິຫານ​ງານຊາວໜຸ່ມ ກອມມູນິດໂຮ່ຈິມິນ ຄົບຮອບ 90 ປີ.

ຕາງໜ້າຄະນະບໍລິຫານ​ງານ​ຊາວ​ໜຸ່ມ ສະຫາຍ ຫງວຽນ ​ແອ​ງ ຕ່ວນ ຢືນຢັນວ່າ: ຄະນະ​ບໍລິຫານ​ງານ​ຊາວ​ໜຸ່ມກອມມູນິດໂຮ່ຈີມິນ ຍາມໃດກໍ່ພ້ອມແລ້ວທີ່ຈະເປັນເພື່ອນມິດ, ຄູ່ຮ່ວມມືທີ່ໄວ້ເນື້ອເຊື່ອໃຈ ແລະ ມີຄວາມຮັບຜິດຊອບ ຕໍ່ບັນດາອົງການຊາວໜຸ່ມທີ່ກ້າວໜ້າ ແລະ ບັນດາອົງການຈັດ​ຕັ້ງຕ່າງປະເທດ, ອົງການຈັດຕັ້ງສາກົນ, ອົງການ​ຈັດ​ຕັ້ງທີ່​ບໍ່​ຂື້ນ​ກັບ​ລັດຖະບານ,  ບັນດາອົງການຈັດຕັ້ງບົນພື້ນຖານການໂຄສະນາຮ່ວມກັນໂດຍ​ສັນຕິ ແລະ ພ້ອມ​ກັນ​ພັດທະນາ.

ເນື່ອງໃນໂອກາດນີ້, ຄະນະບໍລິຫານ​ງານສູນກາງຊາວ​ໜຸ່ມ ໄດ້ມອບຫຼຽນກາ​ລະນຶກ​ເພື່ອ​ຄົນລຸ້ນໜຸ່ມ ​ເປັນ​ຫຼຽນອັນສູງສົງຂອງຄະນະຊາວໜຸ່ມກອມມູນິດໂຮ່ຈີມິນ ໃຫ້ແກ່ບຸກຄົນຕ່າງປະເທດ 15 ສະຫາຍ, ​ໃນ​​ນັ້ນ​ ມີການ​ນຳ​ສະຖານທູດ​ລາວ 3 ສະຫາຍ ຄື: ສະຫາຍ ​ແສງ​ເພັດ​ຮຸ່ງ  ບຸນ​ຍວງ, ​ເອກ​ອັກຄະ​ລັດຖະທູດ ວິສາມັນຜູ້​ມີ​ອຳນາດ​ເຕັມ  ​ແຫ່ງ ສປປ ລາວ ປະຈຳ ສສ. ຫວຽດນາມ, ສະຫາຍ ຈັນທະ​ພອນ ຄຳ​ມະນີ​ຈັນ, ຮອງຫົວໜ້າ​ສຳນັກງານສະຖານທູດ, ສະຫາຍ ຄຳ​ສິງ ດວງ​ວັນ​ດີ, ທີ່​ປຶກສາ,​ ​ກໍໄດ້​ຮັບ​ຫຼຽນ​ດັ່ງກ່າວ ໄດ້ປະກອບສ່ວນຫຼາຍຢ່າງ ເຂົ້າໃນການພັດທະນາຊາວໜຸ່ມຫວຽດນາມ, ແລະ ຊຸກຍູ້ການຮ່ວມມື ລະຫວ່າງ ຊາວໜຸ່ມ, ​ເຍົາວະ​ຊົນ​ລາວ​ກັບ​ຊາວ​ໜຸ່ມ, ​ເຍົາວະ​ຊົນ​ຫວຽດນາມ.