ໃນວັນທີ 31 ສິງຫາ 2021 ນີ້, ທີ່​ ສູນ​ຝຶກ​ແອບທະຫານ​ແຫ່ງ​ຊາດ​ທີ 4 ສສ ຫວຽດນາມ​ ໄດ້​ມີ​ພິທີ​ເປີດ​ການ​ແຂ່ງຂັນກິລາການທະຫານສາກົນ (ARMY GAMES 2021) ໂດຍການເຂົ້າຮ່ວມເປັນປະທານຂອງ ທ່ານ ພົນ​ໂທ ຫງວຽນ ​ເຕີນ ​ເກືອງ, ຫົວໜ້າກົມໃຫຍ່ເສນາທິການກອງທັບປະຊາຊົນຫວຽດນາມ, ຮອງລັດຖະມົນຕີ​ກະຊວງ​ປ້ອງ​ກັນ​ປະ​ເທດ​ຫວຽດນາມ, ພ້ອມດ້ວຍຄະນະນຳກະຊວງປ້ອງກັນປະເທດຫວຽດນາມ, ບັນດາທຸຕານຸທູດ, ທີ່ປຶກສາຝ່າຍປ້ອງກັນຊາດຂອງສະຖານທູດຕ່າງປະເທດ ປະຈຳ ສສ ຫວຽດນາມ ທີ່ມີທີມກິລາຂອງຕົນເຂົ້າຮ່ວມ, ບັນດາ​ນາຍ​,​ ພົນທະຫານ, ບັນດາທີມນັກກິລາທະຫານຈາກ 8 ປະເທດ ແລະ ກໍາມະການຕັດສິນ ເຂົ້າຮ່ວມຢ່າງພ້ອມພຽງ, ສຳລັບສະຖານທູດລາວ ປະຈຳ ຫວຽດນາມ ກໍມີ ທ່ານ ​ແສງ​ເພັດ ຮຸ່ງ​ບຸນ​ຍວງ, ເອກອັກຄະລັດຖະທູດວິສາມັນຜູ້​ມີ​ອຳນາດ​ເຕັມ ​ແຫ່ງ ສປປ ລາວ ປະຈຳ ສສ ຫວຽດນາມ, ທ່ານ ພັນ​ເອກ​ ວົງ​ໄຊ ອິນທະຄຳ ທີ່​ປຶກສາ​​ຝ່າຍປ້ອງ​ກັນຊາ​ດ ​ພ້ອມ​ຄະນະເຂົ້າຮ່ວມພິທີ.

ການ​ແຂ່ງ​ຂັນຄັ້ງ​ນີ້​ເປັນ​ຄັ້ງ​ທຳ​ອິດ​ທີ່ ຫວຽດນາມ ​ເປັນ​ເຈົ້າພາບໃນຂອບກິລາການທະຫານສາກົນ 2021​ ໂດຍ​ມີ ສອງ​ປະ​ເພດ​ກິລາແຂ່ງຂັນກັນ​ເຊັ່ນ: ການ​ແຂ່ງ​ຂັນກິລາ​ປະ​ເພດ​ຍິງປືນ (Sniper) ​ແລະ​ ການ​ແຂ່ງຂັນກິລາ​ກູ້​ໄພ​ສຸກ​ເສີນ. ໃນນີ້ກອງທັບປະຊາຊົນລາວ ໄດ້ສົ່ງທີມກູ້ໄພສຸກເສີນ ນຳໂດຍ: ທ່ານ ພັນໂທ ຄຳຟອງ ເກິ່ງທອນສິມ ພ້ອມດ້ວຍຄະນະ ຫົວໜ້າການທະຫານກອງພັນ 579, ກົມຊ່າງແສງ, ກົມໃຫຍ່ເສນາທິການກອງທັບ, ເປັນຫົວໜ້າຄະນະນັກກິລາທີມກູ້ໄພສຸກເສີນ, ພ້ອມດ້ວຍຄະນະ 17 ສະຫາຍ, ສຳລັບທີມ​ກິລາປະເທດຍິງປືນ (Sniper): ນຳ​ໂດຍ ທ່ານ ພັນຕີ ສູນທອນ ສົງຜາສຸກ, ຫົວໜ້າການທະຫານກອງຮ້ອຍ 1, ກອງພັນ 233, ກົມ 213, ເປັນຫົວໜ້າຄະນະ ພ້ອມດ້ວຍຄະນະ 7 ສະຫາຍ. ໃນນີ້​ ກິລາປະ​ເພດຍິງປືນມີ 7 ປະ​ເທດ​ ເຂົ້າ​ຮ່ວມ​ແຂ່ງຂັນ: ຫວຽດນາມ, ບັງ​ກ​ລາ​ເທດ, ​ເບ​ລາ​ຣຸດ, ລາວ, ລັດ​ເຊຍ , ອຸດສະ​ເບ​ກິ​ດສະຖານ ແລະ​ ເວ​​ເນຊູ​ເອລາ. ສ່ວນການ​ແຂ່ງຂັນກິລາ​ກູ້​ໄພ​ສຸກ​ເສີນ ມີ 5 ປະ​ເທດ​ເຂົ້າ​ຮ່ວມ: ຫວຽດນາມ, ​ເບ​ລາ​ຣຸດ, ລາວ, ມາລີ ​ແລະ ​ລັດ​ເຊຍ.

​ການ​ແຂ່ງ​ຂັນ​ກິລາການທະຫານສາກົນໃນຄັ້ງນີ້ ແມ່ນຈະໄດ້ດຳເນີນໄປຮອດວັນທີ 4 ກັນຍາ 2021​, ການຈັດແຂ່ງຂັນໃນຄັ້ງນີ້ແມ່ນມີຄວາມໝາຍຄວາມສຳຄັນຢ່າງຍິ່ງ ໃນສະພາບທີ່ຍັງມີການແຜ່ລະບາດຂອງເຊື້ອພະຍາດໂຄວິດ-19 ດ້ວຍເຫດນັ້ນປະເທດເຈົ້າພາບໄດ້ເປັນເຈົ້າການ ແລະ ໃຫ້ຄວາມເອົາໃຈໃສ່ເປັນພິເສດຕໍ່ຄະນະນັກກິລາ ແລະ ຄູຝຶກແຕ່ລະປະເທດ, ຮັບປະກັນໄດ້ສະຖານທີ່ພັກເຊົາ, ຄວາມປອດໄພ, ສະຖານທີ່ຝຶກແອບ, ສະຖານທີ່ແຂ່ງຂັນ, ວຽກງານພາລາທິການ ແລະ ສິ່ງສຳຄັນກໍແມ່ນການຮັບປະກັນບໍ່ໃຫ້ມີການຕິດເຊື້ອພະຍາດໂຄວິດ-19, ເຮັດໃຫ້ຫຼາຍປະເທດ ເຫັນໄດ້ເຖິງຄວາມພ້ອມ, ຄວາມ​ຮັບຜິດຊອບ​ສູງ, ຄວາມ​ສາມາດຂອງປະເທດເຈົ້າພາບ, ພ້ອມກັນນັ້ນ ກໍເປັນການຍົກສູງບົດບາດຂອງກອງທັບປະຊາຊົນຫວຽດນາມ ໃນເວທີສາກົນ ແລະ ພາກພື້ນ, ສ້າງຄວາມສາມັກຄີຮັກແພງ, ສາຍພົວພັນມິດຕະພາບ, ຄວາມເຂົ້າອົກເຂົ້າໃຈເຊິ່ງກັນ ແລະ ກັນ ລະຫວ່າງແຕ່ລະປະເທດ, ພ້ອມທັງເປັນການແລກປ່ຽນປະສົບການ ແລະ ບົດຮຽນຕົວຈິງຂອງແຕ່ລະປະເພດກິລາ.

ສຳລັບ​ຜົນ​ການ​ແຂ່ງຂັນ​ແຕ່ລະ​ປະ​ເພດ​ກິລາ ​ຈະ​ໄດ້​ປະກາດ​ ວັນ​ທີ 04 ກັນຍາ 2021 ຊຶ່ງ​ເປັນ​ມື້​ປິດການ​ແຂ່ງຂັນ.