ວັນ​ທີ 09 ກັນຍາ 2021 ທີ່​ສະຖານ​ທູດ​ແຫ່ງ ສປປ ລາວ ປະຈຳ ສສ ຫວຽດນາມ, ​ຄະນະ​ພັກ​ຮາກ​ຖານໄດ້​​ຈັດ​ຕັ້ງ​ການເຜີຍ​​​ແຜ່ເຊື່ອມ​ຊຶມ​ແລະ ຜັນ​ຂະຫຍາຍ​ມະຕິ​ກອງ​ປະຊຸມ​ໃຫຍ່ ຄັ້ງ​ທີ XI ຂອງ​ພັກ​ປະຊາຊົນ​ປະຕິ​ວັດ​ລາວ ​ແລະ ​ເອກະສານ​ກ່ຽວ​ກັບ​ວັນ​ລັດ​ທະ​ທຳ​ມະນູນ​ແຫ່ງ​ຊາດ​ຄົບຮອບ 30 ປີ​ ​(15/08/1991-15/08/2021) ພາຍໃຕ້​ການ​ເຂົ້າ​ຮ່ວມ​​ເປັນ​ປະທານ ​ແລະ​ ເຜີຍ​ແຜ່​ເອກະສານ ຂອງ ສະຫາຍ ​ແສງ​ເພັດ ຮຸ່ງ​ບຸນ​ຍວງ, ​ເລຂາ​ຄະນະ​ພັກ​ຮາກ​ຖານ ສະຖານ ທູດ , ​ເອກ​ອັກຄະ​ລັດຖະທູດ​ວິສາມັນຜູ້​ມີ​ອຳນາດ​ເຕັມ ​ແຫ່ງ ສປປ ລາວ ປະຈຳ ສສ ຫວຽດນາມ ໂດຍມີການ​ເຂົ້າ​ຮ່ວມ​ຮັບ​ຟັງ​ຂອງ​ຄະນະ​ພັກ, ຄະນະ​ນຳ​ພ້ອມ​ດ້ວຍພະນັກງານສະຖານທູດຢ່າງ​ພ້ອມພຽງ.

​​ເອກະສານທີ່​ນຳ​ມາ​​​ເຜີຍ​ແຜ່ປະກອບ​ມີ 4 ​ເອກະສານ​ດັ່ງ​ນີ້: ມະຕິ​ກອງ​ປະຊຸມ​ໃຫຍ່ ຄັ້ງ​ທີ XI ຂອງ​ພັກ​ປະຊາຊົນ ປະຕິວັດ​ລາວ, ​ບົດ​ລາຍ​ງານ​ການ​ເມືອງ​ຂອງ​ຄະນະ​ບໍລິຫານ​ງານ​ສູນ​ກາງ​ພັກ ສະ​ໄໝ​ທີ X ຕໍ່​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ ຄັ້ງ​ທີ XI ຂອງ​ພັກ​ປະຊາຊົນ ປະຕິວັດ​ລາວ, ກົດ​ລະບຽບ​ຂອງ​ພັກ​ຂອງ​ພັກ​ປະຊາຊົນ​ປະຕິວັດ​ລາວ ສະ​ໄໝ​ທີ XI ​ແລະ ເອກະສານ​ກ່ຽວ​ກັບວັນ​ລັດຖະທຳ​ມະນູນ​ແຫ່ງ​ຊາດ ຄົບຮອບ 30 ປີ.

​ໃນ​​ໂອກາດ​ດັ່ງກ່າວ ສະຫາຍ ​ແສງ​ເພັດ ຮຸ່ງ​ບຸນ​ຍວງ ​ໃຫ້​ຮູ້​ວ່າ: ບັນດາ​ເອກະສານ​ທີ່​ນຳ​ມາ​ເຜີຍ​ແຜ່​ ​ໃນ​ຄັ້ງ​ນີ້​ມີ​ຄວາມ​ໝາຍ​ຄວາມ​ສຳຄັນ​ຍິ່ງ​ສຳລັບ​ພະນັກງານ​ການ​ທູດ​ທີ່​ພວມ​ປະຕິບັດ​ໜ້າ​ທີ່ຢູ່​ຕ່າງປະ​ເທດ ​ໂດຍ​ສະ​ເພາະແມ່ນ ສະຖານ ທູດ ​​ແຫ່ງ ສປປ ລາວ ປະຈຳ ສສ ຫວຽດນາມ ​ເພື່ອ​ເປັນ​ການນຳ​ເອົາ​ຜົນສຳ​ເລັດ​ຂອງ​ກອງ​ປະຊຸມ​​ໃຫຍ່ ຄັ້ງ​ທີ XI ຂອງ​ພັກ​ປະຊາຊົນ ປະຕິວັດ​ລາວໄປ​ຄົ້ນ​ຄວ້າ ​ແລະ ຜັນ​ຂະຫຍາຍ​ເຂົ້າ​ໃນ​ວຽກ​ງານ​ຕົວ​ຈິງ​ເພື່ອ​ເສີມ​ຂະຫຍາຍ​ການ​ພົວພັນ​ຮ່ວມ​ມືກັບ​ບັນດາ​ປະ​ເທດ​ເພື່ອນ​ມິດ​​ຍຸດ​ທະ​ສາດ ​ໃຫ້ຂະຫຍາຍຕົວ​ສູ່ລະ​ດັບ​ສູງອັນ​ໃໝ່ ​ໂດຍ​ສະ​ເພາະ​ແມ່ນການ​ເສີມ​ຂະຫຍາຍສາຍ​ພົວພັນ​ມິດຕະພາບ​ອັນ​ຍິ່ງ​ໃຫຍ່, ຄວາມ​ສາມັກຄີ​ພິ​ເສດ ​ແລະ ການ​ຮ່ວມ​ມື​ຮອບດ້ານ​ລະຫວ່າງ​ລາວ-​ຫວຽດນາມ ​ໃຫ້ສືບ​ຕໍ່​ຂະຫຍາຍຕົວ​ສູ່​ລວງ​ເລິກ​ແທດ​ເໝາະກັບສະພາບ​ຕົວ​ຈິງ ​ແລະ ມີ​ປະສິດທິ​ຜົນ​ກວ່າ​ເກົ່າ.

ພ້ອມດຽວ​ກັນ​ນັ້ນ,​ ສະຫາຍ ​ແສງ​ເພັດ ຮຸ່ງ​ບຸນ​ຍວງ ຍັງໄດ້​ເນັ້ນ​ໃຫ້​ສະມາຊິກ​ພັກ, ພະນັກງານ​ແຕ່​ລະສະ​ຫາຍ​​ໃຫ້ກຳ​ໄດ້​ເນື້ອ​ໃນ​ຈິດ​ໃຈ, ບົດບາດ​ຂອງ​ພັກ​ປະຊາຊົນ​ປະຕິວັດ​ລາວ ​ໃນ​ການຊີ້ນໍາ ນໍາພາການ​ປະຕິບັດ​ສອງ​ໜ້າທີ່ຍຸດ​ທະ​ສາດ: ປົກ​ປັກ​ຮັກສາ ​ແລະ ສ້າງສາພັດທະນາ​ປະ​ເທດ, ຮຽກຮ້ອງ​ມາ​ຍັງ​ສະມາຊິກ​ພັກ​ພະນັກງານ​ສະຖານທູດ ກຳ​ໃຫ້​ເລິກ​ເຊິ່ງແນວທາງ ແລະ ​ນະ​ໂຍບາຍຂອງພັກ ແລະ ລັດ, ໜ້າທີ່​ແລະ ຂໍ້​ຫ້າມ​ທີ່​ໄດ້​ກຳນົດ​ໄວ້​ໃນ​ກົດ​ລະບຽບ​ຂອງ​ພັກ ນັບທັງວຽກງານການກໍ່ສ້າງ ແລະ ຂະຫຍາຍພັກ ​ໂດຍ​ສະ​ເພາະ​ແມ່ນ​ຫ້ອງການ​ພັກ ​ເພື່ອ​ນຳ​ໄປ​ເຜີຍ​ແຜ່ ​ແລະ ​ແນະນຳ​ໃຫ້​ແຕ່ລະ​ໜ່ວຍ​ພັກທີ່​ຂຶ້ນ​ກັບ ​ໃຫ້​ປະຕິບັດ​ຖືກຕ້ອງຕາ​ມກົດ​ລະບຽບ​ຂອງ​ພັກ​ວາງ​ອອກ.

​ ​          ຕອນ​ທ້າຍ, ສະຫາຍ ​ແສງ​ເພັດ ຮຸ່ງ​ບຸນ​ຍວງ​ ກໍໄດ້​ຍົກ​ໃຫ້​ເຫັນເຖິງປະຫວັດ​ຄວາມ​ເປັນ​ມາ, ຂະ​ບວນການ​ສ້າງ ແລະ ປັບປຸງ​ລັດຖະທຳ​ມະນູນ​​ ​ແລະ ຄວາມ​ໝາຍ, ​ຄວາມ​ສຳຄັນ​ຂອງ​ລັດຖະທໍາມະນູນ ນັບທັງການລະນຶກວັນ​ລັດຖະທຳ​ມະນູນ​ແຫ່ງ​ຊາດ​ຄົບຮອບ 30 ປີ.

ຂ່າວ ແລະ ພາບ: ​ໂອ​ລຳ ຈັນທະ​ວິ​ໄລ