ວັນທີ​ 1 ຕຸລາ​ 2021,​ ສະຖານເອກອັກຄະລັດຖະທູດ ສປປ ລາວ ປະຈຳ ຣາຊະອານາຈັກໄທ ໄດ້ຈັດກອງປະຊຸມເພື່ອເຜີຍແຜ່ເຊື່ອມຊຶມ 3 ເອກະສານ ກ່ຽວກັບ ລັດຖະທຳມະນູນ ແຫ່ງ ສປປ ລາວ; ວັນສ້າງຕັ້ງພັກຄອມມູນິດຈີນ ຄົບຮອບ 100 ປີ ແລະ​ ກົດລະບຽບຂອງພັກ ສະໄໝທີ XI​ ໂດຍ ສະຫາຍ ເລຂາໜ່ວຍພັກ ເຊິ່ງມີຄະນະພັກ, ຄະນະນຳສະຖານທູດ, ສະມາຊິກພັກ ແລະ ພະນັກງານເຂົ້າຮ່ວມທັງໝົດ 38​ ສະຫາຍ.

​

ການເຜີຍແຜ່ເຊື່ອມຊຶມເອກະສານໃນຄັ້ງນີ້, ບັນດາສະມາຊິກພັກ ແລະ ພະນັກງານທັງໝົດໄດ້ມີຄວາມຮັບຮູ້, ເຂົ້າໃຈ, ເຫັນໄດ້ເຖິງຄວາມໝາຍຄວາມສຳຄັນ ແລະ ບັນດາຜົນສຳເລັດທີ່ຍາດມາໄດ້ ຈາກການຈັດຕັ້ງປະຕິບັດລັດຖະທຳມະນູນ ແລະ ກົດໝາຍຂອງ ສປປ ລາວ, ການຈັດຕັ້ງປະຕິບັດລະບຽບຂອງພັກປະຊາຊົນປະຕິວັດລາວ       ສະໄໝທີ XI, ຜົນສຳເລັດຂອງການສ້າງສາພັດທະນາພັກຄອມມູນິດຈີນ ໃນໄລຍະ 100 ປີຜ່ານມາ, ການສ້າງສາຍພົວພັນມິດຕະພາບ, ການຮ່ວມມືອັນສະໜິດແໜ້ນ ແລະ ໝັ້ນຄົງຍາວນານລະຫວ່າງ ສອງພັກ, ສອງລັດຖະບານ ແລະ ປະຊາຊົນສອງຊາດ ລາວ-ຈີນ.