ໃນຕອນເຊົ້າຂອງວັນທີ 5 ຕຸລາ 2021, ທ່ານ ແສງ ສຸຂະທິວົງ, ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈຳຣາຊະອານາຈັກໄທ ທີ່ ບາງກອກ ໄດ້ຕ້ອນຮັບການເຂົ້າຢ້ຽມອຳລາຂອງ ທ່ານ ນາງ ມາເລຍ ອາລິເຊຍ ຄັດໂສນີ ເດ ສັນຊຽນ (Maria AliciaCuzzoni de Sonschein) ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສາທາລະນະລັດ ອາກຊັງຕິນ ປະຈຳ ສາທາລະນະລັດ ປະຊາທິປະໄຕ ປະຊາຊົນລາວ ທີ່ມີສຳນັກງານຕັ້ງຢູ່ບາງກອກ, ຣາຊະອານາຈັກໄທ ໃນໂອກາດທີ່ສຳເລັດໜ້າທີ່ການທູດຂອງທ່ານ.
ໃນໂອກາດດັ່ງກ່າວ, ທ່ານທູດ ແສງ ສຸຂະທິວົງ ໄດ້ຕາງໜ້າໃຫ້ ປະທານປະເທດ ແລະ ລັດຖະມົນຕີກະຊວງການຕ່າງປະເທດ ແຫ່ງ ສປປ. ລາວ ສະແດງຄວາມຊົມເຊີຍ ແລະ ຕີລາຄາສູງ ຕໍ່ຜົນສຳເລັດຂອງການປະຕິບັດໜ້າທີ່ການທູດຢ່າງຫ້າວຫັນ ຂອງ ທ່ານ ນາງ ມາເລຍ ອາລິເຊຍ ຄັດໂສນີ ເດ ສັນຊຽນ ໃນການສົ່ງເສີມສາຍພົວພັນມິດຕະພາບ ແລະ ການຮ່ວມມື ລະຫວ່າງ ສປປ ລາວ ແລະ ສາທາລະນະລັດ ອາກຊັງຕິນ ກໍຄືລະຫວ່າງສອງສະຖານເອກອັກຄະລັດຖະທູດ ລາວ ແລະ ອາກຊັງຕິນ ທີ່ບາງກອກ ໃຫ້ມີທ່າຂະຫຍາຍຕົວເພີ່ມຂື້ນ ທັງໃນຂອບການຮ່ວມມືສອງຝ່າຍ ແລະ ຫຼາຍຝ່າຍ ກໍຄືການສະໜັບສະໜູນຊຶ່ງກັນ ແລະ ກັນໃນເວທີສາກົນ ເພື່ອຜົນປະໂຫຍດຂອງສອງຝ່າຍລາວ ແລະ ອາກຊັງຕິນ.ທ່ານ ແສງ ສຸຂະທິວົງ ໄດ້ອວຍພອນທ່ານທູດ ອາກຊັງຕິນ ມີສຸຂະພາບເຂັ້ມແຂງ, ມີຄວາມຜາສຸກ, ເດີນທາງກັບຄືນປະເທດດ້ວຍຄວາມສະຫວັດດີພາບ ແລະ ຫວັງວ່າທ່ານທູດອາກຊັງຕິນ ຄົງຈະມີຄວາມຊົງຈຳອັນດີຕໍ່ ສປປ. ລາວ ແລະ ກັບຄືນມາຢ້ຽມຢາມທ່ອງທ່ຽວທີ່ ສປປ. ລາວ ອີກໃນອະນາຄົດ.
ທ່ານ ນາງ ມາເລຍ ອາລິເຊຍ ຄັດໂສນີ ເດ ສັນຊຽນ ໄດ້ສະແດງຄວາມຂອບໃຈ ທ່ານທູດ ແສງ ສຸຂະທິວົງ ທີ່ໄດ້ໃຫ້ກຽດຕ້ອນຮັບອັນອົບອຸ່ນ ແລະ ຂໍຝາກຄວາມຂອບໃຈຢ່າງສູງໄປຍັງພະນະທ່ານປະທານປະເທດ, ລັດຖະບານ ແລະ ປະຊາຊົນລາວ ທີ່ໄດ້ໃຫ້ການຮ່ວມມືທີ່ດີ ແລະ ອຳນວຍຄວາມສະດວກທຸກຢ່າງ ຕະຫຼອດໄລຍະການປະຕິບັດໜ້າທີ່ການທູດຂອງຕົນ ປະຈຳ ສປປ. ລາວ, ເຊິ່ງເຮັດໃຫ້ບັນລຸຜົນສຳເລັດຢ່າງຈົບງາມ. ພ້ອມນີ້, ທ່ານ ນາງ ມາເລຍ ອາລິເຊຍ ຄັດໂສນີ ເດ ສັນຊຽນ ໄດ້ສະແດງຄວາມດີໃຈ ແລະ ພາກພູມໃຈເປັນຢ່າງຍິ່ງທີ່ທ່ານໄດ້ມີໂອກາດໄປຢ້ຽມຢາມ ແລະ ທ່ຽວຊົມ ສະຖານທີ່ຕ່າງໆ ທີ່ນະຄອນຫຼວງວຽງຈັນ ແລະ ແຂວງຫຼວງພະບາງ ໃນໂອກາດທີ່ຕົນໄປຍື່ນສານຕາຕັ້ງຕໍ່ ພະນະທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປ.ລາວ ໃນປີ 2017 ແລະ ກໍຍັງໄດ້ພົບປະບັນດາຄະນຳຂອງກະຊວງການຕ່າງປະເທດ ແລະ ກະຊວງຂະແໜງການທີ່ກ່ຽວຂ້ອງຂອງ ສປປ. ລາວ ເພື່ອປຶກສາຫາລືໃນຫຼາຍຂົງເຂດວຽກງານ. ໃນຂະນະດຽວກັນ, ທ່ານ ທູດ ອາກຊັງຕິນ ໄດ້ສະແດງຄວາມເສຍດາຍທີ່ບໍ່ມີໂອກາດເດີນທາງໄປຢ້ຽມອຳລາການນຳ ຂອງ ສປປ ລາວ ແລະ ໄປທ່ຽວຊົມສະຖານທີ່ທຳມະຊາດ ແລະ ວັດທະນະທຳອັນສວຍງາມຂອງ ສປປ. ລາວ ຍ້ອນບັນຫາການແຜ່ລະບາດຂອງພະຍາດໂຄວິດ-19, ແຕ່ກໍຈະຊອກໂອກາດກັບໄປຢ້ຽມຢາມ ໃນຖານະນັກທ່ອງທ່ຽວ ເພາະ ສປປ ລາວ ມີສະຖານທີ່ທ່ອງທ່ຽວທີ່ສວຍສົດງົດງາມຫຼາຍແຫ່ງ.
ການພົວພັນ ແລະ ການຮ່ວມມືສອງຝ່າຍລາວ-ອາກຊັງຕິນແມ່ນຢູ່ໃນລະດັບປົກກະຕິດີ ໂດຍໄດ້ມີການແລກປ່ຽນສານອວຍພອນເຊິ່ງກັນ ແລະ ກັນເນື່ອງໃນໂອກາດວັນສຳຄັນຕ່າງໆຂອງຊາດ
ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ອາກຊັງຕິນໄດ້ສ້າງຕັ້ງສາຍພົວພັນການທູດນຳກັນໃນວັນທີ24 ກໍລະກົດ 1975.