ທ່ານ ນາງ ຄໍາເພົາ ເອີນທະວັນ, ເອກອັກຄະລັດຖະທູດ ສປປ ລາວ ປະຈໍາ ສປ ຈີນ ໄດ້ນໍາພາຄະນະສະຖານທູດລາວ ທີ່ນະຄອນຫຼວງປັກກິ່ງ ແລະ ສະຖານກົງສຸນໃຫຍ່ລາວ ທີ່ນະຄອນຊາງຊາ, ແຂວງຮູນານ ຕາງໜ້າລັດຖະບານເຂົ້າຮ່ວມງານສັບປະດາການແລກປ່ຽນການສຶກສາ ຈີນ-ອາຊຽນ ປະຈໍາປີ2021 ລະຫວ່າງ ວັນທີ 23 ຫາ 26 ກັນຍາ 2021ທີ່ນະຄອນກຸ້ຍຢາງ, ແຂວງກຸ້ຍໂຈວ. ພາຍໃຕ້ຫົວຂໍ້ ‘‘ຄວາມຮູ້ ແລະ ການປະຕິບັດຮ່ວມເປັນອັນດຽວ, ວິໄສທັດດ້ານການສຶກສາທີ່ຮ່ວມກັນກໍ່ສ້າງການຮ່ວມມື ເພື່ອການພັດທະນາແບບຍືນຍົງ’’, ຊຶ່ງພິທີເປີດງານທາງການໄດ້ຈັດຂຶ້ນ ໃນຕອນເຊົ້າຂອງວັນທີ 24 ກັນຍາ 2021, ໂດຍມີການນໍາຂັ້ນສູງຝ່າຍຈີນ ແລະ ການນຳຂັ້ນສູງຂອງບາງປະເທດອາຊຽນໄດ້ມີຄໍາເຫັນໃນພິທີເປີດທາງການ ແບບທັງອອນລາຍ ແລະ ອ໊ອບລາຍ. ໃນນີ້, ພະນະທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ ແລະ ທ່ານ ຮອງສາດສະດາຈານ, ປະລິນຍາເອກ ພຸດ ສີມມະລາວົງ, ລັດຖະມົນຕີກະຊວງສຶກສາທິການ ແລະ ກິລາ ກໍໄດ້ຕາງໜ້າລັດຖະບານ ສປປ ລາວ ມີຄໍາເຫັນໃນພິທີເປີດເຊັ່ນດຽວກັນ.

ໃນຕອນເຊົ້າຂອງວັນທີ 25 ກັນຍາ 2021, ທ່ານ ນາງ ຄໍາເພົາ ເອີນທະວັນ, ເອກອັກຄະລັດຖະທູດ ສປປ ລາວ ປະຈໍາ ສປ ຈີນ ໄດ້ເຂົ້າຮ່ວມກອງປະຊຸມສໍາມະນາ ກ່ຽວກັບ ການສົ່ງເສີມ ແລະ ການຟື້ນຟູວຽກງານອາຊິວະສຶກສາເຂດຫ່າງໄກສອກຫຼິກ ລະຫວ່າງ ແຂວງກຸ້ຍໂຈວ ກັບບັນດາປະເທດລຸ່ມແມ່ນໍ້າຂອງ-ແມ່ນໍ້າລ້ານຊ້າງ, ໂດຍໄດ້ຕີລາຄາສູງຕໍ່ງານສັບປະດາ ແລະ ງານສຳມະນາຄັ້ງນີ້ ທີ່ຈະເປັນເວທີອັນສຳຄັນໃນການສົ່ງເສີມການພົວພັນຮ່ວມມືທາງດ້ານການສຶກສາ, ວັດທະນະທໍາ, ການທ່ອງທ່ຽວ ແລະ ອື່ນໆ ລະຫວ່າງ ອາຊຽນ ກັບ ສປ ຈີນ ກໍຄື ສປປ ລາວ ກັບ ແຂວງກຸ້ຍໂຈວ, ໂດຍສະເພາະປີ 2021 ເປັນປີທີ່ມີຄວາມໝາຍສໍາຄັນກັບການພົວພັນຮ່ວມມືລະຫວ່າງ ສປປ ລາວ ກັບ ສປ ຈີນ ກໍ່ຄືອາຊຽນ ກັບ ສປ ຈີນ, ຊຶ່ງກໍ່ຄືເປັນປີຄົບຮອບ 60 ປີຂອງການສ້າງຕັ້ງສາຍພົວພັນການທູດລາວ-ຈີນ, ປີມິດຕະພາບລາວ-ຈີນ, ການເປັນຄູ່ຮ່ວມເຈລະຈາ ລະຫວ່າງ ອາຊຽນ ກັບ ສປ ຈີນ ຄົບຮອບ 30 ປີ ແລະຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ຄົບຮອບ 5 ປີ.

ພ້ອມນັ້ນ, ທ່ານ ເອກອັກຄະລັດຖະທູດລາວ ຍັງໄດ້ໃຫ້ສຳພາດຕໍ່ສື່ມວນຊົນຂອງແຂວງກຸ້ຍໂຈວ ແລະ ໄດ້ນຳພາຄະນະໃຫ້ຢ້ຽມຢາມສະຖານທີ່ສຳຄັນທາງປະຫວັດສາດ ແລະ ຫົວໜ່ວຍເສດຖະກິດຈຳນວນໜຶ່ງ. ໃນໂອກາດດັ່ງກ່າວນີ້,​ ທ່ານ ເອກອັກຄະລັດຖະທູດລາວ ພ້ອມດ້ວຍຄະນະໄດ້ເຂົ້າຢ້ຽມຂໍ່ານັບ ສະຫາຍ ນາງ ເສິນອີຊິນ, ກຳມະການສູນກາງພັກ, ເລຂາພັກແຂວງກຸ້ຍໂຈວ, ປະທານສະພາປະຊາຊົນແຂວງກຸ້ຍໂຈວໃນວັນທີ 23 ກັນຍາ 2021 ເພື່ອປືກສາຫາລືການພົວພັນສອງຝ່າຍລາວກັບແຂວງກຸ້ຍໂຈວ.

---------------//--------------