ຕອນບ່າຍວັນທີ 25/11/2021, ສະຖານທູດລາວ ທີ່ ນະຄອນຫຼວງຮ່າໂນ້ຍ ໄດ້ຈັດຕັ້ງການປາຖະກະຖາເນື່ອງໃນໂອກາດວັນຊາດທີ 02 ທັນວາ ຄົບຮອບ 46 ປີ ແລະ ວັນຄ້າຍວັນເກີດປະທານໄກສອນ ພົມວິຫານຄົບຮອບ 101 ປີ ແລະ ເອກະສານສຳຄັນຈຳນວນໜຶ່ງ ໂດຍການໃຫ້ກຽດເຂົ້າຮ່ວມເປັນປະທານຂອງ ສະຫາຍ ແສງເພັດ ຮຸ່ງບຸນຍວງ, ເລຂາຄະນະພັກຮາກຖານສະຖານທູດ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສສ ຫວຽດນາມ, ຊຶ່ງເຂົ້າຮ່ວມຮັບຟັງມີສະມາຊິກພັກ-ພະນັກງານສະຖານທູດ, ມີຫ້ອງການຜູ້ຕາງໜ້າ ປກສ ລາວ ປະຈຳ ສສ ຫວຽດນາມ, ຫ້ອງການຜູ້ຕາງໜ້າລັດວິສະຫະກິດການບິນລາວ ສາຂານະຄອນ ຫຼວງຮ່າໂນ້ຍ, ທັງໝົດຈຳນວນ 40 ສະຫາຍ.
ໃນການປະຖະກະຖາ ສະຫາຍ ແສງເພັດ ຮຸ່ງບຸນຍວງ ໄດ້ເລົ່າຄືນມູນເຊື້ອການປະຕິວັດ, ການຕໍ່ສູ້ອັນພິລະອາດຫານຂອງປະຊາຊົນລາວບັນດາເຜົ່າພາຍໃຕ້ການຊີ້ນຳ-ນຳພາຂອງພັກປະຊາຊົນປະຕິວັດລາວຜ່ານອຸປະສັກນານາປະການ ຈົນມາຮອດ ວັນທີ 02 ທັນວາ 1975 ຈຶ່ງໄດ້ສະຖາປະນາມາເປັນ ສາທາລະນະລັດ ປະຊາທິປະໄຕ ປະຊາຊົນລາວ ຢ່າງສົມບູນ, ດັ່ງຄໍາເວົ້າຂອງ ທ່ານປະທານ ໄກສອນ ພົມວິຫານໃນວັນທີ 02 ທັນວາ 1975 “ບໍ່ທັນມີເວລາໃດທີ່ປະຊາຊົນເຮົາ ຊຶ່ງເປັນຜູ້ສ້າງປະຫວັດສາດຂອງຊາດນັ້ນໄດ້ມາຍາດເອົາໄຊຊະນະຢ່າງສົມບູນ, ເຖິງຖອງ ແລະ ບໍລິບູນໄດ້ຢ່າງສະຫງ່າລາສີຄືແນວນີ້ຈັກເທື່ອ ໄຊຊະນະນັ້ນ ບໍ່ສະເພາະແຕ່ໄດ້ຟື້ນຟູຄວາມເປັນເອກລາດຂອງປະຊາຊົນເຮົາ, ຫາກຍັງເປັນຄັ້ງທຳອິດທີ່ປະຊາຊົນບັນດາເຜົ່າ ຜູ້ເຄີຍດຳລົງຊີວິດເປັນທາດ ໄດ້ກາຍມາເປັນເຈົ້າຂອງທີ່ແທ້ຈິງຂອງຊາດໜຶ່ງ ທີ່ມີເອກະລາດ, ມີອິດສະລະພາບຢ່າງສົມບູນ ແລະ ພວມກ້າວຂຶ້ນສັງຄົມນິຍົມ, ເຮັດໃຫ້ຄວາມມຸ່ງຫວັງອັນແຮງກ້າຂອງປະຊາຊົນລາວ ກໍຄືຂອງມວນມະນຸດປະກົດເປັນຈິງຢູ່ບົນຜືນແຜນດິນອັນແສນຮັກຂອງພວກເຮົາ”.
ພ້ອມດຽວກັນນັ້ນ, ສະຫາຍ ແສງເພັດຮຸ່ງບຸນຍວງ ກໍໄດ້ເລົ່າຄືນຊີວິດ ແລະ ພາລະກິດປະຕິວັດຂອງປະທານໄກສອນ ພົມວິຫານ ເນື່ອງໃນໂອກາດວັນຄ້າຍວັນເກີດຂອງປະທານ ຄົບຮອບ 101ປີ, ທ່ານປະທານໄກສອນ ພົມວິຫານ ແມ່ນລູກຮັກຫຼານແພງຂອງປະຊາຊົນລາວບັນດາເຜົ່າ, ແມ່ນຜູ້ຮັກຊາດ, ນັກປະຕິວັດທີ່ຍິ່ງໃຫຍ່ຂອງຊາດ, ວິລະບູລຸດ, ຜູ້ນຳຂອງພັກ-ລັດ, ທີ່ປີຊາສາມາດ, ສະຫຼາດສ່ອງໃສ ແລະ ມີຄວາມສະດຸ້ງໄວ. ນອກຈາກນີ້, ສະຫາຍ ແສງເພັດ ຮຸ່ງບຸນຍວງ ຍັງໄດ້ຮຽກຮ້ອງໃຫ້ພະນັກງານ, ນັກການທູດ, ບັນດາສະມາຊິກພັກ ທີ່ຮ່າໂນ້ຍ ຈົ່ງພ້ອມກັນຮຽນເອົາຄຸນສົມບັດສິນທຳປະຕິວັດຂອງປະທານໄກສອນ ພົມວິຫານ, ຮຽນເອົາທາດແທ້ປະຕິວັດຂອງເພິ່ນ, ຕ້ອງເພີ່ມທະວີຄວາມເປັນເອກະພາບ ແລະ ຄວາມສາມັກຄີພາຍໃນຊ່ວຍເຫຼືອເຊິ່ງກັນ ແລະ ກັນ ພ້ອມກັນປະຢັດມັດທະຍັດງົບປະມານ ແລະ ວັດຖຸສິ່ງຂອງສ່ວນລວມເພື່ອລະນຶກເຖິງຄຸນງາມຄວາມດີຂອງປະທານໃຫ້ຍືນຍົງຕະຫຼອດກາລະນານ.