ໃນຕອນເຊົ້າຂອງວັນທີ 30 ພະຈິກ 2021, ສປປ ລາວ ໃນຖານະເປັນປະເທດປະສານງານ ສຳລັບ ພາກພື້ນອາຊີຕາເວັນອອກ ຂອງເວທີປຶກສາຫາລືຂອບການຮ່ວມມື ອາຊີຕາເວັນອອກ ແລະ ອາເມລິກາລາຕິນ (Forum for East Asia and Latin America Cooperation ຫຼື FEALAC) ໄດ້ເປັນເຈົ້າພາບຈັດກອງປະຊຸມເຈົ້າໜ້າທີ່ອາວຸໂສ ເວທີປຶກສາຫາລືຂອບການຮ່ວມມື ລະຫວ່າງ ພາກພື້ນອາຊີຕາເວັນອອກ ແລະ ອາເມລິກາລາຕິນ ຄັ້ງທີ 21 (The 21st FEALAC SOM) ດ້ວຍຮູບແບບວິດີໂອທາງໄກ.
ໂດຍພາຍໃຕ້ການເປັນປະທານຮ່ວມຂອງ ທ່ານ ກິ່ງໂພແກ້ວ ພົມມະຫາໄຊ, ຫົວໜ້າກົມເສດຖະກິດ, ກະຊວງການຕ່າງປະເທດ ສປປ ລາວ, ທັງເປັນຫົວໜ້າເຈົ້າໜ້າທີ່ອາວຸໂສ FEALAC ຂອງ ສປປ ລາວ ແລະ ທ່ານ ນາງ GISSELLE RODRÍGUEZ FLORIMÓN, ຫົວໜ້າເຈົ້າໜ້າທີ່ອາວຸໂສ ແຫ່ງ ສາທາລະນະລັດ ໂດມິນິກັັນ, ທັງເປັນປະເທດປະສານງານ ສຳລັບ ພາກພື້ນ ອາເມລິກາລາຕິນ. ເຊິ່ງມີບັນດາຫົວໜ້າເຈົ້າໜ້າທີ່ອາວຸໂສ, ປະທານຮ່ວມໜ່ວຍງານບູລິມະສິດຂອງ FEALAC, ອົງການ UN ESCAP, UN ECLAC ແລະ ກອງເລຂາ FEALAC Cyber Secretariat ພ້ອມດ້ວຍ ຄະນະຜູ້ແທນເຂົ້າຮ່ວມ.
ຈຸດປະສົງຂອງກອງປະຊຸມແມ່ນເພື່ອປຶກສາຫາລື ແລະ ທົບທວນຄືນການຈັດຕັ້ງປະຕິບັດກິດຈະກຳຕ່າງໆ ພາຍໃຕ້ກົນໄກການຮ່ວມມືດັ່ງກ່າວ ພາຍຫລັງກອງປະຊຸມລັດຖະມົນຕີຕ່າງປະເທດ FEALAC ຄັ້ງທີ 9 ໃນປີ 2019 ຜ່ານມາ ແລະ ແຜນການໃໝ່ໃນຕໍ່ໜ້າ, ພ້ອມນັ້ນ, ບັນດາເຈົ້າໜ້າທີ່ອາວຸໂສ ໄດ້ຮ່ວມກັນປຶກສາຫາລື ຮ່າງ ເອກະສານແນວຄວາມຄິດ (Concept Note) ກ່ຽວກັບ ການໝູນວຽນເປັນປະເທດປະເທດປະສານງານຕາມຕົວສອນພາສາອັງກິດ (Draft Concept Note on Rotating Mechanism of FEALAC Regional Coordinators) ຊຶ່ງຮ່າງຂຶ້ນໂດຍ ສປປ ລາວ, ລວມທັງການປຶກສາຫາລື ການກະກຽມໃຫ້ແກ່ກອງປະຊຸມລັດຖະມົນຕີຕ່າງປະເທດ FEALAC ຄັ້ງຕໍ່ໄປ. ນອກນັ້ນ,ກອງປະຊຸມ ໄດ້ຮັບຟັງການລາຍງານຜົນກອງປະຊຸມ ຂອງ 4 ໜ່ວຍງານວິຊາການ ຄື: 1) ໜ່ວຍງານການຮ່ວມມືດ້ານສັງຄົມ-ການເມືອງ, ແລະ ການພັດທະນາແບບຍືນຍົງ; 2) ໜ່ວຍງານການຮ່ວມມືດ້ານການຄ້າ, ການລົງທຶນ, ການທ່ອງທ່ຽວ, ຈຸລະວິສາຫະກິດ, ແລະ ວິສາຫະກິດຂະໜາດນ້ອຍ ແລະ ຂະໜາດກາງ; 3) ໜ່ວຍງານການຮ່ວມມືດ້ານວັດທະນະທໍາ, ຊາວໜຸ່ມ, ແລະ ກິລາ; 4) ໜ່ວຍງານການຮ່ວມມືດ້ານວິທະຍາສາດ, ເຕັກໂນໂລຊີ, ນະວັດຕະກໍາ ແລະ ການສຶກສາ, ລວມທັງການຮັບຟັງການລາຍງານຂອງຄະນະກຳມະການກອງທຶນຟີແລັກ.
ກອງປະຊຸມ FEALAC SOM ແມ່ນກອງປະຊຸມ ປະຈຳປີ ໂດຍ ປະເທດປະສານງານຂອງສອງພາກພື້ນຈະໄດ້ຜັນປ່ຽນກັນເປັນເຈົ້າພາບຈັດ.
ສະມາຊິກ FEALAC ປະຈຸບັນ ປະກອບມີ 36 ປະເທດ ຄື: ພາກພື້ນອາຊີຕາເວັນອອກ ມີ 16 ປະເທດ: 10 ປະເທດອາຊຽນ, ອົດສະຕາລີ, ສປ.ຈີນ, ຢີ່ປຸ່ນ, ສ.ເກົາຫຼີ, ນິວຊີແລນ ແລະ ມົງໂກລີ. ພາກພື້ນອາເມລິກາລາຕິນ ມີ 20 ປະເທດ: ອາກຊັງຕິນ, ໂບລີວີ, ບຣາຊິນ, ຊີເລ, ໂກໂລມບີ, ໂກສະຕາຣິກາ, ກູບາ, ໂດມິນິກັນ, ເອກວາດໍ, ແອນຊານວາດໍ, ກົວເຕມາລາ, ຮົງດູຣັດ (Honduras), ເມັກຊິກ, ນິກາຣາກວາ, ປານາມາ, ປຣາກວາຍ, ເປຣູ, ຊູຣິນາມ, ອູຣູກວາຍ ແລະ ເວເນຊູເອລາ.