ໃນວັນທີ 10 ທັນວາ 2021, ທ່ານລັດສະໝີ ແກ້ວມະນີ ໄດ້ເຂົ້າຍື່ນສານຕາຕັ້ງຕໍ່ ເຈົ້າຊາຍ ອາໂລອິດສ ແຫ່ງ ລາຊະອານາຈັກ ເລັກເຕນສະເຕນທີ່ນະຄອນຫຼວງວາດຸສ໌, ເພື່ອດໍາລົງຕໍາແໜ່ງເປັນເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈໍາ ລາຊະອານາຈັກ ເລັກເຕິນສະເຕນ ທີ່ມີສໍານັກງານຕັ້ງຢູ່ ເຊີແນວ ປະເທດ ສະວິດສ.
ພາຍຫລັງພິທີຍື່ນສານ, ທ່ານທູດ ລັດສະໝີແກ້ວມະນີໄດ້ພົບປະໂອ້ລົມກັບ ເຈົ້າຊາຍ ອາໂລອິດສດ້ວຍບັນຍາກາດອັນສະນິດສະໜົມແລະເຕັມໄປດ້ວຍມິດໄມຕີ. ທັງສອງຝ່າຍໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືສອງຝ່າຍ ລາວ-ເລັກເຕິນສະເຕນ ແລະ ປະສານງານພາຍໃຕ້ຂອບ ສປຊ. ທ່ານທູດ ລັດສະໝີ ແກ້ວມະນີ ໄດ້ນໍາເອົາຄວາມຢື້ຢາມຖາມຂ່າວອັນອົບອຸ່ນແລະ ພອນໄຊອັນປະເສີດຈາກ ພະນະທ່ານ ທອງລຸນ ສີສຸລິດ, ປະທານປະເທດ ແຫ່ງ ສປປ ລາວໄປຍັງເຈົ້າຊາຍ ຮັນສ ອາດາມ ທີ II ແລະ ຜ່ານເຈົ້າຊາຍໄປຍັງລັດຖະບານ ແລະ ປະຊາຊົນເລັກເຕນສະເຕນ ທຸກຖ້ວນໜ້າ.
ທ່ານທູດ ລັດສະໝີ ແກ້ວມະນີ ຍັງໄດ້ແຈ້ງກ່ຽວກັບສະພາບການພັດທະນາເສດຖະກິດ-ສັງຄົມ ຂອງ ສປປ ລາວ ກໍຄືຄວາມພະຍາຍາມຂອງລັດຖະບານ ເພື່ອນໍາເອົາປະເທດຫລຸດພົ້ນອອກຈາກສະຖານະພາບປະເທດດ້ອຍພັດທະນາ ໃນປີ 2026 ລວມທັງການຟື້ນຟູເສດຖະກິດ-ສັງຄົມ ທີ່ໄດ້ຮັບຜົນກະທົບຈາກການແຜ່ລະບາດ ຂອງ ພະຍາດໂຄວິດ-19. ພ້ອມກັນນັ້ນ, ທ່ານທູດ ລັດສະໝີ ແກ້ວມະນີກໍໄດ້ເຊີນຊວນພາກລັດຖະບານ ກໍຄືພາກທຸລະກິດຂອງເລັກເຕນສະເຕນໄປຢູ່ຢ້ຽມຢາມ-ພົບປະ-ເຮັດວຽກ ເພື່ອສຶກສາທ່າແຮງ ແລະ ຄວາມເປັນໄປໄດ້ໃນການດໍາເນີນທຸລະກິດ ແລະ ລົງທຶນຢູ່ ສປປ ລາວ ໃນບັນດາຂະແໜງການທີ່ເລັກເຕິນສະເຕນມີທ່າແຮງ ແລະ ມີຄວາມອາດສາມາດແຂ່ງຂັນເຊັ່ນ: ການທ່ອງທ່ຽວ, ອຸດສະຫະກໍາປຸງແຕ່ງ, ກະສິກໍາ ແລະ ການເງິນ-ທະນາຄານ.
ໃນໂອກາດດັ່ງກ່າວ, ເຈົ້າຊາຍ ອາໂລອິດສ ແຫ່ງ ລາຊະອານາຈັກ ເລັກເຕນສະເຕນກໍໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ການມາດໍາລົງຕໍາແໜ່ງເປັນເອກອັກຄະລັດຖະທູດ ແຫ່ງ ສປປ ລາວ ຄົນໃໝ່ປະຈໍາ ລາຊະອານາຈັກ ເລັກເຕນສະເຕນ ຂອງທ່ານລັດສະໝີແກ້ວມະນີ ແລະຫວັງວ່າສາຍພົວພັນມິດຕະພາບ ແລະ ການຮ່ວມມືສອງຝ່າຍ ເລັກເຕນສະເຕນ-ລາວ ຈະນັບມື້ນັບຈະເລີນງອກງາມ ແລະ ເປັນຮູບປະທໍາຫຼາຍຂຶ້ນ. ພ້ອມນີ້, ເຈົ້າຊາຍ ອາໂລອິດສ ກໍໄດ້ຝາກຄວາມຢື້ຢາມຖາມຂ່າວເຖິງ ພະນະທ່ານທອງລຸນສີສຸລິດ, ປະທານປະເທດແຫ່ງສປປລາວ.
ນອກຈາກນີ້, ທ່ານທູດລັດສະໝີແກ້ວມະນີກໍໄດ້ເຂົ້າຢ້ຽມຂໍ່ານັບທ່ານນາງ Dominique Hasler, ລັດຖະມົນຕີການຕ່າງປະເທດ, ການສຶກສາ ແລະ ກິລາ ແລະ ທ່ານ Martin Frick, ຫົວໜ້າຫ້ອງການກະຊວງຕ່າງປະເທດ, ເຊິ່ງທັງສອງຝ່າຍໄດ້ປຶກສາຫາລື ແນ່ໃສ່ສົ່ງເສີມການຮ່ວມມືທັງຂອບສອງຝ່າຍ ສປປ ລາວ-ເລັກເຕນສະເຕນ ແລະຂອບຫລາຍຝ່າຍ ພາຍໃຕ້ອົງການ ສປຊ ໃຫ້ນັບມື້ນັບເພີ່ມທະວີ.