ໃນຕອນເຊົ້າຂອງວັນທີ 11 ມີນາ 2022, ທີ່ ສະຖາບັນການຕ່າງປະເທດ ໄດ້ຈັດກອງປະຊຸມສໍາມະນາວິຊາການ ພາຍໃຕ້ຫົວຂໍ້: “ສະພາບການສາກົນທີ່ພົ້ນເດັ່ນ” ໂດຍການເປັນປະທານກ່າວເປີດ-ປິດ ແລະ ດໍາເນີນກອງປະຊຸມຂອງ ທ່ານ ໄມ ໄຊຍະວົງສ໌, ຫົວໜ້າສະຖາບັນການຕ່າງປະເທດ.
ກອງປະຊຸມສຳມະນາວິຊາການຄັ້ງນີ້ໄດ້ຮັບກຽດບັນຍາຍໂດຍ ປະທານ, ຮອງປະທານ ແລະ ສະມາຊິກ ສະໂມສອນນັກການທູດລາວ ທີ່ມີສຳນັກງານຕັ້ງຢູ່ສະຖາບັນການຕ່າງປະເທດ, ເຊິ່ງມີຜູ້ເຂົ້າຮ່ວມຈາກບັນດາກົມກ່ຽວຂ້ອງພາຍໃນກະຊວງການຕ່າງປະເທດ, ຄະນະພົວພັນຕ່າງປະເທດສູນກາງພັກ, ຄະນະໂຄສະນາອົບຮົມສູນກາງພັກ, ສະຖາບັນການເມືອງ-ການປົກຄອງແຫ່ງຊາດ, ສະຖາບັນວິທະຍາສາດ ເສດຖະກິດ-ສັງຄົມແຫ່ງຊາດ, ມະຫາວິທະຍາໄລແຫ່ງຊາດ ຈໍານວນທັງໝົດ 50 ທ່ານ.
ຈຸດປະສົງເພື່ອແລກປ່ຽນຄຳຄິດຄຳເຫັນ ກ່ຽວກັບ ສະພາບການສາກົນທີ່ພົ້ນເດັ່ນ ເພື່ອເປັນຂໍ້ມູນທາງດ້ານວິຊາການໃຫ້ແກ່ພາກສ່ວນກ່ຽວຂ້ອງທີ່ເຂົ້າຮ່ວມກອງປະຊຸມ ນໍາໄປເປັນບ່ອນອີງໃນການຄົ້ນຄວ້າວິໃຈບັນຫາພົ້ນເດັ່ນພາກພື້ນ ແລະ ສາກົນທີ່ເກີດຂຶ້ນໃນແຕ່ລະໄລຍະ, ການຈັດກອງປະຊຸມວິຊາການເປັນກິດຈະກໍາໜຶ່ງທີ່ສຳຄັນຂອງສະໂມສອນນັກການທູດລາວ ເຊິ່ງໄດ້ຈັດຂຶ້ນເປັນປົກກະຕິ. ກອງປະຊຸມສຳມະນາວິຊາການໃນຄັ້ງນີ້ໄດ້ລົງເລິກແລກປ່ຽນກັບກ່ຽວກັບບັນຫາອູກຣາອິນ ເຊິ່ງເປັນບັນຫາທີ່ຊາວໂລກໃຫ້ການຕິດຕາມຢ່າງໃກ້ຊິດ, ເຊິ່ງປະກອບດ້ວຍສອງວາລະຄື: ວາລະທີ 1): ສະພາບລວມຂອງອູກຣາອິນ (ທີ່ຕັ້ງພູມສາດ, ລະບົບການເມືອງ, ສະພາບເສດຖະກິດ-ການເມືອງ, ການພົວພັນກັບຕ່າງປະເທດ); ສາເຫດຕົ້ນຕໍຂອງການປະຕິບັດການທາງທະຫານຕໍ່ອູກຣາອິນຂອງຣັດເຊຍ; 2) ທັດສະນະຂອງຝ່າຍຕ່າງໆຕໍ່ກັບສະພາບການຢູ່ອູກຣາອິນ; ຜົນສະທ້ອນຕໍ່ພາກພື້ນ ແລະ ສາກົນ; ຜົນກະທົບຈາກມາດຕະການຂວໍ້າບາດຝ່າຍດຽວຕໍ່ຣັດເຊຍ ແລະ ຄາດຄະເນສະຖານະການໃນຕໍ່ໜ້າ.
ຜູ້ເຂົ້າຮ່ວມຫຼາຍທ່ານຕີລາຄາວ່າການທີ່ຝ່າຍກົງກັນຂ້າມ ລໍ້າເສັ້ນແດງທາງດ້ານຄວາມໝັ້ນຄົງຂອງຣັດເຊຍ ອາດເປັນສາເຫດສຳຄັນເຮັດໃຫ້ຣັດເຊຍຈຳເປັນຕ້ອງນຳໃຊ້ມາດຕະການທາງທະຫານໃນຄັ້ງນີ້, ເຖິງຢ່າງໃດກໍຕາມການແກ້ໄຂບັນຫາໂດຍທາງສັນຕິວິທີ (ທາງການທູດ) ຍັງຄົງເປັນທາງເລືອກທີ່ດີທີ່ສຸດໃນການແກ້ໄຂບັນຫາ, ຈາກປະຫວັດສາດການພົວພັນສາກົນ ການຂວໍ້າບາດອາດບໍ່ແມ່ນທາງອອກທີ່ດີໃນການແກ້ໄຂບັນຫາ, ການຊ່ວຍ ເຫຼືອທາງດ້ານມະນຸດສະທຳຕໍ່ປະຊາຊົນຊາວອູກຣາອິນເຫັນວ່າມີຄວາມຈຳເປັນອັນຮິບດ່ວນ. ນອກນັ້ນ, ຜູ້ເຂົ້າຮ່ວມຍັງມີຄວາມເຊື່ອໝັ້ນວ່າພາຍໃຕ້ຄວາມພະຍາຍາມຂອງອົງການສະຫະປະຊາຊາດ, ຝ່າຍກ່ຽວຂ້ອງ ແລະ ປະຊາຄົມໂລກ ບັນຫາບັນຫາອູກຣາອິນ ຈະໄດ້ຮັບການແກ້ໄຂໂດຍໄວ ແລະ ພ້ອມກັນຟື້ນຟູເສດຖະກິດໂລກໃຫ້ກັບເຂົ້າສູ່ສະພາບປົກກະຕິ.