ໃນວັນທີ 23 ກໍລະກົດ 2022, ສະຖານເອກອັກຄະລັດຖະທູດ ແຫ່ງ ສປປ ລາວ ປະຈໍາ ສິງກະໂປ ໄດ້ຈັດພິທີສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວ ຄົບຮອບ 67 ປີ ຂຶ້ນ ທີ່ ເຮືອນພັກສະຖານທູດ, ໂດຍການໃຫ້ກຽດເຂົ້າຮ່ວມຂອງ ທ່ານ ແສງແກ້ວ ປວງປະດິດ, ເອກອັກຄະລັດຖະທູດ ແຫ່ງ ສປປ ລາວ ປະຈໍາ ສິງກະໂປ, ມີຫົວໜ້າຫ້ອງການ, ພະນັກງານສະຖານທູດ, ນັກຮຽນ, ນັກສຶກສາ ແລະ ພີ່ນ້ອງເຊື້ອຊາດລາວທີ່ດໍາລົງຊີວິດຢູ່ສິງກະໂປ ເຂົ້າຮ່ວມທັງໝົດ ຈຳນວນ 40 ຄົນ.
ໃນພິທີ, ທ່ານເອກອັກຄະລັດຖະທູດ ໄດ້ເລົ່າຄືນເຖິງມູນເຊື້ອປະຫວັດການກໍາເນີດ, ການເຕີບໃຫຍ່ຂະຫຍາຍຕົວ ແລະ ຜົນງານການເຄື່ອນໄຫວຂອງເອື້ອຍນ້ອງແມ່ຍິງລາວບັນດາເຜົ່າ ທີ່ໄດ້ອຸທິດຕົນເພື່ອພາລະກິດຕໍ່ສູ້ປົດປ່ອຍປະເທດຊາດ, ປົກປັກຮັກສາ ແລະ ສ້າງສາພັດທະນາປະເທດຊາດ ຕະຫຼອດໄລຍະ 67 ປີ ທີ່ຜ່ານມາ ເພື່ອໃຫ້ເອື້ອຍນ້ອງແມ່ຍິງລູກຫຼານທີ່ເກີດໃໝ່ໃຫຍ່ລຸນ ໄດ້ສືບຕໍ່ຮໍ່າຮຽນເອົາຄຸນງາມຄວາມດີ ແລະ ຮັກສາມູນເຊື້ອອັນດີງາມໄວ້ໃຫ້ລູກຫຼານສືບທອດຕໍ່ໆໄປ ໂດຍສະເພາະແມ່ນ ນັກຮຽນ, ນັກສຶກສາ ທີ່ດໍາລົງຊີວິດຢູ່ສິງກະໂປ ໃຫ້ມີຄວາມເອົາໃຈໃສ່ ແລະ ຕັ້ງໃຈສຶກສາຮໍ່າຮຽນ ເພື່ອຍາດເອົາຄວາມຮູ້ຄວາມສາມາດ ແລະ ເກັບກ່ຽວປະສົບການໃນດ້ານຕ່າາໆ ກັບຄືນເມືອພັດທະນາບ້ານເກີດເມືອງນອນຂອງຕົນ.
ໃນໂອກາດສຳຄັນນີ້, ທ່ານເອກອັກຄະລັດຖະທູດ ກໍໄດ້ຖືໂອກາດພົບປະໂອ້ລົມ ແລະ ສະແດງຄວາມຢື້ຢາມຖາມຂ່າວ ກັບພີ່ນ້ອງເຊື້ອຊາດລາວທີ່ດໍາລົງຊີວິດຢູ່ສິງກະໂປ, ພ້ອມທັງເຜີຍແຜ່ຂໍ້ມູນຂ່າວສານຄວາມເປັນຈິງ ກ່ຽວກັບປະເທດລາວ ໃຫ້ເຂົາເຈົ້າໄດ້ຮັບຮູ້ ແລະ ເຂົ້າໃຈຢ່າງຖືກຕ້ອງເຖິງແນວທາງນະໂຍບາຍຂອງພັກ ແລະ ລັດຖະບານ ຂອງ ສປປ ລາວ, ຊຶ່ງຍາມໃດກໍມີຄວາມເປັນຫວ່ງເປັນໃຍຕໍ່ພີ່ນ້ອງເຊື້ອຊາດລາວທີ່ດໍາລົງຊີວິດຢູ່ຕ່າງປະເທດ ໃຫ້ມີຄວາມຮັກ ແພງບ້ານເກີດເມືອງນອນ, ມີຄວາມສາມັກຄີຮັກແພງຊ່ວຍເຫຼືອເຊິ່ງກັນ ແລະ ກັນ, ສົ່ງເສີມອະນຸລັກຮັກສາວັດທະນະທໍາ ແລະ ຮີດຄອງປະເພນີອັນດີງາມຂອງຊາດລາວ ໄວ້ໃຫ້ລູກຫຼານຮຸ່ນໃໝ່ໄດ້ສືບທອດຕໍ່ໆກັນໄປ.
ພາຍຫຼັງສຳເລັດພິທີ, ທ່ານເອກອັກຄະລັດຖະທູດ ກໍໄດ້ເຊື້ອເຊີນບັນດາແຂກ ແລະ ລູກຫຼານເຊື້ອຊາດລາວທີ່ມາຮ່ວມງານດັ່ງກ່າວ ຮັບປະທານອາຫານຄໍ່າຮ່ວມກັນ, ຊຶ່ງບັນຍາກາດໃນການສະເຫຼີມສະຫຼອງໃນຄັ້ງນີ້ ແມ່ນດຳເນີນໄປດ້ວຍໄມຕີຈິດມິດຕະພາບ, ມີຄວາມເບີກບານມ່ວນຊື່ນ ແລະ ເປັນກັນເອງ, ຊຶ່ງສະແດງເຖິງການຮັກສາໄດ້ຄວາມສາມັກຄີ ແລະ ຄວາມຮັກແພງເຊິ່ງກັນ ແລະ ກັນ.