ໃນວັນທີ 9 ມີ​ນາ 2023 ທີ່ ນະຄອນຫລວງໂຣມ, ສາທາລະນະລັດ ​ອິ​ຕາ​ລີ, ທ່ານ ລັດສະໝີ ແກ້ວມະນີ ໄດ້ເຂົ້າຍື່ນສານຕາຕັ້ງຕໍ່ພະນະທ່ານ ເຊີ​ຈິ​ໂອ ມັດ​ຕາ​ແຣນ​ລາ (H.E. Mr. Sergio Mattarella), ປະທານາທິບໍດີ ແຫ່ງ ສ.   ​ອີ​ຕາລີ  ເພື່ອດຳລົງຕຳແໜ່ງເປັນເອກອັກຄະລັດຖະທູດ ວິສາມັນ ຜູ້ມີອຳນາດເຕັມແຫ່ງ ສປປ ລາວ ປະຈຳ ສາທາລະນະລັດ ອິ​ຕາ​ລີ, ເຊິ່ງມີສຳນັກງານຕັ້ງຢູ່ ເຊີແນວ, ປະເທດ ສະວິດສ໌.

ພາຍຫລັງການຍື່ນສານ, ທ່ານທູດລາວຄົນໃໝ່ໄດ້ເຂົ້າພົບປະໂອ້ລົມ ກັບພະນະທ່ານປະທານາທິບໍດີ, ເຊິ່ງໄດ້ນຳເອົາຄວາມຢື້ຢາມຖາມຂ່າວອັນອົບອຸ່ນ ແລະພອນໄຊອັນປະເສີດ ຈາກ ພະນະທ່ານ ທອງລຸນ ສີສຸລິດ, ປະທານປະເທດ ແຫ່ງ ສປປ ລາວ ສົ່ງເຖິງ ພະນະທ່ານ ເຊີ​ຈິ​ໂອ ມັດ​ຕາ​ແຣນ​ລາ ແລະ ຜ່ານພະນະທ່ານໄປຍັງລັດຖະບານ ແລະ ປະຊາຊົນ  ອີ​ຕາ​ລີ ທຸກຖ້ວນໜ້າ.

ໃນ​ໂອ​ກາດ​ນີ້, ທ່ານ​ທູດໄດ້ສະແດງຄວາມຊົມເຊີຍຕໍ່ຜົນສຳເລັດໃນການພັດທະນາເສດຖະກິດ-ສັງຄົມ ຂອງ      ອີ​ຕາ​ລີ ໃນໄລຍະຜ່ານມາ ໂດຍສະ​ເພາະໃນ​ໄລ​ຍະ​ການ​ແຜ່​ລະ​ບາດ ຂອງພະ​ຍາດ​ໂຄວິດ-19. ພ້ອມນີ້, ຍັງໄດ້​ຕີລາຄາສູງ ຕໍ່ຜົນສໍາເລັດໃນການພົວພັນຮ່ວມມືສອງຝ່າຍ ລາວ-ອີຕາລີ ໃນໄລຍະຜ່ານມາ, ເຊິ່ງສະແດງອອກໃນການແລກປ່ຽນ-ຢ້ຽມຢາມ ຂອງ ຄະນະຜູ້ແທນລະດັບສູງຂອງທັງສອງປະເທດຢ່າງເປັນປົກກະຕິ, ການໃຫ້ການຊ່ວຍເຫລືອເພື່ອ     ການພັດທະນາ ແກ່ ສປປ ລາວ, ແລະການສະໜັບສະໜູນເຊິ່ງກັນ ແລະ ກັນ ໃນຂອບກອງປະຊຸມອາຊີ-ເອີຣົບ (ອາເຊັມ), ຂອບອາຊຽນ- ອີຢູ ແລະຂອບ ສປຊ. ນອກຈາກນີ້, ທ່ານ ທູດ​ຍັງ​ໄດ້​ແຈ້ງສະພາບ​ການ​ພັດ​ທະ​ນາ​ເສດ​ຖະ​ກິດ-ສັງ​ຄົມ ຂອງ ສ​ປ​ປ ລາວ ລວມ​ທັງ​ກາ​ນ​ຈັດ​ຕັ້ງ​ປະ​ຕິ​ບັດແຜນພັດທະນາເສດຖະກິດ-ສັງຄົມ 2021-2025, ການຫັນປະເທດຈາກບໍ່ມີທາງອອກສູ່ທະເລ ກາຍເປັນປະເທດເຊື່ອມຈອດ, ແລະ ການ​ພັດ​ທະ​ນາ​ແບບ​ຍືນ​ຍົງ ໂດຍສະເພາະການບັນລຸເປົ້າໝາຍ​ກາ​ນ​ພັດ​ທະ​ນາແບບຍືນຍົງ ສປຊ 2030 ແລະການ​ຈະ​ນ​ຳ​ເອົາ​ ສປປ ລາວ ຫລຸດ​ພົ້ນ​ອອກ​ຈາກ​ສະຖານະພາບປະເທດ​ດ້ອຍພັດທະນາໃນປີ 2026. ພິເສດ, ທ່ານທູດໄດ້ຢືນຢັນຈະສຸມທຸກຄວາມພະຍາຍາມ ເພື່ອເສີມສ້າງສາຍພົວພັນມິດ​ຕະ​ພາບ ແລະ ການຮ່ວມມືສອງຝ່າຍ ລາວ-ອິ​ຕາ​ລີ ກໍຄື ​ການ​ຮ່ວມ​ມືພາຍໃຕ້ຂອບ​ ອາເຊັມ, ອາຊຽນ-ອີຢູ ແລະ ຂອບອົງ​ການ ສປຊ ທີ່ທັງສອງປະເທດເປັນພາຄີ ໃຫ້ນັບມື້ນັບເພີ່ມທະວີ.

ໃນໂອກາດດັ່ງກ່າວ, ທ່ານ ປະທານາທິບໍດີ ກໍໄດ້ສະແດງຄວາມຊົມເຊີຍ ແລະ ໄດ້ຕີລາຄາສູງຕໍ່ການມາດໍາລົງ   ຕໍາແໜ່ງ ຂອງ ທ່ານເອກອັກຄະລັດຖະທູດລາວຄົນໃໝ່ ປະຈຳ ສາທາລະນະລັດ ອິ​ຕາ​ລີ, ສະ​ແດງ​ຄວາມ​ຊົມ​ເຊີຍ​ຕໍ່ຜົນສໍາເລັດ​ໃນ​ການ​ພັດ​ທະ​ນາ​ເສດ​ຖະ​ກິດ-ສັງ​ຄົມ ໃນ​ໄລ​ຍະ​ຜ່ານ​ມາ ແລະອວຍພອນໃຫ້ທ່ານເອກອັກຄະລັດຖະທູດ ປະສົບຜົນສຳເລັດໃນການປະຕິບັດໜ້າທີ່ວຽກງານ ແນ່ໃສ່ສົ່ງເສີມການພົວພັນຮ່ວມມືສອງຝ່າຍ ລາວ-ອີຕາລີໃນຕໍ່ໜ້າ.

ໃນໂອກາດໄປເຄື່ອນໄຫວຍື່ນສານຕາຕັ້ງໃນຄັ້ງນີ້, ທ່ານທູດລາວຄົນໃໝ່ ຍັງໄດ້ ຍັງ​ໄດ້​ພົບ​ປະ​ສອງ​ຝ່າຍກັບ​ຫົວ​ຫນ້າ​ກົມ​ອາ​ຊີ​-ໂອ​ເຊ​ອາ​ນີ ແລະ ອັງຕາກ​ຕິ​ກາ, ກະຊວງການຕ່າງປະເທດ ແລະ​ຮ່ວມ​ມື​ສາ​ກົນ ຂອງ ອິ​ຕາ​ລີ, ເຊິ່ງ​ທັງ​ສອງ​ຝ່າຍໄດ້ທົບທວນຄືນການຮ່ວມມື ລະຫວ່າງ ສ​ປ​ປ ລາວ ແລະ ສ.ອີຕາລີ ໃນໄລຍະຜ່ານມາ ແລະ ກໍານົດທິດທາງໃນຕໍ່ໜ້າ ໂດຍຈະສຸມໃສ່ຂົງເຂດການຮ່ວມມືທີ່ສອງຝ່າຍມີທ່າແຮງ ແລະເປັນບູລິມະສິດ              ເປັນຕົ້ນ: ການສຶກສາ, ວັດ​ທະ​ນະ​ທຳ,  ທ່ອງທ່ຽວ, ການຄ້າ ແລະ ການລົງທຶນ ລວມທັງການໃຫ້ການຮ່ວມມືສະໜັບສະໜູນເຊິ່ງກັນ ແລະກັນໃນຂອບຫລາຍຝ່າຍ: ອາເຊັມ, ອາຊຽນ-ອີຢູ ແລະ ຂອບ ອົງ​ການ ສປຊ.

ສປປ ລາວ ແລະ ສາທາລະນະລັດ ອິ​ຕາ​ລີ ໄດ້ສ້າງຕັ້ງສາຍພົວພັນການທູດນໍາ ໃນວັນທີ 07 ທັນ​ວາ 1965.