ໃນວັນທີ 16 ກຸມພາ 2024, ໂດຍອີງຕາມຮອບວຽນການເປັນປະທານຄະນະກໍາມະການອາຊຽນ-ເຊີແນວ (ASEAN Committee in Geneva (ACG)) ສົກປີ 2024, ສໍານັກງານຜູ້ຕາງໜ້າຖາວອນ ແຫ່ງ ສປປ ລາວ ທີ່ ເຊີແນວ, ສະວິດເຊີແລນ, ໄດ້ສໍາເລັດການເປັນປະທານກອງປະຊຸມ ACG ຄັ້ງທີ 1 ດ້ວຍຜົນສໍາເລັດອັນຈົບງາມ ໂດຍມີບັນດາທູດ ອາຊຽນ ແລະ ຕີມໍແລັດສະເຕ ເຂົ້າຮ່ວມຢ່າງພ້ອມພຽງ.

ກອງປະຊຸມ ໄດ້ພ້ອມກັນທົບທວນຄືນຜົນການຈັດຕັ້ງປະຕິບັດການຮ່ວມມືໃນໄລຍະຜ່ານມາ ແລະ ກໍານົດທິດທາງໃນຕໍ່ໜ້າ, ເຊິ່ງໃນນີ້, ສປປ ລາວ ໄດ້ແຈ້ງຫົວຂໍ້ (Theme), 9 ຂະແໜງການບູລິມະສິດ ແລະ ບັນດາກອງປະຊຸມອາຊຽນລະດັບຕ່າງໆ ໂດຍສະເພາະກອງປະຊຸມລັດຖະມົນຕີຕ່າງປະເທດອາຊຽນ  ຄັ້ງທີ 57 (57^th AMM) ໃນເດືອນ ກໍລະກົດ 2024 ແລະ ກອງປະຊຸມສຸດຍອດຜູ້ນໍາອາຊຽນຄັ້ງທີ 44 ແລະ45 (44^th ແລະ 45^th ASEAN Summits) ໃນເດືອນ ຕຸລາ 2024 ພາຍໃຕ້ການເປັນປະທານ ຂອງ ສປປ ລາວ; ພິເສດ, ໄດ້ແຈ້ງຜົນສໍາເລັດ ແລະບັນດາມາດຕະການໃນການຜັນຂະຫຍາຍຜົນກອງປະຊຸມວົງແຄບລັດຖະມົນຕີຕ່າງປະເທດອາຊຽນ ທີ່ມີຂຶ້ນໃນໄລຍະວັນທີ 28-29 ມັງກອນ 2024 ທີ່ ນະຄອນຫລວງພະບາງ ລວມທັງໄດ້ແຈ້ງການແຕ່ງຕັ້ງຜູ້ຕາງໜ້າພິເສດ ຂອງປະທານອາຊຽນ ສປປ ລາວ ວ່າດ້ວຍບັນຫາ ມຽນມາ.

ກອງປະຊຸມ ໄດ້ຕີລາຄາສູງຕໍ່ຜົນສໍາເລັດຂອງກອງປະຊຸມ ACG ຄັ້ງທີ 1 ແລະຢືນຢັນຈະສືບຕໍ່ສະໜັບສະໜູນການເປັນປະທານອາຊຽນຂອງ ສປປ ລາວ ສົກປີ 2024. ກອງປະຊຸມ ACG ຄັ້ງທີ 2 (ຄັ້ງຕໍ່ໄປ) ຈະມີຂຶ້ນໃນເດືອນ ພຶດສະພາ 2024 ທີ່ ເຊີແນວ.           

-------------------------------------------