ໃນທ້າຍເດືອນມັງກອນຜ່ານມາ, ສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳ ສາທາລະນະລັດ ເກົາຫລີ ໄດ້ຮ່ວມກັບຫ້ອງການຕາງໜ້າການບິນລາວ ປະຈຳ ເຊອູນ, ສະມາຄົມມິດຕະພາບ ເກົາຫລີ-ລາວ ແລະ ສະມາຄົມນັກສຶກສາລາວ ທີ່ ສ.ເກົາຫລີ ໄດ້ຈັດຕັ້ງຂົນຂວາຍ ແລະ ລະດົມການບໍລິຈາກເຄື່ອງນຸ່ງຫົ່ມ ເຊິ່ງມີທັງເຄື່ອງໃໝ່ ແລະ ເຄື່ອງມືສອງ ເພື່ອຊ່ວຍເຫລືອປະຊາຊົນຜູ້ທີ່ປະສົບໄພໜາວ ຢູ່ບັນດາແຂວງພາກເໜືອຂອງ ສປປ ລາວ. ພາຍໃນ 5 ວັນ ສາມາດການລະດົມເຄື່ອງບໍລິຈາກໄດ້ທັງໝົດ 100 ແກັດ ເຊິ່ງເປັນມູນຄ່າຫລາຍໝື່ນໂດລາ. ເຄື່ອງທັງໝົດນີ້ ບໍລິສັດລັດວິສະຫະກິດການບິນລາວ ທີ່ມີຖ້ຽວບິນໂດຍກົງທຸກໆມື້ລະຫວ່າງນະຄອນຫລວງວຽງຈັນ ຫາ ນະຄອນຫລວງເຊອູນ ໄດ້ຊ່ວຍຈັດສົ່ງຈາກນະຄອນຫລວງເຊອູນ ມາຍັງນະຄອນຫລວງວຽງຈັນ ໂດຍສາຍການບິນລາວ, ເຊິ່ງຈັດເປັນ 3 ຖ້ຽວຄື : ຖ້ຽວທຳອິດໃນວັນທີ 3 ກຸມພາ ຈໍານວນ 20 ແກັດ, ຖ້ຽວທີ 2 ວັນທີ 8 ກຸມພາ ແລະ ຖ້ຽວສຸດທ້າຍໃນວັນທີ 11 ກຸມພາ ຄັ້ງລະ 40 ແກັດ ລວມທັງໝົດ 100 ແກັດ ລວມນ້ຳໜັກປະມານ 1.500 ກິໂລກຼາມ. ຈາກນັ້ນ, ສະມາຄົມມິດຕະພາບ ລາວ-ເກົາຫລີ ທີ່ນະຄອນຫລວງວຽງຈັນ ເປັນຜູ້ສືບຕໍ່ນຳເອົາເຄື່ອງນຸ່ງຫົ່ມດັ່ງກ່າວໄປແຈກຢາຍຕາມຈຸດປະສົງ ແລະ ເປົ້າໝາຍ.
ນັບແຕ່ 1995 ທີ່ ສປປ ລາວ ແລະ ສ.ເກົາຫລີ ໄດ້ສ້າງຕັ້ງການພົວພັນການທູດນຳກັນ, ການພົວພັນຮ່ວມມືໃນແຕ່ລະດ້ານ ແລະ ຊ່ວຍເຫລືອເຊິ່ງກັນ ແລະ ກັນ ລະຫວ່າງ 2 ປະເທດ ສປປ ລາວ ແລະ ສ.ເກົາຫລີ ນັບມື້ໄດ້ຮັບການສົ່ງເສີມ ແລະ ພັດທະນາໃຫ້ດີຂຶ້ນ ອັນເຮັດໃຫ້ການໄປມາຫາສູ່ ລະຫວ່າງ ປະຊາຊົນສອງຊາດດັ່ງກ່າວ ນັບມື້ນັບເພີ່ມຫລາຍຂຶ້ນ, ມີຄວາມເຂົ້າອົກເຂົ້າໃຈ ແລະ ມີຄວາມໃກ້ຊິດຕິດແທດກັນຍິ່ງໆຂຶ້ນ.