ໃນວັນທີ 16 ກຸມພາ 2016, ທີ່ ທຳນຽບປະທານາທິບໍດີ ແຫ່ງ ນະຄອນຫຼວງ ປຣາກ, ສາທາລະນະລັດ ເຊັກ, ທ່ານ ສີທົງ ຈິດໂຍທິນ ໄດ້ເຂົ້າຍື່ນສານຕາຕັ້ງຕໍ່ພະນະທ່ານ Milos Zeman, ປະທານາທິບໍດີ ແຫ່ງ ສາທາລະນະລັດ ເຊັກ ເພື່ອດຳລົງຕຳແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈຳ ສາທາລະນະລັດ ເຊັກ ທີ່ມີສຳນັກງານຕັ້ງຢູ່ນະຄອນຫຼວງແບກແລງ, ສາທາລະນະລັດ ສະຫະພັນ ເຢຍລະມັນ.
ໃນການພົບປະໂອ້ລົມພາຍຫຼັງພິທີຍື່ນສານ, ທ່ານປະທານາທິບໍດີ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍທູດລາວຄົນໃໝ່ ແລະ ອວຍພອນໃຫ້ປະສົບຜົນສຳເລັດທຸກປະການໃນການປະຕິບັດໜ້າທີ່ການທູດຂອງຕົນ.
ທູດເຮົາໄດ້ສແດງຄວາມຂອບໃຈຢ່າງຈິງໃຈຕໍ່ການຕອບຮັບ ແລະ ອະນຸຍາດໃຫ້ເຂົ້າຍື່ນສານໃນຄັ້ງນີ້ ແລະ ຂອບໃຈຕໍ່ຄຳອວຍພອນພ້ອມທັງໄດ້ຢືນຢັນວ່າ ຈະປະຕິບັດໜ້າທີ່ຂອງຕົນໃຫ້ດີທີ່ສຸດ ເພື່ອສົ່ງເສີມການພົວພັນ ແລະ ການຮ່ວມມື ລະຫວ່າງ ສອງປະເທດ ກໍ່ຄື ປະຊາຊົນສອງຊາດ ລາວ ແລະ ເຊັກ ທີ່ເຄີຍມີມູນເຊື້ອທີ່ດີແລ້ວນັ້ນ ໃຫ້ມີບາດກ້າວອັນໃໝ່ທັງໃນດ້ານການເມືອງ, ເສດຖະກິດ ແລະ ວັດທະນະທຳ-ສັງຄົມ ລວມທັງການທ່ອງທ່ຽວ. ພ້ອມກັນນັ້ນ ທູດເຮົາກໍ່ໄດ້ນຳເອົາຄວາມຢ້ຽມຢາມຖາມຂ່າວອັນອົບອຸ່ນ ແລະ ພອນໃຊອັນປະເສີດຂອງພະນະທ່ານ ຈູມມາລີ ໄຊຍະສອນ, ປະທານປະເທດ ແຫ່ງ ສປປ ລາວ ເຖິງ ພະນະທ່ານ ປະທານາທິບໍດີ, ຊຶ່ງເພິ່ນກໍ່ໄດ້ສະແດງຄວາມຂອບໃຈ ແລະ ຝາກຄຳອວຍພອນ ເຖິງຄູ່ຮ່ວມຕຳແໜ່ງ ແຫ່ງ ສປປ ລາວ ເຊັ່ນດຽວກັນ.
ໃນໂອກາດດັ່ງກ່າວ, ທູດເຮົາຍັງໄດ້ແຈ້ງໃຫ້ເພິ່ນຊາບ ກ່ຽວກັບ ສະພາບການພັດທະນາເສດຖະກິດ-ສັງຄົມ ຂອງລາວ ໂດຍສັງເຂບ ແລະ ທັງການເຄື່ອນໄຫວວຽກງານການຕ່າງປະເທດທີ່ພົ້ນເດັ່ນຂອງ ສປປ ລາວ ແລະ ບົດບາດຂອງລາວໃນອາຊຽນ, ຊຶ່ງໄດ້ຮັບໜ້າທີ່ເປັນປະທານອາຊຽນໃນປີ 2016 ນີ້.
ພາຍຫຼັງການຍື່ນສານ, ໃນມື້ຕໍ່ມາ ທູດເຮົາໄດ້ເຂົ້າພົບປະສອງຝ່າຍກັບ Mr. MarekLibricky, ຫົວໜ້າກົມອາຊີ-ປາຊີຟິກ ແລະ ພົບກັບ Mr. MiloslavStasek, ຫົວໜ້າກົມການທູດ-ເສດຖະກິດ (Economic Diplomacy Department). ທັງສອງຝ່າຍ ໄດ້ຕີລາຄາ ກ່ຽວກັບການພົວພັນຮ່ວມມືຜ່ານມາ ແລະ ປຶກສາຫາລືເຖິງຄວາມເປັນໄປໄດ້ໃນການສົ່ງເສີມການຮ່ວມມືດ້ານຕ່າງໆໃນຕໍ່ໜ້າ.