ໃນວັນທີ 25 ກຸມພາ 2016 ນີ້, ຢູ່ທີ່ ໂຮງແຮມດອນຈັນພາເລດ, ນະຄອນຫລວງວຽງຈັນ ໄດ້ມີກອງປະຊຸມຄະນະກໍາມະການຜູ້ຕາງໜ້າຖາວອນປະຈໍາອາຊຽນ ຄັ້ງທີ 3 (3/2016 CPR) ພາຍໃຕ້ການເປັນປະທານຂອງ ທ່ານ ລັດສະໝີ ແກ້ວມະນີ, ເອກອັກຄະລັດຖະທູດ, ຜູ້ຕາງໜ້າຖາວອນ ແຫ່ງ ສປປ ລາວ ປະຈໍາອາຊຽນ ໂດຍມີການເຂົ້າຮ່ວມຂອງບັນດາເອກອັກຄະລັດຖະທູດ, ຜູ້ຕາງໜ້າຖາວອນປະເທດສະມາຊິກອາຊຽນ, ຮອງເລຂາທິການໃຫຍ່ອາຊຽນ ຮັບຜິດຊອບວຽກເສົາຄໍ້າການເມືອງ-ຄວາມໝັ້ນຄົງ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.
ກອງປະຊຸມຄັ້ງນີ້ແມ່ນກອງປະຊຸມຄັ້ງທີ 3 ພາຍໃຕ້ການເປັນປະທານຂອງ ສປປ ລາວເຮົາ ພາຍຫລັງທີ່ໄດ້ຮັບມອບໝາຍເປັນປະທານອາຊຽນ ນັບແຕ່ເດືອນ ມັງກອນ 2016 ເປັນຕົ້ນມາ. ຈຸດປະສົງຫລັກຂອງກອງປະຊຸມຄັ້ງນີ້ ແມ່ນເລັ່ງໃສ່ກະກຽມເນື້ອໃນໃຫ້ແກ່ກອງປະຊຸມລະດັບເຈົ້າໜ້າທີ່ອາວຸໂສ (SOM) ແລະ ກອງປະຊຸມວົງແຄບລັດຖະມົນຕີຕ່າງປະເທດອາຊຽນ (AMM Retreat), ເຊິ່ງຈະມີຂຶ້ນໃນວັນທີ 26-27 ກຸມພາ 2016 ທີ່ ນະຄອນຫລວງວຽງຈັນ.
ອີງຕາມປະເພນີປະຕິບັດ, ກອງປະຊຸມຄະນະກໍາມະການຜູ້ຕາງໜ້າຖາວອນ ປະຈໍາ ອາຊຽນ ຈະດໍາເນີນໄປ 2 ຄັ້ງຕໍ່ເດືອນ ແລະ ສ່ວນໃຫຍ່ແມ່ນຈັດຢູ່ ຈາກາກຕາ, ອິນໂດເນເຊຍ. ໃນນາມເປັນກົນໄກໜຶ່ງຂອງອາຊຽນ, ຄະນະກໍາມະການຜູ້ຕາງໜ້າຖາວອນປະຈໍາອາຊຽນແມ່ນເຮັດ 4 ໜ້າທີ່ຫລັກຂອງຕົນ: ເປັນຜູ້ຊ່ວຍແກ່ກອງປະຊຸມລະດັບຫົວໜ້າເຈົ້າໜ້າທີ່ອາວຸໂສ, ລະດັບລັດຖະມົນຕີຕ່າງປະເທດ ແລະ ລັດຖະມົນຕີຂະແໜງການກ່ຽວຂ້ອງ ແລະ ລະດັບສຸດຍອດແລ້ວ; ເຮັດໜ້າທີ່ເປັນຈຸດປະສານງານຢູ່ລະດັບພາກພື້ນກັບກອງເລຂາອາຊຽນແຫ່ງຊາດ, ກະຊວງຂະແໜງການ ຕະຫລອດຮອດທ້ອງຖິ່ນທີ່ກ່ຽວຂ້ອງຂອງແຕ່ລະປະເທດສະມາຊິກອາຊຽນ; ເພີ່ມທະວີການພົວພັນຮ່ວມມື ແລະ ລະດົມຂົນຂວາຍທຶນຮອນຊ່ວຍເຫລືອຈາກບັນດາປະເທດ ຄູ່ເຈລະຈາອາຊຽນ ແລະ ຄູ່ຮ່ວມມືພາຍນອກອື່ນ; ແລະ ລົງເລິກວຽກຕິດຕາມ-ກວດກາການຄຸ້ມຄອງ-ບໍລິຫານສໍານັກງານກອງເລຂາອາຊຽນ ທີ່ ຈາກາກຕາ, ອິນໂດເນເຊຍ.
ຄະນະກໍາມະການຜູ້ຕາງໜ້າຖາວອນປະຈໍາອາຊຽນ ປະກອບດ້ວຍບັນດາຜູ້ຕາງໜ້າຖາວອນໃນລະດັບເອກອັກຄະລັດຖະທູດ ຈໍານວນ 10 ທ່ານ, ເຊິ່ງຖືກແຕ່ງຕັ້ງ ແລະ ເປັນຕົວແທນໃຫ້ແກ່ ແຕ່ລະປະເທະສະມາຊິກອາຊຽນ ແລະ ມີສໍານັກງານຂອງຕົນເອງຕັ້ງຢູ່ ຈາກາກຕາ, ອິນໂດເນເຊຍ.