ໃນວັນທີ 5 ມີນາ 2016, ສະຖານກົງສຸນໃຫຍ່ ແຫ່ງ ສປປ ລາວ ທີ່ ນະຄອນຊຽງໄຮ້ ໄດ້ຈັດຕັ້ງພິທີເຜີຍແຜ່ຜົນສຳເລັດກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ X ຂອງພັກປະຊາຊົນ ປະຕິວັດລາວ ທີ່ມະຫາວິທະຍາໄລຕົງຮົວ, ນະຄອນຊຽງໄຮ້. ໂດຍໃຫ້ກຽດເຂົ້າຮ່ວມເປັນປະທານ ແລະ ເຜີຍແຜ່ຂອງ ສະຫາຍນາງ ສີສະ​ໄໝ ຫຼວງ​ຈັນ​ດາ​ວົງ, ເລຂາ​ໜ່ວຍ​ພັກຂອງສະຖານ​ກົງສຸນ​ໃຫຍ່, ກົງສຸນ​ໃຫຍ່ ແລະພ້ອມນັ້ນມີບັນດາສະຫາຍສະມາຊິກພັກ, ພະນັກງານລັດຖະກອນພາຍໃນສະຖານກົງສຸນ ແລະ ນັກ​ສຶກສາລາ​ວ ນະຄອນຊຽງໄຮ້, ແຂວງເຈີຈຽງ, ຈຽງຊູ ແລະ ອານຮຸຍ ທັງຫມົດເຂົ້າຮ່ວມຈຳນວນ150 ຄົນ.

       ການຈັດຕັ້ງເຜີຍແຜ່ຜົນສຳເລັດກອງປະຊຸມໃຫຍ່ຂອງພັກຄັ້ງນີ້ ເພື່ອແນໃສ່ເຮັດໃຫ້ບັນດາສະຫາຍສະມາຊິກພັກ, ພະນັກງານລັດຖະກອນ ແລະ ບັນດານັກສຶກສາທີ່ກຳລັງຄົ້ນຄ້ວາສຶກສາ ຮ່ຳຮຽນຢູ່ຕ່າງປະເທດ ໄດ້ຮັບຮູ້ ແລະ ເຂົ້າໃຈແຈ້ງຕໍ່ກັບບັນດາເນື້ອໃນກໍຄືມະຕິຂອງກອງປະຊຸມໃຫຍ່ ຄັ້ງທີ X ຂອງພັກໄດ້ຢ່າງເລິກເຊິງແທ້ຈິງ ພ້ອມທັງເປັນການເຊື່ອມຊຶມວຽກງານ ແນວຄິດການເມືອງໃຫ້ແກ່ສະມາຊິກພັກ ພະນັກງານໃນຂົງເຂດນີ້.

ໃນໂອກາດວັນດ່ຽວກັນນີ້ຍັງໄດ້ຈັດຕັ້ງສະເຫຼີມສະຫຼອງວັນແມ່ຍິງສາກົນ ຄົບຮອບ 106 ປີ ໂດຍໄດ້ມີພິທີປາຖະກະຖາວັນແມ່ຍິງສາກົນ 8 ມີນາ ມູນເຊື້ອການຕໍ່ສູ້ຂອງແມ່ຍິງ ສາກົນເພື່ອໄດ້ມາຊຶ່ງວັນດັ່ງກ່າວ, ກໍ່ຄືຂອງສະຫະພັນແມ່ຍິງລາວ ພ້ອມນັ້ນ 3 ອົງການຈັດຕັ້ງມະຫາຊົນຂອງນັກສຶກສາ ຊາວໜຸ່ມ, ແມ່ຍິງ ແລະ ກຳມະບານ ໄດ້ຈັດຕັ້ງພິທີຮັບສະມາຊິກໃໝ່ ເຊິ່ງເຕັມໄປດ້ວຍເນື້ອໃນ ທັງເປັນບັນຍາກາດ ທີ່ສ້າງຄວາມຮັກ ແພງສາມັກຄີແລະມີຄວາມເບີກບານມ່ວນຊື່ນ.