ການເຮັດວຽກຮ່ວມກັນ ລະຫວ່າງ ກົມການຂ່າວ, ກະຊວງການຕ່າງປະເທດ ລາວ ແລະ ຍີ່ປຸ່ນ

 ຢ້ຽມຢາມສຳນັກຂ່າວກຽວໂດ

 ຢ້ຽມຊົມສູນປະຊຸມສາກົນ

ຢ້ຽມຢາມຫ້ອງວ່າການລັດຖະບານຍີ່ປຸ່ນ

ໃນລະຫວ່າງ​​ວັນ​ທີ 1-5 ມີນາ 2016, ຄະນະ​ຜູ້​ແທນຈາກ ສປປ ລາວ ​ໄດ້​ເຂົ້າ​ຮ່ວມຝຶກອົບຮົມ​ໂຄງການ​ສ້າງ​ຂີດ​ຄວາມ​ສາມາດ​ໃຫ້​ແກ່​ພະນັກງານ​ຂັ້ນ​ສູງ ກ່ຽວ​ກັບ​ວຽກ​ງານ​ການ​ຂ່າວ, ​ການ​ຄຸ້ມ​ຄອງ​ສື່ມວນ​ຊົນ ​ແລະ ການ​ສ້າງສາ​ລະ​ຄະ​ດີ, ທີ່ ​ໂຕກ​ຽວ, ປະ​ເທດ ຍີ່ປຸ່ນ. ​ໂຄງການ​ດັ່ງກ່າວ ​ໄດ້​ຮັບ​ການ​ສະໜັບສະໜູນ​ໂດຍກອງ​ທຶນ​ເຊື່ອມ​ໂຍງ​ຍີ່ປຸ່ນ-ອາຊຽນ JAIF (Japan-ASEAN Integration Fund) ​ເພື່ອ​ກຽມພ້ອມ​ໃນ​ການ​ຮັບໃຊ້ກອງ​ປະຊຸມ​ສຸດ​ຍອດ​ອາ​ຊຽນ ​ແລະ ກອງ​ປະຊຸມ​ທີ່​ກ່ຽວຂ້ອງ​ໃນ​ປີ 2016 ທີ່ ສປປ ລາວ ຈະເປັນເຈົ້າພາບ. ຄະນະທີ່​​​ໄປຮ່ວມ​ຝຶກ​ອົບຮົມ​​ໃນຄັ້ງ​ນີ້​ປະກອບມີ ​ພະນັກງານ​ຈາກ​ກົມ​ການ​ຂ່າວ, ກະຊວງການຕ່າງປະເທດ, ພະນັກງານ​ກົມ​ອາ​ຊຽນ, ພະນັກງານ​ຈາກ​ກະຊວງ​ຖະ​ແຫລ​ງຂ່າວ, ວັດທະນະທຳ ​ແລະ ທ່ອງ​ທ່ຽວ, ສຳນັກ​ຂ່າວສານ​ປະ​ເທດ​ລາວ ​ແລະ ​ໂທລະພາບ​ແຫ່ງ​ຊາດ, ທ່ານ ພອນ​ທະວີ ບຸດ​ດາລາ, ຫົວໜ້າ​ກົມ​ການ​ຂ່າວ, ກະຊວງການຕ່າງປະເທດ ​ເປັນ​ຄະນະ​ນຳພາ​ໄປ​ຝຶກ​ອົບຮົມ​ໃນ​ຄັ້ງ​ນີ້.

           ໃນ​ໄລຍະ​ການ​ຝຶກ​ອົບຮົມ​, ຄະນະ​ຜູ້​ແທນ​ ໄດ້​​ເຂົ້າ​ຮ່ວມ​ສົນທະນາ​ແລກປ່ຽນ​ບົດຮຽນ​ວຽກ​ງານ​ການ​ຂ່າວ, ການ​ຄຸ້ມ​ຄອງ​ສື່ມວນ​ຊົນຕ່າງປະ​ເທດ ແລະ ການສ້າງສາລະຄະດີ ​ກັບ ກົມ​ການ​ຂ່າວ, ກະຊວງ​ການ​ຕ່າງປະ​ເທດ​​ຍີ່ປຸ່ນ; ກົມ​ປະຊາສຳພັນ, ສຳນັກງານ​ນາຍົກລັດຖະມົນຕີຍີ່ປຸ່ນ; ສໍານັກ​ຂ່າວສານ​ກຽວ​ໂດ; ສໍານັກ​ຂ່າວສານ NHK. ພ້ອມກັນນັ້ນ, ກໍຍັງໄດ້​ເຂົ້າ​ຢ້ຽມ​ຊົມ ​ແລະ ຮັບຟັງ​ວິທີ​ການ​ເຮັດ​ວຽກ​ຂອງສູນມູນ​ນິທິ​ຍີ່ປຸ່ນ (Japan Foundation); ສູນ​ຂ່າວ​​ຕ່າງປະ​ເທດ (Foreign Press Center); ສູນປະຊຸມສາກົນໂຕກຽວ (Tokyo International Forum), ສູນ​ຖ່າຍ​ທອດ​ສົດ​ສາກົນໂດຍ NHK (International Broadcasting Center) ​ແລະ NHK Park.

           ໃນ​ໂອກາດ​ນີ້, ທ່ານ ພອນ​ທະວີ ບຸດ​ດາລາ ກໍໄດ້ຕາງໜ້າ​ຄະນະສະແດງຄວາມຂອບໃຈຕໍ່ບັນ​ດາ​ພາກສ່ວນ​ຕ່າງໆຂອງ ຍີ່ປຸ່ນ ທີ່ໄດ້ໃຫ້ການ​ຕ້ອນຮັບ​ຢ່າງ​ອົບ​ອຸ່ນ ພ້ອມ​ທັງການສະໜັບສະໜູນ, ຊ່ວຍເຫລືອ ​ແລະ ​ແລກປ່ຽນ​ບົດຮຽນ ກັບ​ຄະນະ​ຜູ້​ແທນ ສປປ ລາວ ​​ໃນ​ໄລຍະ​ການ​ຝຶກ​ອົບຮົມ​ຄັ້ງ​ນີ້ ຊຶ່ງ​ຈະ​ເປັນ​ການ​ເພີ່ມທະວີໃນການສ້າງ​ຄວາມ​ອາດ​ສາມາດ​ດ້ານ​ວຽກ​ງານ​ດັ່ງກ່າວ ​ແລະ ປະກອບສ່ວນເຂົ້າໃນການ​ເສີມ​ຂະຫຍາຍ​ສາຍ​ພົວພັນ​ການ​ຮ່ວມ​ມື​ລະຫວ່າງ ສປປ ລາວ ​ແລະ ຍີ່ປຸ່ນ ​ເວົ້າ​ລວມ, ​ເວົ້າ​ສະ​ເພາະ ​ກໍຄື​ບັນດາ​ຂະ​ແໜງ​ວຽກ​ງານ​ການ​ຂ່າວຂອງ​ສອງ​ປະ​ເທດ.