ກອງປະຊຸມ ຄັ້ງທີ 21 ຂອງ ຄະນະກຳມາທິການລະຫວ່າງລັດຖະບານອາຊຽນ ວ່າດ້ວຍ ສິດທິມະນຸດ ໄດ້ມີຂຶ້ນໃນວັນທີ 5-9 ເມສາ 2016 ທີ່ ກອງເລຂາອາຊຽນ, ໂດຍການເປັນປະທານຂອງ ທ່ານ ພູໂຂງ ສີສຸລາດ, ປະທານຄະນະກຳມາທິການລະຫວ່າງລັດຖະບານອາຊຽນ ວ່າດ້ວຍ ສິດທິມະນຸດ, ຫົວໜ້າກົມສົນທິສັນຍາ ແລະ ກົດໝາຍ, ກະຊວງການຕ່າງປະເທດ. ກອງປະຊຸມໄດ້ປຶກສາຫາລືແຜນກິດຈະກຳບູລິມະສິດ ສຳລັບປີ 2016 ຂອງຄະນະກຳມາທິການລະຫວ່າງລັດຖະບານອາຊຽນ ວ່າດ້ວຍ ສິດທິມະນຸດ, ຮ່າງບົດລາຍງານການເຄື່ອນໄຫວປະຈຳປີ 2016 ແລະ ແຜນກິດຈະກໍາບູລິມະສິດ ສໍາລັບສົກປີ 2017. ໃນລະຫວ່າງກອງປະຊຸມ, ຄະນະກຳມາທິການລະຫວ່າງລັດຖະບານອາຊຽນ ວ່າດ້ວຍ ສິດທິມະນຸດ ໄດ້ພົບປະປະຈຳປີ ກັບ ເລຂາທິການໃຫຍ່ອາຊຽນ ແລະ ຄະນະກຳມະການຜູ້ຕາງໜ້າອາຊຽນ (CPR) ເພື່ອເພີ່ມທະວີການປະສານງານໃນການປະຕິບັດພາລະບົດບາດໃນການສົ່ງເສີມ ແລະ ປົກປ້ອງສິດທິມະນຸດ ຢູ່ ອາຊຽນ ບົນພື້ນຖານເງື່ອນໄຂຂອງພາກພື້ນ ແລະ ຂອງແຕ່ລະປະເທດສະມາຊິກອາຊຽນ.
ຄະນະກຳມາທິການລະຫວ່າງລັດຖະບານອາຊຽນ ວ່າດ້ວຍ ສິດທິມະນຸດ ຍັງໄດ້ພົບປະກັບ ເອກອັກຄະລັດຖະທູດ ອາເມຣິກາ ແລະ ເອກອັກຄະລັດຖະທູດ ສະຫະພາບ ເອີຣົບ ປະຈຳ ອາຊຽນ ເພື່ອສືບຕໍ່ເສີມສ້າງຄວາມເຂົ້າອົກເຂົ້າໃຈ ກ່ຽວກັບ ການປະຕິບັດສິດທິມະນຸດ ແລະ ການຮ່ວມມືກັນໃນວຽກງານສິດທິມະນຸດ ລະຫວ່າງ ອາຊຽນ-ອາເມຣິກາ ແລະ ລະຫວ່າງ ອາຊຽນ-ສະຫະພາບ ເອີຣົບ.
ຄະນະກຳມາທິການລະຫວ່າງລັດຖະບານອາຊຽນ ວ່າດ້ວຍ ສິດທິມະນຸດ ແມ່ນອົງການຫຼັກດ້ານສິດທິມະນຸດຂອງອາຊຽນ, ສ້າງຕັ້ງຂຶ້ນພາຍໃຕ້ມາດຕາ 14 ຂອງກົດບັດອາຊຽນ ເຊິ່ງເອກະສານພາລະບົດບາດ (TOR) ຂອງຄະນະກຳມາທິການດັ່ງກ່າວ ຖືກຮັບຮອງໂດຍລັດຖະມົນຕີຕ່າງປະເທດອາຊຽນ ໃນປີ 2009. ປະເທດສະມາຊິກອາຊຽນ ແຕ່ງຕັ້ງຜູ້ຕາງໜ້າຂອງຕົນໃນວາລະ 3 ປີ ແລະ ສາມາດຕໍ່ໄດ້ 1 ສະໄໝ. ໃນປີ 2016, ມີຜູ້ຕາງໜ້າ 8 ປະເທດສະມາຊິກອາຊຽນ ໄດ້ປ່ຽນແທນຜູ້ຕາງໜ້າຂອງປະເທດເຫຼົ່ານັ້ນ ທີ່ໄດ້ສິ້ນສຸດວາລະຂອງຕົນ, ສປປ ລາວ ເຮັດໜ້າທີ່ເປັນປະທານຄະນະກຳມາທິການລະຫວ່າງລັດຖະບານອາຊຽນ ວ່າດ້ວຍ ສິດທິມະນຸດ ໃນໄລຍະທີ່ ສປປ ລາວ ເປັນປະທານອາຊຽນ ໃນປີ 2016.