ໂດຍອີງຕາມການເຊື້ອເຊີນຂອງກະຊວງວັດທະນາທຳໄທ, ໃນວັນທີ 20-24 ເມສາ ທີ່ຜ່ານມານີ້ ສະຖານເອກອັກຄະລັດຖະທູດ ສປປ ລາວ ທີ່ບາງກອກ ໄດ້ເຂົ້າຮ່ວມງານເທດສະການຊິມອາຫານອາຊຽນ ເຊິ່ງແມ່ນສ່ວນໜື່ງຂອງງານມະຫາກຳວັດທະນາທຳອາຊຽນ ປີ 2016 ທີ່ປະເທດໄທ ເປັນເຈົ້າພາບຈັດຂຶ້ນ. ການເຂົ້າຮ່ວມງານໃນຄັ້ງນີ້, ທາງສະຖານທູດລາວ ໄດ້ນຳເອົາຜະລິດຕະພັນອາຫານລາວ ຈຳນວນ 10 ເຍື່ອງ ທີ່ລວມມີທັງອາຫານຫຼັກ ແລະ ອາຫານຫວານ ເຂົ້າຮ່ວມສາທິດ, ແຈກຈ່າຍ ແລະ ຈຳໜ່າຍ.
ຕະຫຼອດໄລຍະ 5 ວັນຂອງການຈັດງານນັ້ນ, ຜະລິດຕະພັນອາຫານລາວ ແມ່ນໄດ້ຮັບການນິຍົມຊົມຊອບຈາກ ຜູ້ເຂົ້າຮ່ວມງານເປັນຢ່າງດີ ເຊິ່ງສະແດງອອກໂດຍຜ່ານການຕຳນິຕິຊົມຂອງຜູ້ເຂົ້າຮ່ວມງານ ທີ່ສະແດງຄວາມຍ້ອງຍໍຊົມເຊີຍເຖິງ ສີມື ແລະ ລົດຊາດອາຫານລາວ ແລະ ນອກຈາກນັ້ນ ທາງປະເທດເຈົ້າພາບຍັງໄດ້ຍົກເອົາຮ້ານລາວເປັນຕົວແບບ ໃນການຜະລິດອາຫານພື້ນບ້ານທີ່ແທ້ຈິງຂອງຄົນລາວ ມາຮ່ວມສະແດງໃນງານນີ້ອີກດ້ວຍ. ການເຂົ້າຮ່ວມງານນັ້ນຄັ້ງນີ້ ແມ່ນເປັນໂອກາດອັນດີອັນໜື່ງໃຫ້ແກ່ສະຖານທູດ ໄດ້ປະກອບສ່ວນ ເຂົ້າໃນວຽກ ງານຕາມການເຊື້ອເຊີນຂອງປະເທດເຈົ້າພາບ; ເປັນໂອກາດດີໃຫ້ແກ່ອ້າຍເອື້ອຍນ້ອງໃນສະຖານທູດ ໄດ້ເພີ້ມຄວາມສາ ມັກຄີພາຍໃນ; ເສີມຂະຫຍາຍການຮ່ວມມືໃນບັນດາປະເທດສະມາຊິກອາຊຽນດ້ວຍກັນ ໂດຍສະເພາະກັບປະເທດເຈົ້າພາບ; ພິເສດໃນງານຄັ້ງນີ້, ສະຖານທູດລາວ ໄດ້ສົ່ງພະນັກງານຂອງຕົນເຂົ້າຮ່ວມໂດຍກົງ ແຕ່ສະຖານທູດອື່ນແມ່ນ ວ່າຈ້າງບັນດາຮ້ານອາຫານເພື່ອເປັນຕົວແທນ. ການປະກອບສ່ວນຂອງສະຖານທູດລາວໃນຄັ້ງນີ້ ໄດ້ເຮັດໃຫ້ເຈົ້າພາບມີຄວາມພໍໃຈເປັນຢ່າງຍິ່ງ ເຊິ່ງມັນໄດ້ສະແດງອອກໃນການເຂົ້າສຳພາດໃນແຕ່ລະວັນ ແລະ ການບັນຍາຍຂອງເຈົ້າພາບ ທີ່ຍາມໃດ ກໍໄດ້ຍົກຍ້ອງອາຫານພື້ນເມືອງ ແລະ ການປະກອບສ່ວນຈາກ ສປປ ລາວ.
ການເຂົ້າຮ່ວມງານໃນຄັ້ງນີ້ ນອກຈາກເປັນການເຜີຍແຜ່ວັດທະນາທຳລາວ ໂດຍຜ່ານການປຸງແຕ່ງອາຫານ ແລະ ແຈກຈ່າຍແຜນພັບການທ່ອງທ່ຽວລາວແລ້ວ ຍັງເປັນການສະແດງໃຫ້ນາໆປະເທດຮູ້ເຖິງເອກກະລັກ ແລະ ຮູບແບບການດຳລົງຊິວິດອັນດີງາມຂອງປະຊາຊົນລາວ ອີກດ້ວຍ.