ໃນຕອນແລງຂອງວັນທີ 7 ພຶດສະພາ 2016 ທີ່ຜ່ານມານີ້, ທ່ານ ຫລີ ບຸນຄໍ້າ, ເອກອັກຄະລັດຖະທູດ ແລະ ທ່ານ ບຸນສີ ວົງບົວສີ, ກົງສູນໃຫ່ຍ ແຫ່ງ ສປປ ລາວ ປະຈຳຂອນແກ່ນ ພ້ອມດ້ວຍ ອ້າຍເອື້ອຍນ້ອງສະຖານທູດລາວທີ່ບາງກອກຈຳນວນໜື່ງ ໄດ້ໃຫ້ກຽດເຂົ້າຮ່ວມງານສານສຳພັນວັດທະນາທຳປະເພນີ ໄທຊົງດຳ ຫຼື ໄທດຳ ປະຈຳປີ 2016 ຊຶ່ງຈັດຂຶ້ນເປັນຄັ້ງທີສອງ ໂດຍມູນນິທິໄທຊົງດຳ ແລະ ສະມາຄົມໄທດຳແຫ່ງປະເທດໄທ ຮ່ວມກັບສະຖາບັນວິໄຈພາສາ ແລະ ວັດທະນາທຳເອເຊຍ ຂອງມະຫາວິທະຍາໄລມະຫິດົນ ທີ່ ມະຫາວິທະຍາ ໄລມະຫິດົນ, ວິທະຍາເຂດສາລາຍາ, ຈັງຫວັດນະຄອນປະຖົມ.
ຄະນະສະຖານທູດ ໄດ້ຮັບການຕ້ອນຮັບຢ່າງອົບອຸ່ນຈາກ ທ່ານ ສະໄຫວ ເພັດລຸນ, ປະທານສະມາຄົມໄທດຳແຫ່ງປະເທດໄທ ຕະຫລອດຮອດພໍ່ແມ່ປະຊາຊົນຄົນໄທເຊື້ອສາຍໄທດຳ ທີ່ເຂົ້າຮ່ວມງານຢ່າງຫຼວງຫຼາຍ.
ໂອກາດນີ້ ທ່ານ ຫລີ ບຸນຄໍ້າ ໄດ້ໃຫ້ກຽດມີຄວາມເຫັນຕໍ່ພິທີຄັ້ງນີ້ ໂດຍກ່າວສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ, ສະແດງຄວາມຊົມເຊີຍຕໍ່ຄະນະຈັດງານ ແລະ ຕີລາຄາສູງການເຕົ້າໂຮມຄວາມສາມາຄີຊ່ວຍເຫຼືອກັນຂອງຄົນເຊື້ອສາຍໄທດຳ ທີ່ມີຕົ້ນກຳເນີດສືບສາຍເຜົ່າພັນຈາກປະເທດລາວ, ຊົມເຊີຍການອະນຸລັກ ແລະ ສົ່ງເສີມວັດທະນະທຳຮີດຄອງປະເພນີຂອງຊາວໄທດຳເອົາໄວ້ໄດ້ເປັນຢ່າງດີ, ຍັງບໍ່ລືມບັນພະບຸລຸດຕົ້ນກຳເນີດ, ຫວັງວ່າສິ່ງດີງາມເຫຼົ່ານີ້ ຈະໄດ້ຮັບການສົ່ງເສີມໃຫ້ແຜ່ຂະຫຍາຍໄປເຊັ່ນລູກເຊັ່ນຫລານສືບຕໍ່ໄປ.
ໃນງານດັ່ງກ່າວ ໂຄສົກເວທີ ແລະ ຜູ້ເຂົ້າຮ່ວມສ່ວນຫຼາຍ ແມ່ນເວົ້າພາສາສຳນຽງໄທດຳ, ມີການສະແດງສິລະປະຂອງພີ່ນ້ອງຄົນໄທເຊື້ອໄທດຳຈາກຈັງຫວັດ (ແຂວງ) ຕ່າງໆຢ່າງມ່ວນຊື່ນ, ເຊິ່ງສ່ອງແສງເຖິງການອະນຸລັກການນຸ່ງຖື, ການຟ້ອນ-ຮ້ອງລຳແບບໄທດຳທີ່ອ່ອນຊ້ອຍງົດງາມ.