ໃນວັນພະຫັດ, ວັນທີ 12 ພຶດສະພາ 2016, ທ່ານ ວິລະວົງ ເວຍຣະວົງ ໄດ້ເຂົ້າຢ້ຽມຂໍ່ານັບ ພະນະທ່ານ ລ໋ອງ ວິສະໂລ, ຮອງລັດຖະມົນຕີກະຊວງການຕ່າງປະເທດ ແລະ ຮ່ວມມືສາກົນ ເພື່ອຍື່ນສັນຍາບັດ ເປັນກົງສຸນໃຫຍ່ ແຫ່ງ ສປປ ລາວ ປະຈໍາ ແຂວງຊຽງແຕງ ໂດຍມີຄວາມຮັບຜິດຊອບອີກ 4 ແຂວງຄື: ແຂວງຣັດຕະນະກີຣີ, ມົນດົນກີຣີ, ກຼໍແຈະ ແລະ ແປຼະວີເຮຍ.
ໃນໂອກາດດັ່ງກ່າວ ທ່ານ ວິລະວົງ ເວຍຣະວົງ ໄດ້ຝາກຄໍາຢື້ຢາມຖາມຂ່າວຂອງ ພະນະທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ມາຍັງ ພະນະທ່ານ ປຣາກ ໂຊໂຄນ, ພ້ອມດ້ວຍຄະນະນໍາກະຊວງ ນໍາອີກ, ພ້ອມດຽວກັນນັ້ນ ກໍໄດ້ກ່າວເຖິງສາຍພົວພັນອັນເປັນມູນເຊື້ອມາແຕ່ດົນນານ ແລະ ການຮ່ວມມື ລະຫວ່າງ ສອງປະເທດ ແລະ ໃຫ້ຄໍາໝັ້ນສັນຍາ ຈະພະຍາຍາມເສີມຂະຫຍາຍການພົວພັນຮ່ວມມືອັນດີນີ້ໃຫ້ຂະຫຍາຍຕົວຍິ່ງໆຂຶ້ນ.
ພະນະທ່ານ ລ໋ອງ ວິສະໂລ, ຮອງລັດຖະມົນຕີກະຊວງການຕ່າງປະເທດ ແລະ ຮ່ວມມືສາກົນ ແຫ່ງ ຣາຊະອານາຈັກ ກໍາປູເຈຍ ໄດ້ສະແດງຄວາມຂອບໃຈຕໍ່ ຄໍາຢື້ຢາມຖາມຂ່າວຂອງ ທ່ານ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ແລະ ພະນະທ່ານ ປຣາກ ໂຊໂຄນ, ລັດຖະມົນຕີອາວຸໂສ, ລັດຖະມົນຕີກະຊວງການຕ່າງປະເທດ ແລະ ຮ່ວມມືສາກົນ ແຫ່ງ ຣາຊະອານາຈັກ ກໍາປູເຈຍ ກໍໄດ້ຝາກຄວາມຢືຢາມຖາມຂ່າວມາຍັງ ທ່ານລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ເຊັ່ນດຽວກັນ. ພ້ອມກັນນັ້ນ, ທ່ານຍັງໄດ້ເວົ້າເຖິງການພົວພັນຮ່ວມມືອັນດີ ລະຫວ່າງ ສອງປະເທດໃນໄລຍະຜ່ານມາ ແລະ ຈະໃຫ້ການຮ່ວມມື ແລະ ຊ່ວຍເຫຼືອ ໃຫ້ແກ່ການປະຕິບັດໜ້າທີ່ຂອງ ທ່ານ ວິລະວົງ ເວຍຣະວົງ ໃນຄັ້ງນີ້ ແລະ ອວຍພອນໃຫ້ ທ່ານ ວິລະວົງ ເວຍຣະວົງ ຈົ່ງປະສົບຜົນສໍາເລັດໃນການປະຕິບັດໜ້າທີ່ວຽກງານການທູດ ພ້ອມທັງຮ່ວມມືກັນເສີມຂະຫຍາຍການພົວພັນຮ່ວມມືທີ່ເປັນມູນເຊືອໃຫ້ດີຂຶ້ໄປເລື້ອຍໆ.