ໃນໂອກາດດຳລົງຕໍາແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ສສ ຫວຽດນາມ, ຕອນແລງຂອງ ວັນທີ 18 ມັງກອນ 2024, ສະຫາຍ ນາງ ຄຳເພົາ ເອີນທະວັນ ພ້ອມຄະນະຜູ້ແທນ ສະຖານເອກອັກຄະລັດຖະທູດລາວ ໄດ້ເຂົ້າຢ້ຽມຂ່ຳນັບ ແລະ ສະເໜີຕົວຕໍ່ ສະຫາຍ ສຈ, ປອ ຫງວຽນ ຊວັນ ຖັງ, ກຳມະການກົມການເມືອງສູນກາງພັກ, ຫົວໜ້າສະຖາບັນການເມືອງແຫ່ງຊາດໂຮ່ຈິມິນ, ປະທານສະພາທິດສະດີ ສູນກາງພັກກອມມູນິດຫວຽດນາມ ໂດຍສະຫາຍໄດ້ນຳເອົາຄຳຢື້ຢາມຖາມຂ່າວອັນອົບອຸ່ນ ແລະ ຄຳອວຍພອນອັນປະເສີດຂອງ ສະຫາຍ ຄຳພັນ ເຜີຍຍະວົງ, ເລຂາທິການສູນກາງພັກ, ປະທານສະພາທິດສະດີສູນກາງພັກ ແລະ ສະຫາຍ ຮສຈ, ພູວົງ ອຸ່ນຄໍາແສນ, ກໍາມະການສູນກາງພັກປະຊາຊົນປະຕິວັດລາວ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ ເຖິງ ສະຫາຍ ສຈ, ປອ ຫງວຽນ ຊວັນ ຖັງ ພ້ອມຄະນະ ເນື່ອງໃນໂອກາດ ປີໃໝ່ສາກົນ ທີ່ຜ່ານພົ້ນໄປ ແລະ ບຸນປີໃໝ່ປະຈຳຊາດຫວຽດນາມຈະໝູນວຽກມາເຖິງໃນມໍ່ໆນີ້.
ໃນຕອນເຊົ້າຂອງ ວັນທີ 12 ມັງກອນ 2024, ສະຫາຍ ນາງ ຄຳເພົາ ເອີນທະວັນ ພ້ອມຄະນະຜູ້ແທນສະຖານເອກອັກຄະລັດຖະທູດ ສປປ ລາວ ປະຈຳ ສສ ຫວຽດນາມ ເຂົ້າຢ້ຽມຂ່ຳນັບ ສະຫາຍ ນາງ ບຸ່ຍ ຖິ ມິງ ຮວ່າຍ, ເລຂາທິການສູນກາງພັກ, ຫົວໜ້າຄະນະຂົນຂວາຍ ສູນກາງພັກກອມມູນິດຫວຽດນາມ ໃນໂອກາດທີ່ສະຫາຍດໍາລົງຕໍາແໜ່ງເປັນເອກອັກຄະລັດຖະທູດວິສາມັນ ຜູ້ມີອໍານາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈໍາ ສາທາລະນະລັດ ສັງຄົມນິຍົມ ຫວຽດນາມ.
ສະຫາຍ ນາງ ບຸ່ຍ ຖິ ມິງ ຮວ່າຍ , ເລຂາທິການສູນກາງພັກ, ຫົວໜ້າຄະນະຂົນຂວາຍສູນກາງພັກ ກອມມູນິດຫວຽດນາມ ໄດ້ໃຫ້ການຕ້ອນຮັບຢ່າງອົບອຸ່ນ ແລະ ສະແດງຄວາມຊົມເຊີຍຕໍ່ການມາປະຕິບັດໜ້າທີ່ ດຳລົງຕຳແໜ່ງເປັນເອກອັກຄະລັດຖະທູດຜູ້ມີອໍານາດເຕັມ ປະຈໍາ ສາທາລະນະລັດ ສັງຄົມນິຍົມຫວຽດນາມ ຂອງສະຫາຍ ນາງ ຄຳເພົາ ເອີນທະວັນ. ສະຫາຍໄດ້ສະແດງຄວາມດີອົກດີໃຈທີ່ເຫັນວ່າ ໃນໄລຍະຜ່ານມາ ສາຍພົວພັນມິດຕະພາບ ລະຫວ່າງສອງປະເທດໄດ້ຮັບການຂະຫຍາຍຕົວ ແລະ ເຂົ້າສູ່ລວງເລິກ ປະກົດຜົນເປັນຈິງ ມີປະສິດທີ່ຜົນສູງໃນຫຼາຍຂົງເຂດ ເປັນຕົ້ນແມ່ນຂົງເຂດການເມືອງ, ປ້ອງກັນຊາດ, ປ້ອງກັນຄວາມສະຫງົບ, ຊຶ່ງເປັນການປະກອບສ່ວນສຳຄັນເຂົ້າໃນການພັດທະນາເສດຖະກິດ-ສັງຄົມຂອງແຕ່ລະປະເທດ. ພັກ, ລັດ ແລະ ປະຊາຊົນຫວຽດນາມ ຍາມໃດກໍຖືສຳຄັນຕໍ່ສາຍພົວພັນມິດຕະພາບອັນຍິ່ງໃຫຍ່ ຄວາມສາມັກຄີພິເສດ ແລະ ການຮ່ວມມືຮອດດ້ານ ແລະ ສະແດງຄວາມຮູ້ບຸນຄຸນອັນເລິກເຊິ່ງຕໍ່ການສະໜັບສະໜູນ ຊ່ວຍເຫຼືອອັນລ້ຳຄ່າຂອງ ພັກ, ລັດ ແລະ ປະຊາຊົນລາວໃນສະໄໝຕໍ່ສູ້ກູ້ຊາດ ກໍຄືໃນພາລະກິດປ່ຽນແປງໃໝ່ໃນປັດຈຸບັນ. ສຳລັບ ການພົວພັນຮ່ວມມືຂອງສອງຄະນະຂົນຂວາຍ ສຸນກາງພັກກອມມູນິດຫວຽດນາມ ແລະ ສູນກາງແນວລາວສ້າງຊາດ ຜ່ານມາ ໄດ້ມີຫຼາຍບົດບັນທຶກໃນການຮ່ວມມື ແລກປ່ຽນບົດຮຽນ ທັງທິດສະດີ ແລະ ພຶດຕິກຳຕົວຈິງມາໂດຍ ຕະຫຼອດ. ສະຫາຍຍັງໄດ້ສະແດງຄວາມເຊື່ອໝັ້ນວ່າ, ດ້ວຍຄວາມຮູ້ ຄວາມສາມາດ ແລະ ປະສົບປະການໃນວຽກງານການທູດຫຼາຍປີຜ່ານມາ, ສະຫາຍເອກອັກ ຄະລັດຖະທູດຄົນໃໝ່ ຈະປະຕິບັດໜ້າທີ່ໆພັກ ແລະ ລັດຖະບານມອບໃຫ້ເປັນຢ່າງຈົບງາມ, ສືບຕໍ່ເປັນຂົວຕໍ່ອັນສຳຄັນໃຫ້ແກ່ການພົວພັນ ມິດຕະພາບອັນຍິ່ງໃຫຍ່ ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງປະເທດໃຫ້ຂະຫຍາຍຕົວຂຶ້ນຢ່າງບໍ່ຢຸດຢັ້ງ.
ໂອກາດນິ້, ສະຫາຍ ນາງ ຄໍາເພົາ ເອີນທະວັນ ເອກອັກຄະລັດຖະທູດລາວ ໄດ້ສະແດງຄວາມຂອບໃຈຕໍ່ສະຫາຍ ນາງ ບຸ່ຍ ຖິ ມິງ ຮວ່າຍ, ເລຂາທິການສູນກາງພັກ, ຫົວໜ້າຄະນະຂົນຂວາຍສູນກາງພັກກອມມູນິດຫວຽດນາມທີ່ໃຫ້ການຕ້ອນຮັບຢ່າງອົບອຸ່ນ, ສະໜິດສະໜົມ. ຝາກຄຳຢື້ຢາມຖາມຂ່າວອັນອົບອຸ່ນ ແລະ ຄຳອວຍພອນ ອັນປະເສີດຈາກສະຫາຍ ປອ. ສິນລະວົງ ຄຸດໄພທູນ ກຳມະການກົມການເມືອງສູນກາງພັກ, ປະທານສູນກາງ ແນວລາວສ້າງຊາດ ເຖິງສະຫາຍ ນາງ ບຸ່ຍ ຖິ ມິງ ຮວ່າຍ, ເລຂາທິການສູນກາງພັກ, ຫົວໜ້າຄະນະຂົນຂວາຍສູນກາງ ພັກກອມມູນິດຫວຽດນາມ ແລະ ຄະນະ ເນື່ອງໃນໂອກາດປີໃໝ່ສາກົນ 2024 ແລະ ປີໃໝ່ປະຈຳຊາດຫວຽດນາມ ໃກ້ຈະໝູນວຽນມາເຖິງນີ້. ສະຫາຍຍັງໄດ້ສະແດງຄວາມຍິນດີຕໍ່ໝາກຜົນສຳເລັດໃນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XIII ຂອງພັກກອມມູນິດຫວຽດນາມ ພາຍໃຕ້ການນຳພາອັນສະຫຼາດສ່ອງໃສຂອງພັກກອມມູນິດຫວຽດນາມ ຊຶ່ງນຳໂດຍສະຫາຍ ຫງວຽນ ຝູ ຈ້ອງ ເລຂາທິການໃຫຍ່ພັກກອມມູນິດຫວຽດນາມ ໄດ້ເຮັດໃຫ້ປະເທດຊາດພັດທະນາຢ່າງຮອບດ້ານ ແລະ ກ້າວກະໂດດ, ການແກ້ໄຂຄວາມຫຍຸ້ງຍາກທາງດ້ານເສດຖະກິດທີ່ໄດ້ຮັບຜົນກະທົບຈາກພະຍາດໂຄວິດ 19 ໄດ້ຢ່າງວ່ອງໄວ, ຊີວິດການເປັນຢູ່ຂອງປະຊາຊົນດີຂຶ້ນຢ່າງຈະແຈ້ງ, ອິດທິພົນ, ບົດບາດ, ຊື່ສຽງຂອງຫວຽດນາມນັບມື້ນັບສູງເດັ່ນຂຶ້ນໃນພາກພື້ນ ແລະ ສາກົນ. ພ້ອມນີ້, ສະຫາຍຍັງໄດ້ຕີລາຄາສູງ ຕໍ່ການພົວພັນຮ່ວມມືຂອງສອງປະເທດ ເວົ້າລວມ, ເວົ້າສະເພາະ ແມ່ນການພົວພັນຮ່ວມມືລະຫວ່າງສອງຄະນະພົວພັນຕ່າງປະເທດສູນກາງພັກ ຊຶ່ງສະແດງອອກໃນການກະກຽມການຢ້ຽມຢາມຂອງຜູ້ນຳຂັ້ນສູງສຸດຂອງສອງປະເທດໃນໄລຍະຜ່ານມາ.
ສະຫາຍ ເອກອັກຄະລັດຖະທູດລາວ ຍັງໄດ້ຕາງໜ້າພັກ, ລັດຖະບານ ແລະ ປະຊາຊົນລາວ ສະແດງຄວາມຮູ້ບຸນຄຸນ ແລະ ຂອບໃຈຕໍ່ພັກ, ລັດຖະບານ ແລະ ປະຊາຊົນຫວຽດນາມອ້າຍນ້ອງ ທີ່ຍາມໃດກໍໃຫ້ການຊ່ວຍເຫຼືອອັນລ້ຳຄ່າ ສະແດງເຖິງນ້ຳໃຈ ຄວາມສາມັກຄີພິເສດ ລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ຊຶ່ງມີໜຶ່ງດຽວໃນໂລກນີ້.
ວັນທີ 9 ມັງກອນ 2023, ທີ່ ນະຄອນຫຼວງວຽງຈັນ, ກະຊວງການຕ່າງປະເທດ ໃນນາມກອງເລຂາຄະນະຊີ້ນໍາລະດັບຊາດ ເພື່ອຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ (ປພຍ) ຢູ່ ສປປ ລາວ ໄດ້ຈັດກອງປະຊຸມປຶກສາຫາລື ກ່ຽວກັບ ຂະບວນການຮ່າງ ບົດລາຍງານແຫ່ງຊາດແບບສະໝັກໃຈ ສະບັບທີ 3 ກ່ຽວກັບ ຄວາມຄືບໜ້າໃນການຈັດຕັ້ງປະຕິບັດວາລະ 2030 ເພື່ອການພັດທະນາແບບຍືນຍົງ ຢູ່ ສປປ ລາວ ໂດຍພາຍໃຕ້ການເປັນປະທານຮ່ວມ ຂອງ ທ່ານ ດາວວີ ວົງໄຊ, ຫົວໜ້າກົມອົງການຈັດຕັ້ງສາກົນ, ຫົວໜ້າກອງເລຂາ ປພຍ ແຫ່ງຊາດ, ກະຊວງການຕ່າງປະເທດ ແລະ ທ່ານ ນາງ ມາຕິນ ເທີເຣີ, ຮັກສາການຊົ່ວຄາວ ຜູ້ປະສານງານອົງການ ສປຊ ປະຈໍາ ສປປ ລາວ, ຜູ້ຕາງໜ້າ ອົງການ ສປຊ ເພື່ອການພັດທະນາ (UNDP) ປະຈໍາ ສປປ ລາວ. ກອງປະຊຸມດັ່ງກ່າວ ປະກອບມີຜູ້ເຂົ້າຮ່ວມຈາກ ບັນດາກະຊວງ ແລະ ຂະແໜງການທີ່ກ່ຽວຂ້ອງ, ບັນດາສະຖານທູດ, ອົງການເຄືອຂ່າຍ ສປຊ, ຄະນະກໍາມາທິການເສດຖະກິດ-ສັງຄົມ ສປຊ ປະຈໍາພາກພື້ນອາຊີ-ປາຊິຟິກ ທີ່ ບາງກອກ, ອົງການຈັດຕັ້ງສາກົນທີ່ບໍ່ສັງກັດລັດຖະບານ, ອົງການຈັດຕັ້ງສັງຄົມ ແລະ ພາກເອກະຊົນ ຫຼາຍກວ່າ 80 ທ່ານ.