ໃນວັນທີ 19 ກໍລະກົດ 2022, ທີ່ ສຳນັກງານປະທານາທິບໍດີແຫ່ງ ສາທາລະນະລັດ ເກຼັກ (Presidential Palace), ທ່ານ ລັດສະຫມີ ແກ້ວມະນີ ໄດ້ເຂົ້າຍື່ນສານຕາຕັ້ງຕໍ່ພະນະທ່ານ ນາງ ແຄັດເຕີຣີນາ ຊາເຄລາໂຣປູລູ(Katerina Sakellaropoulou), ປະທານາທິບໍດີ ແຫ່ງ ສາທາລະນະລັດ ເກຼັກ ເພື່ອດຳລົງຕຳແໜ່ງເປັນເອກອັກຄະລັດຖະທູດ ວິສາມັນ ຜູ້ມີອຳນາດເຕັມແຫ່ງ ສປປ ລາວ ປະຈຳປະເທດ ສາທາລະນະລັດ ເກຼັກ ເຊິ່ງມີສຳນັກງານຕັ້ງຢູ່ນະຄອນເຊີແນວ, ປະເທດສະວິດສະແລນ.
ໃນວັນທີ 13 ກໍລະກົດ 2022 ທ່ີຜ່ານມານີ້, ສປປ ລາວ ແລະ ສະຫະພາບເອີຣົບ ໄດ້ຈັດກອງປະຊຸມສົນທະນາດ້ານສິດທິມະນຸດ ຄັ້ງທີ 11 ຂຶ້ນ ທີ່ ສຳນັກງານໃຫຍ່ ສະຫະພາບເອີຣົບ (ອີຢູ), ທີ່ ນະຄອນຫຼວງ ບຣຸກແຊນ, ປະເທດແບນຊິກ ພາຍໃຕ້ການເປັນປະທານຮ່ວມຂອງ ທ່ານ ດວງມະນີ ຍອດສີອຸດົມ, ຫົວໜ້າກົມສົນທິສັນຍາ ແລະ ກົດໝາຍ, ກະຊວງການຕ່າງປະເທດ, ທັງເປັນຫົວໜ້າຄະນະຜູ້ແທນຝ່າຍລາວ ແລະ ທ່ານ ນ. ບາບະຣາ ພຣິງເກີລ, ຫົວໜ້າກົມອາຊີຕາເວັນອອກ ແລະ ອາຊຽນ, ກຳມະທິການຕ່າງປະເທດຂອງສະຫະພາບເອີຣົບ, ທັງເປັນຫົວໜ້າຄະນະຜູ້ແທນຂອງຝ່າຍສະຫະພາບເອີຣົບ ແລະ ມີຜູ້ເຂົ້າຮ່ວມທີ່ມາຈາກກະຊວງຂະແໜງການກ່ຽວຂ້ອງຂອງ ສປປ ລາວ, ເປັນຕົ້ນແມ່ນ ກະຊວງປ້ອງກັນຄວາມສະຫງົບ, ກະຊວງຍຸຕິທໍາ, ກະຊວງແຜນການ ແລະ ການລົງທຶນ, ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ, ແລະ ສະຖານເອກອັກຄະລັດຖະທູດແຫ່ງ ສປປ ລາວ ທີ່ ນະຄອນຫລວງບຣຸກແຊນ ແລະ ເຈົ້າໜ້າທີ່ທີ່ກ່ຽວຂ້ອງຂອງສະຫະພາບເອີຣົບ.
ໃນຕອນເຊົ້າ ຂອງ ວັນທີ 07 ກໍລະກົດ 2022 ຜ່ານມາ, ທ່ານ ວັນທາ ແສງເມືອງ ໄດ້ເຂົ້າຍືນສານຕາຕັ້ງຕໍ່ ພະນະທ່ານ Miguel Diaz-Canel, ປະທານປະເທດ ແຫ່ງ ສາທາລະນະລັດ ກູບາ ເພື່ອດໍາລົງຕໍາແໜ່ງເປັນ ເອກອັກຄະລັດຖະທູດວິສາມັນ ຜູ້ມີອໍານາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈໍາ ສາທາລະນະລັດ ກູບາ.