ໃນວັນທີ 20 ມິຖຸນາ 2022 ນີ້, ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈໍາ ສສ ຫວຽດນາມ ພ້ອມດ້ວຍຄະນະ ໄດ້ເດີນທາງໄປຢ້ຽມຢາມ ແລະ ເຮັດວຽກຢູ່ແຂວງຝູເຖາະ. ໃນໂອກາດນີ້, ສະຫາຍ ແສງເພັດ ຮຸ່ງບຸນຍວງ ກໍໄດ້ພົບປະ ແລະ ເຮັດວຽກກັບ ສະຫາຍ ບູຍ ວັນ ກວາງ, ຮອງເລຂາພັກແຂວງ, ປະທານຄະນະກຳມະການປະຊາຊົນແຂວງຝູເຖາະ ຊຶ່ງໃນການພົບປະຄັ້ງນີ້, ການນໍາແຂວງ ກໍໄດ້ສະແດງຄວາມຍິນດີຕ້ອນຮັບ, ຕີລາຄາສູງທີ່ສະຫາຍເອກອັກຄະລັດຖະທູດ ພ້ອມຄະນະ ໄດ້ເດີນທາງໄປຢ້ຽມຢາມ ແລະ ເຮັດວຽກຢູ່ແຂວງຂອງຕົນ
ໃນຕອນເຊົ້າຂອງວັນທີ 22 ມິຖຸນາ 2022, ສະຖາບັນການຕ່າງປະເທດ ໄດ້ຈັດກອງປະຊຸມສໍາມະນາວິທະຍາ ສາດ, ພາຍໃຕ້ຫົວຂໍ້: “ການສ້າງຄວາມເຂັ້ມແຂງໃຫ້ແກ່ວຽກງານຄົ້ນຄວ້າ-ວິໄຈບັນຫາພາກພື້ນ ແລະ ສາກົນ ສໍາລັບ ພະນັກງານກະຊວງການຕ່າງປະເທດ” ໂດຍການເປັນປະທານກ່າວເປີດພິທີ ແລະ ດໍາເນີນກອງປະຊຸມ ຂອງ ທ່ານທຸດ ໄມ ໄຊຍະວົງສ໌, ຫົວໜ້າສະຖາບັນການຕ່າງປະເທດ. ນອກຈາກນີ້, ກອງປະຊຸມ ໄດ້ເຊື້ອເຊີນເອົາ ບັນດາທ່ານທຸດອາວຸໂສຈາກ ສະໂມສອນນັກການທູດລາວ (ສຳນັກງານຕັ້ງຢູ່ ສະຖາບັນການຕ່າງປະເທດ) ແລະ ບັນດາຄະນະກົມພາຍໃນກະຊວງ ມາເປັນຜູ້ບັນຍາຍ, ເຊິ່ງມີພະນັກງານຈາກກະຊວງການຕ່າງປະເທດເຂົ້າຮ່ວມ, ລວມຈໍານວນທັງໝົດ 60 ທ່ານ.
ໃນວັນທີ່ 17 ມິຖຸນາ 2022, ທ່ານ ຄໍາພັນ ອັ່ນລາວັນ ໄດ້ເຂົ້າຍື່ນສານຕາຕັ້ງຕໍ່ ສົມເດັດພະເຈົ້າຢູ່ຫົວ ມະຫາວະຊິຣາລົງກອນບໍດິນທະຣະເທບພະຍະວະຣາງກູນ, ພະມະຫາກະສັດ ແຫ່ງ ຣາຊະອານາຈັກໄທ ເພື່ອດໍາລົງຕໍາ ແໜ່ງເປັນເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈຳ ຣາຊະອານາຈັກໄທ ໂດຍມີສຳນັກງານຕັ້ງຢູ່ນະຄອນຫຼວງບາງກອກ.